မွန်ပြည်နယ်တွင် တာဝန်ထမ်းဆောင်လျက်ရှိသော ဆရာ/ဆရာမများအား ရာထူးတိုးမြှင့် ပြောင်းရွေ့ရန် အခက်အခဲရှိနေကြောင်း ပြည်နယ် ပညာရေးမှူးရုံး ညွှန်ကြားရေးမှူး ဦးမျိုးတင့်အောင်မှ သိရသည်။
“ဆရာတို့ပြည်နယ်က ဆရာမတွေအတွက် တိုးဖို့၊ ပြောင်းဖို့ အခွင့်အလမ်းအရမ်းနည်းတယ်၊ ဘာလို့လဲဆိုတော့ တိုး/ပြောင်းဖို့ နေရာမရှိလို့၊ အခြားပြည်နယ်တွေမှာကျတော့ လစ်လပ်တဲ့နေရာတွေများတော့ မူလတန်းဖြစ်ဖြစ်၊ အလယ်တန်းပြဖြစ်ဖြစ် လုပ်သက် (၂) နှစ်ဆို တိုးခွင့်ရပြီး ဆရာတို့မှာကျ အနည်းဆုံး လုပ်သက် (၇) နှစ်ရှိရတယ်၊ ဒါတောင် နေရာမရွေးမှ ရမှာ” ဟု ဦးမျိုးတင့်အောင်က ပြောသည်။
“ကိုယ့်ဇာတိမှာ ပြန်သင်ချင်လို့ မုဒုံကိုလျှောက်တာပါ၊ မုဒုံမြို့နယ် ဘယ်ကျောင်းမဆို ရပါတယ်၊ ခါတိုင်းနှစ်သူများတွေ လျှောက်နေတာ သိပ်မရကြဘူးဆိုတာလည်း ကြားပါတယ်၊ ဒါမဲ့ ကိုယ်ကတော့ ရမလားဆိုပြီး လျှောက်ကြည့်တာပေါ့” ဟု (၂၀၁၇-၁၈) ပညာသင်နှစ်အတွက် ရာထူးတိုး/ပြောင်း လျှောက်ထားသူ ဆရာမဒေါ် ဆုမြတ်ရည် ကပြောသည်။
ရေးမြို့နယ် ဖားကြီးကျေးရွာရှိ မူလတန်းကျောင်း KG တန်းပြမှ မုဒုံမြို့နယ်ရှိ အလယ်တန်းပြ သို့ ရာထူးတိုး/ပြောင်း လျှောက်ထားကြောင်း၊ လာမည့် ဖေဖော်ဝါရီလတွင် လုပ်သက် (၃) နှစ် ပြည့်တော့မည်ဖြစ်ကြောင်း ၄င်းကဆက်လက်ပြောသည်။
၂၀၁၇-၁၈ ပညာသင်နှစ်အတွက် ဇန်နဝါရီ (၁၀) ရက်နေ့ကစပြီး အခြေခံပညာဦးစီးဋ္ဌာန မွန်ပြည်နယ်ပညာရေးမှူးရုံး အောက်ရှိ ဝန်ထမ်းများ၏ အပြောင်း/အတိုး လျှောက်လွှာများ စတင်ခေါ်ယူနေကြောင်း သိရသည်။
မွန်ပြည်နယ် ပညာရေးမှူးရုံး၏ (၂၀၁၆) ဒီဇင်ဘာလ စာရင်းချုပ်အရ ကျောင်းဆရာ/ဆရာမ ပေါင်း ( ၁၅,၅၄၅) ဦးရှိပြီး၊ ၂၀၁၆ ပညာသင်နှစ်အတွက် အထက်ပြလျှောက်ထားသော ဆရာ/ဆရာမ ( ၃၃၄) ဦးအနက် (၁၁၀) ဦး ပြောင်းခွင့်ရရှိခဲ့ပြီး၊ အလယ်ပြ/မူအုပ်မှ အထက်တန်းပြအတိုး လျှောက်ထားသော ဆရာ/မ (၁၃၃) ဦးအထဲမှ (၇၆) ဦး ရာထူးတိုးခွင့် ရရှိခဲ့ကြောင်း သိရသည်။
