မွန်ဒေသလုံးဆိုင်ရာ စာပေနှင့် ယဉ်ကျေးမှုအဖွဲ့ ဆုပေးပွဲအတွက် မွန်ပြည်နယ် ဝန်ကြီးချုပ် ဒေါက်တာ အေးဇံမှ သိန်း ၄၀ဝ ထောက်ပံ့မည်ဟု ပြောဆိုထားကြောင်း မွန်ပြည်နယ် လွှတ်တော်ဒုတိယဥက္ကဋ္ဌ ဒေါက်တာ အောင်နိုင်ဦးက ပြောသည်။
“ဒီနေ့ပဲ မွန်ဒေသလုံးဆိုင်ရာ စာပေနဲ့ ယဉ်ကျေးမှုအဖွဲ့က ဝန်ကြီးချုပ်နဲ့ တွေ့ဆုံပြီးတော့ ဝန်ကြီးချုပ်က သိန်း ၄၀ဝ ထောက်ပံ့ပေးမယ်လို့ ကတိပေးခဲ့တယ်”ဟု ၎င်းက ပြောသည်။
“အခု ဝန်ကြီးချုပ်ထောက်ပံ့ပေးမယ့် သိန်း ၄၀ဝ ကတော့ လာမယ့် တနင်္လာနေ့မှ ထုတ်လို့ရမယ်၊ ဒီအစိုးရလက်ထက်မှာ ကျတော့ ကျွန်မတို့ မွန်အမျိုးသားနေ့ ဗဟိုနဲ့ အခု မွန်ဒေသလုံးဆိုင်ရာ စာပေနဲ့ ယဉ်ကျေးမှုအဖွဲ့ ဆုပေးပွဲ အတွက် ထောက်ပံ့ပေးခဲ့တယ်။ နောက်နှစ်ဆိုရင်လည်း ကျွန်မတို့ကို ဒီနှစ်ခုအတွက် ထပ်မံကူညီပေးဖို့ ပြောချင်တယ်”ဟု မွန်ဒေသလုံးဆိုင်ရာ စာပေနှင့် ယဉ်ကျေးမှုအဖွဲ့ တွဲဖက်အတွင်းရေးမှူး မိစန္ဒာနွန်က ပြောသည်။
ထို့အပြင် ယခုနှစ် မွန်ဒေသလုံးဆိုင်ရာ စာပေနှင့် ယဉ်ကျေးမှုအဖွဲ့ ဆုပေးပွဲအခမ်းအနားကို ကရင်ပြည်နယ်တွင် ကျင်းပမည် ဖြစ်သောကြောင့် မွန်ဒေသလုံးဆိုင်ရာ စာပေနှင့် ယဉ်ကျေးမှုအဖွဲ့က ကရင်ပြည်နယ် ဝန်ကြီးချုပ်နှင့် ထပ်မံတွေ့ဆုံသွားမည် ဖြစ်ကြောင်း ၎င်းက ဆိုသည်။
မွန်ပြည်နယ်၊ ကျိုက်မရောမြို့နယ်၊ ဖေဖော်ဝါရီလ ၁၂ ရက်နေ့တွင် ကျင်းပခဲ့သည့် အကြိမ် ၇၀ မြောက် မွန်အမျိုးသားနေ့(ဗဟို) အခမ်းအနားအတွက် မွန်ပြည်နယ်အစိုးရအဖွဲ့က သိန်း ၁၅၀ ထောက်ပံ့ခဲ့ပြီး ဖြစ်သည်။
မွန်ဒေသလုံးဆိုင်ရာ စာပေနှင့် ယဉ်ကျေးမှုအဖွဲ့သည် ၁၈ မြို့နယ်ကို အခြေခံထားပြီး ဆုပေးပွဲကို တစ်နှစ်လျှင် တစ်မြို့နယ်ကျင်းပမည်ဖြစ်ကာ ယခုနှစ်တွင် ကရင်ပြည်နယ်၊ ကော့ကရိတ်မြို့နယ်၊ မင်းရွာတွင် အလှည့်ကျကျင်းပမည်ဖြစ်သည်။
အလားတူ ယခုနှစ် ပြည်နယ်အဆင့် ကရင်စာပေနှင့် ယဉ်ကျေးမှု စုပေါင်းသင်တန်းဆင်းပွဲ အခမ်းအနားအတွက် မွန်ပြည်နယ်အစိုးရမှ ကျပ်သိန်း ၆၀ဝ ထောက်ပံ့ခဲ့သည်ဟု သိရသည်။
