မွန်ညီညွတ်ရေးပါတီ ပြည်သူ့လွှတ်တော်ကိုယ်စားလှယ်များ စစ်ကော်မရှင်၏ လွှတ်တော်အစည်းအဝေး ပထမရက်သို့ တက်ရောက်နေသည့်မြင်ကွင်း

စစ်ကော်မရှင်၏ ပြည်သူ့လွှတ်တော် အစည်းအဝေး ပထမရက်ကို ယနေ့မတ်လ ၁၆ ရက်နေ့တွင် နေပြည်တော်ရှိ လွှတ်တော်အဆောက်အအုံးဝင်း၌ စတင်ပြုလုပ်ခဲ့ပြီး မွန်ညီညွတ်ရေးပါတီမှ ပြည်သူ့လွှတ်တော်ကိုယ်စားလှယ်များ တက်ရောက်ခဲ့ကြောင်း သိရသည်။

ပြည်သူ့လွှတ်တော်ကိုယ်စားလှယ်အဖြစ် အနိုင်ရရှိထားသည့် မွန်ညီညွတ်ရေးပါတီမှ မင်းစိုးသူ၊ ဦးဗိုလ်ဝင်း၊ မင်းဝဏ္ဏကြီး၊ ဦးသန်းရွှေနှင့် ဒေါ်မြင့်သန်းတို့ ပါဝင်တက်ရောက်ခဲ့ခြင်းဖြစ်သည်။

မွန်ညီညွတ်ရေးပါတီမှ ပြည်သူ့လွှတ်တော်ကိုယ်စားလှယ် ၅ ဦးအပါအဝင် အမျိုးသားလွှတ်တော်ကိုယ်စားလှယ်များ ဖေဖော်ဝါရီ ၈ ရက်နေ့က နေပြည်တော်သို့ရောက်ရှိလာပြီး စစ်ကော်မရှင်၏ မြန်မာ့မျက်နှာစာသစ် ဖိုရမ်သို့လည်း တက်ရောက်ခဲ့သေးသည်။

လွှတ်တော်မစတင်မီ ရက်ပိုင်းကလည်း မွန်ညီညွတ်ရေးပါတီမှ လွှတ်တော်အကြိုအစည်းအဝေးများပြုလုပ်ခဲ့သေးသည်ဟု ပါတီနှင့်နီးစပ်သူတစ်ဦး၏ ပြောပြချက်အရ သိရသည်။

ယနေ့ စစ်ကော်မရှင်၏ ပြည်သူ့လွှတ်တော်အစည်းအဝေး ပထမရက်တွင် ပြည်သူ့လွှတ်တော်ဥက္ကဌနေရာအဖြစ် စစ်တပ်ပါတီဥက္ကဌ ဦးခင်ရီ ရွေးကောက်တင်မြှောက်ထားပြီး ဒုလွှတ်တော်ဥက္ကဌနေရာကို လက်ရှိပြန်ကြားရေးဝန်ကြီး ဦးမောင်မောင်အုံးအား တင်မြှောက်ထားသည်။

၎င်းအပြင် လွှတ်တော်ကိုယ်စားလှယ်များ ကတိသစ္စာပြုခြင်းနှင့် ကတိပြုလွှာအပေါ်လက်မှတ်ထိုးခြင်းအစီအစဉ်များလုပ်ဆောင်ခဲ့ပြီး လွှတ်တော်အစည်းအဝေးပထမရက်ကို ၁၁ နာရီခွဲဝန်းကျင်တွင် ရပ်နားခဲ့သည်။

ယနေ့ ပြည်သူ့လွှတ်တော်အစည်းအဝေးတွင် ကိုယ်စားလှယ်နေရာ ၄၄၀ အနက်တိုက်ရိုက်ရွေးကောက်တင်မြှောက်ထားသည့် ၂၆၃ နေရာမှ ကိုယ်စားလှယ်များနှင့် ကျန် ၁၁၀ နေရာတွင် စစ်ယူနီဖောင်ဝတ်ဆင်ထားသည့် ကိုယ်စားလှယ်များ တက်ရောက်ခဲ့သည်။

ပုံ-popular New