မွန်သတင်းအေဂျင်စီ (၂၁ ဇွန် ၂၀၂၁)
မော်လမြိုင် မောင်ငံရပ်ကွက် ကျောက်မီးသွေးရုံမီးပွိုင့်အနီးတွင် ယမန်နေ့ညပိုင်းအချိန်က စစ်ကောင်စီလုံခြုံရေးတပ်ဖွဲ့၏ပစ်ခတ်မှုကြောင့် ဆိုင်ကယ်စီးလူငယ် ၂ ဦး ပွဲချင်းပီးသေဆုံးခဲ့ကြောင်း သတင်းရရှိသည်။
ဘီလူးကျွန်း-ချောင်းဆုံမြို့နယ် အဘစ်ကျေးရွာသား ကိုမိုးဇော်ဦးနှင့် ကိုဇော်မင်းဦးတို့ (၂) ဦး ရွာသို့ မော်တော်ဆိုင်ကယ်တစ်စီးဖြင့်ပြန်လာစဉ် ယမန်နေ့ည ၈ နာရီအချိန်ခန့်က ကျောက်မီးသွေးရုံမီးပွိုင့်အနီး ပစ်ခတ်ခံရသဖြင့် သေဆုံးခဲ့ခြင်းဖြစ်ကြောင်း မော်လမြိုင်မြို့ပေါ်မှ လူမှုကယ်ဆယ်ရေးအသင်းဝင်တစ်ဦးက ပြောသည်။
“မီးပွိုင့်ထိပ်မှာ ဆိုင်ကယ်တွေကိုတားစစ်တာ ဆိုင်ကယ်က ရပ်မပေးလို့သေနတ်နဲ့ပစ်ထည့်လိုက်တာလို့ ပြောကြတယ်၊ အလောင်းကို လမ်းမအလယ်မှာပစ်ထားတာ၊ ကျနော်တို့ ပရဟိတအဖွဲ့က သွားကောက်တာတောင် ကားကို အသံပိတ်၊ အပေါ်က မီးတန်းပဲ ဖွင့်ခိုင်းတယ်၊ ရင်ခွဲရုံကို ချက်ချင်းပို့လိုက်တယ်” ဟု ၎င်းက ဆိုသည်။
သေဆုံးသူလူငယ် (၂) ၏ ကြွင်းကျန်ရုပ်အလောင်းကို အဘစ်ကျေးရွာသုသာန်၌ ယနေ့မွန်းလွဲပိုင်းအချိန်တွင် ကာယကံရှင်မိသားစုဝင်နှင့် ရွာသားများက မြှုပ်နှံသဂြိုလ်ခဲ့သည်။
သို့ရာတွင် ယင်းဖြစ်စဉ်နှင့်ပတ်သက်၍ စစ်ကောင်စီ၏ မြဝတီသတင်းစဉ်က ကျောက်မီးသွေးလမ်းဆုံမီးပွိုင့်၌ လုံခြုံရေးတပ်ဖွဲ့ဝင်များက ယာဉ်စစ်ဆေးခြင်းများ ဆောင်ရွက်နေစဉ် အကြမ်းဖက်သူအမျိုးသား ၂ ဦးမောင်းနှင်လာသည့် ဆိုင်ကယ် ၁ စီးရောက်ရှိလာပြီး လုံခြုံရေးတပ်ဖွဲ့ဝင်တစ်ဦးအား ဝင်တိုက်ကာ ကိုင်ဆောင်သော ၃၈ ဘို့ သေနတ်အား လုယူ၍ ထွက်ပြေးရန်ပြုလုပ်စဉ် အခြားလုံခြုံရေးတပ်ဖွဲ့ဝင်တစ်ဦးမှ ခြောက်လှန့်ပစ်ခတ် ဖမ်းဆီးခဲ့ရာ အဆိုပါအကြမ်းဖက်သူ ၂ ဦး၏ ရင်ဘတ်နှင့် နောက်ကျောတို့ ထိမှန်ဒဏ်ရာများဖြင့် အသေဖမ်းဆီးရမိခဲ့ပြီး ဆိုင်ကယ်ဖြင့် အတိုက်ခံရသော လုံခြုံရေးတပ်ဖွဲ့တစ်ဦးသည် ဒဏ်ရာအနည်းငယ်ရရှိခဲ့သဖြင့် မော်လမြိုင်ဆေးရုံကြီးသို့ ပို့ဆောင်ဆေးကုသမှုခံယူစေလျက်ရှိသည်ဟု သတင်းဖော်ပြခဲ့သည်။
မော်လမြိုင်မြို့နယ်တွင် ည ၁၀ နာရီမှ နံနက် ၄ နာရီအထိ ပုဒ်မ (၁၄၄) ညမထွက်ရ အမိန့်ထုတ်ပြန်ထားဆဲဖြစ်ကြောင်း၊ ညမထွက်ရအမိန့် ထုတ်ပြန်ထားသည့်ကာလအတွင်း စစ်အာဏာရှင်ဆန့်ကျင်ရေးလှုပ်ရှားမှုများ တွင် ၈ ဦးအထိအသက်ဆုံးရှုံးခဲ့ပြီး ဖမ်းဆီးခံထားရသူ ၃၀၀ ကျော်ရှိကြောင်း သိရသည်။
