စန္ဒာဉာဏ် (မော်လမြိုင်၊ အောက်တိုဘာ ၃)
ပြည်နယ်နှင့် တိုင်းဒေသကြီးအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ JMC-S တွင် မွန်ပြည်သစ်ပါတီ မပါဝင်သေးသော်လည်း ပဋိပက္ခကိစ္စရပ်များဖြစ်ပေါ်လာပါက ဆက်ဆံရေးရုံးများမှတစ်ဆင့် ဖြေရှင်းနေရကြောင်း NMSP ပြည်တွင်းရေးရာဌာနကြီးတာဝန်ခံက ပြောသည်။
မွန်ပြည်သစ်ပါတီသည် တစ်နိုင်ငံလုံပစ်ခတ်တိုက်ခိုက်မှုရပ်စဲရေးသဘောတူစာချုပ် NCA လက်မှတ်ရေးထိုးခဲ့သည်မှာ ၂ နှစ်ခန့်ရှိပြီဖြစ်သော်လည်း ကရင်ပြည်နယ်နှင့် တနင်္သာရီတိုင်း JMC-S တို့တွင် ပါဝင်ခွင့်ရမှသာ JMC-S မွန်တွင်ပါဝင်မည်ဟု ဆုံးဖြတ်ထားသောကြောင့် တစ်ဆို့နေရခြင်းဖြစ်သည်။
ပြည်တွင်းရေးရာဌာနကြီးတာဝန်ခံ နိုင်ဝင်းလှက “အပစ်အခတ်ရပ်စဲရေးကိစ္စတွေ ပဋိပက္ခဖြစ်ပေါ်လာရင် JMC-S အစည်းအဝေးမှာတော့ မပါရဘူးပေါ့၊ အဲဒီအတွက် အခက်အခဲကြီးကြီးမားမားတော့ မရှိပါဘူး။ မွန်ပြည်သစ်ပါတီက ဟိုးအရင် အပစ်အခတ်ရပ်စဲပြီးကတည်းက ဆက်ဆံရေးရုံးတွေ ဖွင့်ထားတာရှိတယ်၊ ဒီဆက်ဆံရေးရုံးတွေကနေ ဒီအလုပ်တွေကို လုပ်နိုင်တာပဲ” ဟု ပြောသည်။
နိုင်ငံတော်ငြိမ်ဝပ်ပိပြားမှုတည်ဆောက်ရေးအဖွဲ့ SLORC လက်ထက် ၁၉၉၅ ခုနှစ်ကတည်းက မွန်ပြည်သစ်ပါတီ အပစ်ရပ်စဲထားပြီးနောက် ကရင်ပြည်နယ်တွင် တပ်ရင်း ၃ ရင်းနှင့် တနင်္သာရီတိုင်းတွင် တပ်ရင်း ၂ ရင်း အခြေစိုက်လှုပ်ရှားခွင့် ရှိခဲ့သည်။
ထို့အတူ မွန်ပြည်သစ်ပါတီအနေဖြင့် တနင်္သာရီတိုင်း ရေဖြူမြို့နယ်၊ ကရင်ပြည်နယ် ဘုရားသုံးဆူမြို့၊ မွန်ပြည်နယ်တွင် ရေး၊ သံဖြူဇရပ်၊ မုဒုံနှင့် မော်လမြိုင်မြို့တို့တွင် ဆက်ဆံရေးရုံးများ တရားဝင်ဖွင့်လှစ်ထားကြောင်း တွေ့ရှိရသည်။
သို့ရာတွင် NCA လက်မှတ်ထိုးထားသော KNU ကရင်အမျိုးသားအစည်းအရုံးနှင့် RCSS သျှမ်းပြည်ပြန်လည်ထူထောင်ရေးကောင်စီတို့မှ တရားဝင် ငြိမ်းချမ်းရေးဆွေးနွေးပွဲများရပ်နားခဲ့သဖြင့် JMC-U ပြည်ထောင်စုအဆင့်နှင့် ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ UPDJC တို့တွင် တရားဝင်အစည်းအဝေးများ ခေတ္တရပ်ဆိုင်းနေသည့်အတွက် ငြိမ်းချမ်းရေးလုပ်ငန်းစဉ်အချို့ နှောင့်နှေးနေရကြောင်း JMC-S မွန်၏ အရပ်သားကိုယ်စားလှယ် မိယဉ်ချမ်းက ပြောသည်။
“ခေတ္တရပ်ဆိုင်းထားတဲ့ အနေအထားဖြစ်နေတဲ့အခါကျတော့ အချို့အချို့လုပ်ငန်းစဉ်တွေက လုပ်ရတာ နည်းနည်းလေးနှောင့်နှေးတယ် အကယ်၍ ဒီပြည်နယ်မှာ (JMC-S,Mon) မှာပါဝင်လာမယ်ဆိုရင် အစည်းအဝေးတွေလည်း ပြန်စနိုင်ရင် အချို့ချို့သောဟာတွေက ကျွန်မတို့ ပေါင်းစပ်ရတာ မြန်ဆန်တယ်ပေါ့ JMC-S မှာ မပါပေမယ့်လည်း သက်ဆိုင်ရာ ဆက်ဆံရေးရုံးတွေနဲ့ ကျွန်မတို့အဖွဲ့က ချိတ်ဆက်ပြီးတော့ ဖြေရှင်းနေတာတော့ ရှိပါတယ်” ဟု ၎င်းက ဆက်ပြောသည်။
လက်ရှိ JMC-S, Mon တွင် အစိုးရကိုယ်စားလှယ် ၅ ဦး၊ တိုင်းရင်းသားလက်နက်ကိုင် အဖွဲ့အစည်းကိုယ်စားလှယ် (KNU) ၅ ဦး၊ အရပ်သားကိုယ်စားလှယ် ၄ ဦးသာပါရှိပြီး မွန်ပြည်သစ်ကိုယ်စားလှယ်များ လုံးဝပါဝင်ဆောင်ရွက်ခြင်း မရှိသေးပေ။
