အထွေထွေရွေးကောက်ပွဲနေ့အပါအဝင် ၂ ရက်တာအတွင်း မွန်ပြည်နယ်၊ မုဒုံနှင့် ရေးမြို့နယ်အခြေစိုက် စစ်တပ်စခန်းရှိရာ နေရာ (၅) နေရာကို တိုက်ခိုက်မှုပြုလုပ်ခဲ့ပြီး ရန်သူစစ်တပ်ဘက်မှ ၄ ဦး သေဆုံးကာ ၄ ဦး ဒဏ်ရာရှိခဲ့ကြောင်း NMSP-AD လက်အောက်ခံ ရာမညမွန်တပ်တော် (RMA) က ယနေ့ သတင်းထုတ်ပြန်လိုက်သည်။
ယမန်နေ့ (ဇန်နဝါရီ ၁၁ ရက်) နံနက်ပိုင် ၈ နာရီအချိန်ခန့် ရွေးကောက်ပွဲအပိုင်း (၂) ကျင်းပနေသည့် ရေးမြို့ပေါ်အခြေစိုက် စစ်ဆင်ရေးကွပ်ကဲမှုဌာနချုပ် (စကခ-၁၉) ကို (၁၀၇ မမ) ရှော့တိုက်ဒုံး (၃) လုံးဖြင့်လည်းကောင်း၊ ရေးမြို့နယ် ကလော့ကျေးရွာအနီးရှိ အမတ-၃၁၆ အမြှောက်တပ်ကို (၁၀၇ မမ) ရှော့တိုက်ဒုံး (၂) လုံးဖြင့်လည်းကောင်း ပစ်ခတ်တိုက်ခိုက်ခဲ့ပြီး ရန်သူစစ်တပ်၏ ထိခိုက်သေဆုံးမှု အခြေအနေများကို ဆက်လက်စုံစမ်းနေဆဲဟု RMA က ဆိုသည်။
ထိုအပြင် နံနက်ပိုင်း ၄ နာရီအချိန်ခန့်တွင် ရေးမြို့နယ် အစင်ကျေးရွာထိပ်၌ တပ်စခန်း (ဂိတ်) ချထားသည့် စစ်ကော်မရှင်တပ်ကို RMA ရဲဘော်များက ဝင်ရောက်တိုက်ခိုက်ခဲ့ပြီး ရန်သူဘက်မှ (၃) ဦးသေဆုံးကာ (၁) ဦး ဒဏ်ရာအပြင်းအထန်ရရှိခဲ့သည်ဟု ထုတ်ပြန်ချက်တွင် ဖော်ပြထားသည်။
ယင်းနေ့မှာပင် နံနက်ပိုင်း ၈ နာရီအချိန်ခန့်က မုဒုံမြို့နယ်၊ ကမာဝက်မြို့အခြေစိုက် ခမရ-၂၀၉ တပ်ရင်းကို ဒရုန်းဗုံးသီး (၂) လုံးဖြင့် သွားရောက်ပစ်ခတ်တိုက်ခိုက်ခဲ့ပြီး စစ်တပ်ဘက်မှ အရာရှိ (၁) ဦး သေဆုံးခဲ့ကြောင်း RMA က ဆိုသည်။
အလားတူ ရွေးကောက်ပွဲအပိုင်း (၂) မတိုင်ခင် ဇန်နဝါရီလ ၁၀ ရက် နေ့လည်ပိုင်းအချိန်ခန့်ကလည်း စစ်တပ်ဘက် တာဝန်ရှိသူများ ကမာဝက်မြို့ရှိ မဲရုံများကို ကြည့်ရှုစစ်ဆေးနေစဥ် ဒရုန်းဗုံးသီး (၁) လုံးဖြင့် ပစ်ချခဲ့ပြီး ရန်သူဘက်မှ (၃) ဦးထိခိုက်ဒဏ်ရာရရှိခဲ့သည်ဟု ဖော်ပြထားသည်။
မွန်ပြည်သစ်ပါတီ (စစ်အာဏာရှင်တိုက်ဖျက်ရေး) NMSP-AD သည် လက်ရှိ စစ်ကော်မရှင် ဦးဆောင်ကျင်းပနေသည့် အပိုင်းလိုက်ရွေးကောက်ပွဲကို လက်မခံပဲ ဆန့်ကျင်တိုက်ခိုက်နေသည့် တိုင်းရင်းသားလက်နက်ကိုင်အဖွဲ့အစည်းတစ်ရပ်ဖြစ်သည်။
