စစ်ကော်မရှင် ရွေးကောက်ပွဲတွင် ဆန္ဒမဲပေးပိုင်းခွင့်ရှိသူအားလုံး မဲပေးခွင့်မဆုံးရှုံးစေရေးနှင့် လွတ်လပ်စွာမဲပေးခွင့်ရှိစေရေးအတွက် ပုဒ်မ ၅၀၅-က ဖြင့် အကျဉ်းထောင်၊ အချုပ်ခန်းအသီးသီးတွင် ပြစ်ဒဏ်ကျခံနေသော အကျဉ်းသား/သူများအပါအဝင် တရားစွဲဆိုခံရသူ စုစုပေါင်း ၈၆၆၅ ဦးကို လွတ်ငြိမ်းခွင်ပြုလိုက်ကြောင်း သိရသည်။
ယနေ့စက်တင်ဘာ ၂၆ ရက်နေ့ ရက်စွဲဖြင့် စစ်ကော်မရှင်မှ ပြစ်ဒဏ်လွတ်ငြိမ်းခွင့်အမိန့်၊ ပြစ်ဒဏ်လွတ်ငြိမ်း သက်သာခွင့်အမိန့်နှင့် ရာဇသတ်ကြီးပုဒ်မ ၅၀၅-က ဖြင့် ကြားနာစစ်ဆေးဆဲအမှုများ ပိတ်သိမ်းခြင်းတို့ကို ယနေ့ည ၈ နာရီသတင်းတွင် ထုတ်ပြန်လိုက်ခြင်း ဖြစ်သည်။
ပြစ်ဒဏ်လွတ်ငြိမ်းခွင့်အမိန့်အရ ပုဒ်မ ၅၀၅-က ဖြင့် အကျဉ်းထောင်၊ အချုပ်ခန်းအသီးသီးတွင် ပြစ်ဒဏ်ကျခံနေသော အကျဉ်းသား/အကျဉ်းသူ ၇၂၄ ဦးကို ＂ပြစ်မှုထပ်မံကျူးလွန်ပါက ၎င်းပြစ်ဒဏ်အပြင် ယခုကျခံရန်ရှိသော ပြစ်ဒဏ်များပါ ဆက်လက်ကျခံရမည်＂ဟူသည့် စည်းကမ်းချက်ဖြင့် လွတ်ငြိမ်းခွင့်ပြုကြောင်း ကြေညာသည်။
ပြစ်ဒဏ်လွတ်ငြိမ်း သက်သာခွင့်အမိန့်အရ ပုဒ်မ ၅၀၅-ကဖြင့် ပြစ်မှုထင်ရှားအစီရင်ခံရပြီး အကျဉ်းထောင်၊ အချုပ်ထောင်၊ အကျဉ်းစခန်းအသီးသီးတွင် ပြစ်ဒဏ်ကျခံရန် ကျန်ရှိသော ပြစ်ဒဏ်များအပေါ် လျော့ပေါ့၍ ပြစ်ဒဏ်လွတ်ငြိမ်းခွင့်ပြုလိုက်ကြောင်း ကြေညာသည်။
၎င်းအပြင် ပုဒ်မ ၅၀၅-က ဖြင့်လည်းကောင်း၊ ယင်းပြစ်မှုဖြင့် ထွက်ပြေးတိမ်းရှောင်နေသဖြင့် ရာဇဝတ်ကျင့်ထုံးဥပဒေ ပုဒ်မ ၅၁၂ ဖြင့်လည်ကောင်း တရားစွဲဆိုခံရသူ ၅၅၈၀ ဦးတို့၏ ကြားနာစစ်ဆေးဆဲအမှုများကို ပိတ်သိမ်း၍ အမှုမှလွှတ်ရန် ကြေညာခဲ့သည်။
သို့သော် စစ်ကော်မရှင်မှ မည်သည့်အကျဉ်းထောင်၊ အချုပ်ထောင်မှ အကျဉ်းသား/အကျဉ်းသူများ ပါဝင်သည်ကို ကြေညာထားခြင်းမရှိသေးပေ။
စစ်အာဏာသိမ်းပြီးနောက် နိုင်ငံတစ်ဝှမ်းတွင် ဖမ်းဆီးခံထားရသူ ၃၀၀၀၀ သောင်းကျော်ရှိပြီး ထိုအထဲမှ ၂၂၇၀၈ ဦး အကျဉ်းထောင်၊အချုပ်ခန်းများထဲတွင် ထိန်းသိမ်းခံထားရသည်ဟု နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ နေစဉ်ထုတ်ပြန်ချက် အချက်အလက်များအရ သိရသည်။
