မွန်ပြည်နယ်၊ မုဒုံမြို့နယ်မှ ကျောက်တစ်လုံးဆရာတော်ဟုထင်ရှားသော ဝင်းစိန်တောရ ဆရာတော် အဘိဓဇအဂ္ဂမဟာသဒ္ဒမ္မဇောတိက ဘဒ္ဒန္တကေသရသည် အသည်းရောဂါဖြင့် ထိုင်းနိုင်ငံ Bangkok Hospital ၌ ဆေးကုသမှု ခံယူနေသည်ဟု ဒါယကာဖြစ်သူ ဇေကမ္ဘာ ကုမ္ပဏီလီမီတက် ဒေါက်တာဦးခင်ရွှေ၏သား ကိုဇေသီက လွတ်လပ်သောမွန်သတင်းအေဂျင်စီ IMNA သို့ ပြောသည်။
ဆရာတော်နှင့်အတူ တပည့် ၁၂ ယောက်လိုက်ပါလျက် ပြီးခဲ့သည့် သြဂုတ်လ ၁၂ ရက်နေ့တွင် ရန်ကုန်မြို့မှတဆင့် ဘန်ကောက်မြို့သို့ ဆေးကုသရန် ရောက်ရှိလာခြင်း ဖြစ်သည်။
ကိုဇေသီ က ” ဆရာတော်ဆီကို ပြီးခဲ့တဲ့အပတ်က ရေးမြို့ ကအပြန် အဖေဝင်ဖူးခဲ့တယ်။ ဆရာတော်ရဲ့ အသည်းမှာ အနာရှိတာ သိတော့ ဒီအတိုင်းထားရင် မဖြစ်နိုင်တော့ဘူး၊ ဒါကြောင့် Bangkok ကို ဆေးကုဖို့ပင့်ခဲ့တယ်” ဟု ပြောသည်။
ဝင်းစိန်တောရ ဗျိုင်းနှစ်ကောင်ဆရာတော်(ခေါ်) ကျောက်တစ်လုံးဆရာတော်၏ သက်တော် ၉၃ နှစ်ပြည့် မွေးနေ့အထိမ်းအမှတ်မင်္ဂလာပွဲတော်ကြီးအား ပြီးခဲ့သည့် ဇန်နဝါရီလ ၂၄ မှ ၃ ရက်တိုင်တိုင် စည်းကားသိုက်မြိုက်စွာ ကျင်းပကြောင်း သိရသည်။
