ထိုင်းကျန်းမာရေးဝန်ကြီးဌာန ရောဂါထိန်းချုပ်ရေးဦးစီးဌာန၏ ထုတ်ပြန်ချက်အရ ထိုင်းနိုင်ငံတွင် ဇွန်လမှစ၍ မျောက်ကျောက်ရောဂါ (Mpox) ကူးစက်မှုအသစ်များနှင့် ကိုဗစ်-၁၉ (Covid-19) ရောဂါဖြစ်ပွားမှုများ ဆက်လက်မြင့်တက်လျက်ရှိကြောင်း သိရသည်။
Covid-19 ၌ ရောဂါကူးစက်ခံရမှုတွင် သေဆုံးမှုနှုန်း နည်းပါးသော်လည်း Mpox တွင် ပိုမိုပြင်းထန်သော ဗီဇပြောင်းမျိုးစိတ် ပါဝင်နေသည်ဟု ကျန်းမာရေးဌာနမှ ဆိုသည်။
ရောဂါထိန်းချုပ်ရေးဦးစီးဌာန ညွှန်ကြားရေးမှူးချုပ် ဒေါက်တာ မွန်တီယန် ခါနာဆာဝပ် (Dr Montien Kanasawat) က ဇန်နဝါရီ ၁ ရက်မှ ဩဂုတ် ၂၃ ရက်အထိ ထိုင်းနိုင်ငံတွင် Mpox ကူးစက်ခံရသူ ၂၅၄ ဦးရှိကြောင်း ဧပြီလတွင် ပြောကြားခဲ့သည်။
Mpox အခြေအနေမှာ ထိန်းချုပ်နိုင်ဆဲဖြစ်သော်လည်း ကိုယ်ခံအားနည်းသူများတွင် ပိုမိုပြင်းထန်သော Clade Ib မျိုးစိတ် ကူးစက်မှု အရေအတွက်မှာ မြင့်တက်နေကြောင်း ဒေါက်တာ မွန်တီယန်က ဆိုသည်။
ဘန်ကောက်မြို့ပြဧရိယာ၊ မြို့ကြီးများနှင့် ခရီးသွားဧရိယာပြည်နယ်များတွင် ကူးစက်ခံလူနာများကို ပိုမို တွေ့ရှိရသည့်အပြင် လူထူထပ်ပြီး ပိတ်လှောင်ထားသော နေရာများသို့ သွားရောက်လည်ပတ်ခြင်းနှင့် ဆက်စပ်သည့် လိင်ဆက်ဆံမှုများမှတစ်ဆင့် ကူးစက်ခံနေရသည်။
Covid-19 ကူးစက်မှုနှင့် ပတ်သက်၍ ရောဂါထိန်းချုပ်ရေးဦးစီးဌာန ပြောရေးဆိုခွင့်ရှိသူ ဒေါက်တာ ဂျူရိုင်း ဝေါင်းဆာဝပ် (Dr Jurai Wongsawat) က ဇန်နဝါရီ ၁ ရက်မှ ဩဂုတ် ၃၁ ရက်အထိ ကူးစက်ခံရသူ ၉၉,၀၀၀ ခန့် ရှိကြောင်း ပြောကြားခဲ့သည်။
မိုးရာသီ၏ ရာသီဥတုအခြေအနေကြောင့် ဇွန်လမှစ၍ ကူးစက်မှုများပြားခဲ့သော်လည်း စုစုပေါင်း ကူးစက်မှုအရေအတွက်မှာ လွန်ခဲ့သော ၃ နှစ်တာ ကိန်းဂဏန်းများထက် နည်းပါးကြောင်း မှတ်တမ်းများက ဖော်ပြသည်။
ကာကွယ်ဆေးထိုးနှံခြင်း၊ တစ်ကိုယ်ရေသန့်ရှင်းရေး ဂရုစိုက်ခြင်းနှင့် ရောဂါကူးစက်ခံထားရသူများ သို့မဟုတ် ရောဂါပိုးရှိသော မျက်နှာပြင်များနှင့် နီးကပ်စွာ ထိတွေ့မှုကို ရှောင်ကြဉ်ခြင်းတို့သည် ကိုရိုနာဗိုင်းရပ်စ်နှင့် Mpox နှစ်မျိုးလုံးကို ကာကွယ်ရန် သော့ချက်ဖြစ်သဖြင့် မပျက်မကွက် လိုက်နာရန်လည်း တိုက်တွန်းထားသည်။
