လယီထော – လာမည့် ၂၀၁၄ ခုနှစ်တွင် မွန်အမျိုးသားဒီမိုကရေစီအဖွဲ့နှင့် မွန်ဒေသလုံးဆိုင်ရာ ဒီမိုကရေစီပါတီတို့ တစ်ပါတီအဖြစ်ပေါင်းစည်းသွားရန် အချက် (၄)ချက်ပါ နှစ်ဖက်သဘောတူညီချက်လက်မှတ် ရေးထိုးခဲ့ကြသည်ဟု ပါတီခေါင်းဆောင်တို့က ပြောသည်။
အစည်းအဝေးတွင် နှစ်ဖက်ပါတီခေါင်းဆောင်များ၊ မွန်ပြည်သစ်ပါတီကိုယ်စားလှယ်များ၊ သံဃာတော်များနှင့် စိတ်ဝင်စားသူပရိသာတ်ပေါင်း ၂၀၀ ခန့် တက်ရောက်ခဲ့ကြသည်ဟု အစည်းအဝေးပွဲဖြစ်မြောက်ရေး ဦးဆောင်သူ မွန်ဆရာတော် ခေမာနန္ဒက မိန့်သည်။
၎င်းက “တစ်ပါတီပူးပေါင်းဖို့အတွက် နှစ်ဦးနှစ်ဖက် မနေ့ကသဘောတူလိုက်ပါပြီ” ဟု ပြောသည်။
မွန်ဒေသလုံးဆိုင်ရာဒီမိုကရေစီပါတီ ဥက္ကဌနိုင်ငွေသိန်းက “မွန်နှစ်ပါတီက ၂၀၁၄ ခုနှစ် ဒီဇင်ဘာလကျမှ ပေါင်းကြမယ်ဆိုတော့ ၂၀၁၅ ခုနှစ် ရွေးကောက်ပွဲအတွက် နောက်ကျမှာကို ကျနော်စိုးရိမ်မိတယ်” ဟု ပြောသည်။
“ရည်ရွယ်ချက်ကတော့နှစ်ပါတီပေါင်းစည်းဖို့ အစည်းအဝေးပုံစံနဲ့ ခေါ်တာပါဘဲ၊ နောက် ဟိုရောက်တာအခါကျတော့ ပါတီတစ်ခုကနေ တစ်ခြားတစ်ပါတီတစ်ခုကို ဝင်တဲ့ပုံစံလိုဖြစ်သွားတယ်၊ ဒါလဲဘဲ အသစ်အဆန်းမဟုတ်ပါဘူး ဒီသုံးလကျော် ဆွေးနွေးတဲ့ကာလမှာလဲ သူတို့ဘက်(AMDP)က ဒီအတိုင်းပဲရပ်တည်ခဲ့တယ်” ဟု မွန်အမျိုးသားဒီမိုကရေစီအဖွဲ့မှ အတွင်းရေးမှူး ဒေါက်တာမင်းစိုးလင်းက ပြောသည်။
ထို့ကြောင့် မွန်အမျိုးသားဒီမိုကရေစီအဖွဲ့အနေဖြင့် မွန်ဒီမိုကရေစီပါတီ(Mon Democratic Party) ပါတီမှတ်ပုံတင်ရန် စီစဉ်နေသည်ဟု ဒေါက်တာမင်းစိုးလင်းက ပြောသည်။
နှစ်ပါတီပေါင်းစည်းနိုင်ရေးအတွက် ဇန်နဝါရီလ ၂၂ ရက်နေ့တွင် မွန်ဆရာတော်များချမှတ်ခဲ့သည့် မူသုံးရပ်ရှိကြောင်း ၎င်းတို့မှာ ကြားနာမည်တစ်ခုအသုံးပြုရမည်၊ မွန်တစ်ပါတီတည်းဖြစ်ရမည်၊ အမြန်ဆုံးပေါင်းစည်းရမည် ဖြစ်သည်။
