မွန်ပြည်ပါတီလက်အောက်ရှိ မွန်အမျိုးသားကျန်မာရေးကော်မတီ MNHC (ဗဟို) မှ ဦးဆောင်ပြီး အခြေခံဓာတ်ခွဲသင်တန်းကျောင်း အပတ်စဉ် (၁၀) ကို ဖွင့်လှစ်သွားရန်ရှိသည်ဟု MNHC ၏ ထုတ်ပြန်ချက်အရ သိရသည်။
အခြေခံဓာတ်ခွဲသင်တန်းကျောင်း( Basic Laboratory Training ) အပတ်စဉ် (၁၀)ကို လာမည့်အောက်တိုဘာလတွင် ဖွင့်လှစ်သွားမည်ဖြစ်ပြီး စိတ်ဝင်စားသူအနေဖြင့် လျှောက်ထားနိုင်ကြောင်း ထုတ်ပြန်ချက်တွင် ဖော်ပြထားသည်။
လျှောက်ထားလိုသူများသည် ပညာအရည်အချင်းအားဖြင့် အနည်းဆုံး ၁၀ တန်း စနစ်ဟောင်း(သို့) စနစ်သစ် Grade-11 အထိရှိထားရမည့်အပြင် အခြေခံအင်္ဂလိပ်စာကိုလည်း အထိုက်အလျောက် တတ်မြောက်သူဖြစ်ရမည်ဖြစ်ပြီး မွန်၊ မြန်မာစာကို ရေးတတ်၊ ဖတ်တတ်နိုင်ရန် လိုအပ်ကြောင်းလည်း ဆိုသည်။
“ကျောင်းက ၃လ တက်ရမယ်လို့ပြောထားပေမယ့်လည်း တကယ်သင်တဲ့အခါမှာ ၄ လ ၅ လ လောက် အချိန်ယူရတယ်။ ပြီးခဲ့နှစ်ကျောင်းသားတွေက ပညာအရည်အချင်းနဲ့ပတ်သက်ပြီး လျှော့ပေးထားတော့ ကျောင်းသားတွေအပေါ်မှာလည်းမူတည်တယ်လေ၊ အဲ့ဒါကြောင့် အခုရွေးချယ်တဲ့အခါမှာ ပညာအရည် အချင်းအနည်းငယ်မြှင့်ထားတယ်။ ပညာအရည်းအချင်းပြန်မြှင့်လိုက်တာက စာတွေလည်း လိုက်နိုင်အောင်ပေါ့လေ”ဟု မွန်အမျိုးသားကျန်းမာရေးဌာနမှ တာဝန်ရှိသူတစ်ဦးက ပြောသည်။
အခြေခံဓာတ်ခွဲသင်တန်းကျောင်းကို မွန်အမျိုးသားကျန်းမာရေးကော်မတီမှ ၃ နှစ် တစ်ကြိမ် ဖွင့်လှစ်လေ့ရှိပြီး အပတ်စဉ်တစ်ခုလျှင် ကျောင်းသားအရေအတွက် ပျမ်းမျှ ၂၀ ဝန်းကျင်ခန့် လက်ခံသင်ကြားပေးနေသည်။
မွန်အမျိုးသားကျန်းမာရေးကော်မတီ MNHC မှ ရေးချောင်းဖျားဒေသရှိ ဗဟိုဌာနချုပ်နှင့် အနီးဝန်းကျင်ရှိ ပနန်းပုံဆေးရုံတို့တွင် ခေတ်မီစက်ကိရိယာ၊ဓာတ်ခွဲခန်းများဖြင့် အဆင့်မြှင့်ကျန်းမာရေး ဝန်ဆောင်မှု မပေးနိုင်ခင်ကပင် အခြေခံဓာတ်ခွဲသင်တန်းကို ၃ နှစ် တစ်ကြိမ်ဖွင့်လှစ်လာခဲ့သည်ဟု သိရသည်။
အခြေခံဓာတ်ခွဲသင်တန်းကျောင်း၏ အပတ်စဉ် ၉ အထိကို ပနန်းပုံဆေးရုံတွင် သင်ကြားပို့ချပေးခဲ့သော်လည်း ယခုနှစ်တွင် နေရာအပြောင်းလဲရှိနိုင်ကြောင်း အထက်ပါသူက ဆက်ပြောသည်။
“ခါတိုင်းဖွင့်တဲ့ ကျောင်းက ပနန်းပုံမှာပဲ သင်ပေးနေတာ။ အဲ့မှာက လက်တွေ့ရော၊ စက်တွေနဲ့ရော သင်ပေးနေတယ်။ ဒီနှစ်တော့ အခြေအနေပေါ်မူတည်ပြီး ၂ နေရာ ယာထားတယ်။ အဓိက မီးကဘယ်နေရာမှာပိုအဆင်ပြေလဲ၊ ဆရာ/ဆရာမတွေလည်း သွားလာလို့လွယ်အောင် ဝယ်ဇင် မဟုတ်ရင် ပနန်းပုံပေါ့။ ဟိုမှာ မီးအဆင်မပြေရင်တော့ ပနန်းပုံမှာပဲ ပြန်ဖွင့်ရမယ်” ဟု ၎င်းက ဆိုသည်။
သင်တန်းကို စိတ်ဝင်စားလိုသူများသည် နီးစပ်ရာ ကျန်းမာရေးဌာနရုံးအသီးသီးတို့တွင် ဇူလိုင်လ ၃၀ ရက်နေ့နောက်ဆုံး ထားကာ လူကိုယ်တိုင် အင်တာဗျူးလာရောက်ဖြေဆိုနိုင်ပြီး မိဘ(သို့) အုပ်ချုပ်သူ တစ်ဦးဦးလိုက်ပါလာရမည်ဖြစ်ကြောင်း သိရသည်။
အင်တာဗျူးဖြေဆိုပြီးနောက် ရွေးချယ်ခံရသည့်သူများသည် အဆိုပါသင်တန်းကျောင်းကို ( ၃ )လကြာ တက်ရောက်ရမည့်အပြင် ကျောင်းပြီးပါကလည်း မွန်အမျိုးသားကျန်းမာရေးဌာနတွင် ၃ နှစ်သာ တာဝန်ထမ်းဆောင်ရမည်ဟု သိရသည်။
တာဝန်ထမ်းဆောင်ပြီးပါက မွန်အမျိုးသားကျန်းမာရေးကော်မတီ MNHC မှ ဖွင့်လှစ်နေသည့် အခြေခံဆေးသင်တန်းကျောင်းတွင်လည်း တက်ရောက်နိုင်ခွင့်ရှိသည်ဟု ထုတ်ပြန်ချက်တွင် ရေးသားထားသည်။
မွန်အမျိုးသားကျန်းမာရေးကော်မတီ MNHC အနေဖြင့် လက်ရှိတွင် မွန်ပြည်သစ်ပါတီ ထိန်းချုပ်ရာ နယ်မြေနှင့် အခြားမွန်ဒေသတို့တွင် ဆေးရုံ ၂၀ နှင့် ကျန်းမာရေးဆေးပေးခန်း ( ၁၈ )ခု၊ ကျန်းမာရေးဝန်ထမ်းနှင့် ရုံးဝန်ထမ်း စုစုပေါင်း ( ၁၃၀ )ကျော်ဖြင့် လည်ပတ်လျက်ရှိကြောင်း သိရသည်။
