မွန်ပြည်နယ်၊ ရေးမြို့နယ်တွင် ပုဂ္ဂလိကလျှပ်စစ်မီးကုမ္ပဏီအချို့ ကြိုတင်အသိပေးခြင်းမရှိဘဲ မီတာခတစ်ယူနစ် ၇၅၀၀ ကျပ်အထိ ကောက်ခံနေသဖြင့် သုံးစွဲသူများ ငွေကြေးနစ်နာမှုရှိနေကြောင်း ရေးဒေသခံများက ပြောသည်။
စက်သုံးဆီဝယ်ယူရရှိမှုအပေါ်မူတည်၍ ရေးမြို့နယ်မြောက်ပိုင်းတွင် လျှပ်စစ်ဓာတ်အားဖြန့်ဖြူးပေးနေသည့် SMD ကုမ္ပဏီနှင့် NYEDS ကုမ္ပဏီမှ မတ်လအတွင်း အသုံးပြုထားသည့် ဓာတ်အားခများကို ၃၈၀၀ ကျပ်သို့ ပြောင်းလဲကောက်ခံမည့်အပြင် လျှပ်စစ်မီးထုတ်လွှင့်ချိန်ကို လျှော့ချသွားမည်ဟု သုံးစွဲသူများသို့ အသိပေးထားသည်။
သို့သော် ကြိုတင်အသိပေးထားခြင်းမရှိသည့် လျှပ်စစ်ကုမ္ပဏီအချို့ မတ်လအတွင်းအသုံးပြုထားသည့် မီတာခများကို တစ်ယူနစ် ၇၅၀၀ နှုန်းဖြင့် ကောက်ခံနေပြီး လျှပ်စစ်ထုတ်လွှင့်ချိန်ကို စိတ်ကြိုက်လျှော့ချထားသဖြင့် နစ်နာမှုရှိနေသည်ဟု ရေးဒေသခံ အမျိုးသမီးတစ်ဦးက ဆိုသည်။
“ပြီးခဲ့တဲ့ မတ်လအတွက်က စက်သုံးဆီဝယ်ဖို့ ခက်ခဲတယ် ဈေးလဲတက်သွားတယ်ဆိုပြီးတော့ မီတာခ တစ်ယူနစ် ၇၀၀၀ ဖြစ်သွားတယ်။ မီးကလဲ မတ်လရဲ့ လတဝက်လောက်က တစ်နေ့ဆို တစ်နာရီ တစ်နာရီခွဲပဲပေးတယ် မီးလာတဲ့အချိန်က နည်းလွန်းတယ် ပြီးရင် ကြိုအသိပေးတာလဲမရှိဘူး အကုန်ဒုက္ခရောက်နေကြတာ။” ဟု သူမက ပြောသည်။
၎င်းအပြင် မီတာခကို ၅ ယူနစ်မှစတင်ကောက်ခံသည့် သတ်မှတ်ချက်ကြောင့်လည်း နေအိမ်တစ်အိမ်လျှင် တစ်လ မီတာခ အနည်းဆုံး ၃၅၀၀၀ ကျပ် ကျသင့်နေရကြောင်း သိရသည်။
စက်သုံးဆီ အခက်အခဲမဖြစ်ခင်က ရေးမြို့နယ်အတွင်း လျှပ်စစ်မီတာခ တစ်ယူနစ် ၂၀၀၀ ကျော်ရှိနေပြီး ယခုတွင် အသုံးပြုသည့် ကုမ္ပဏီအပေါ်မူတည်၍ ၃၈၀၀ ကျပ်မှ ၇၅၀၀ ကျပ်အထိ ပေးဆောင်နေရသည်။
အာယုတောင်ဒေသခံအများစု မီးရရှိချိန် နည်းပါးမှုကြောင့် ငွေကြေးတတ်နိုင်သူဒေသခံများ လျှပ်စစ်မီးအစား ဆိုလာတပ်ဆင် အသုံးပြုသူ များလာနေကြောင်းလည်း သိရသည်။
ရေးဒေသခံ အမျိုးသားတစ်ဦးက “ဒီတလော ပိုက်ဆံရှိတဲ့ နေအိမ်တော်တော်များများက လျှပ်စစ်မီးဖြုတ်ပြီး ဆိုလာတပ်ထားတယ်။ တချို့အိမ်က လျှပ်စစ်မီးရော ဆိုလာရော တပ်ထားတယ် စက်ချုပ်သမားတွေလဲ ဒုက္ခရောက်ကြတာပေါ့ ကျန်တဲ့အလုပ်တွေလဲ အဲ့လိုပဲ ခက်ခဲနေကြတာ အခြေခံလူတန်းစားတွေဆို လျှပ်စစ်မီးမသုံးနိုင်ကြတော့ဘူး တစ်လတစ်လ မီတာခ မနည်းပေးနေရတာ” ဟု ပြောသည်။
ရေးမြို့နယ်အတွင်း SMD ကုမ္ပဏီ၊ မြတ်သူရထွန်းကုမ္ပဏီ အပါအဝင် ပုဂ္ဂလိက ကုမ္ပဏီပေါင်း ၄ ခုထက်မနည်းရှိပြီး ရေးမြောက်ပိုင်းနှင့် တောင်ပိုင်းကျေးရွာများသို့ လျှပ်စစ်မီးဖြန့်ဖြူးပေးနေခြင်း ဖြစ်သည်။
ရေးမှလျှပ်စစ်မီးကုမ္ပဏီများသည် လုပ်ငန်းလည်ပတ်ရန် ပြည်ပမှစက်သုံးဆီကို မှီခိုနေရပြီး သီလဝါဆိပ်ကမ်းရှိ ဆီသိုလှောင်ကန်မှတစ်ဆင့် ဆီသယ်ယာဉ်များဖြင့် သယ်ယူပို့ဆောင်နေရပြီး လက်ရှိစက်သုံးဆီအခက်အခဲကြောင့် လျှပ်စစ်မီးထုတ်လုပ်မှုကိုပါ ထိခိုက်လာနေသည်။
