မွန်လူငယ်များနေ့ – သဝဏ်လွှာထုတ်ပြန်ချက်များမှ ညီညွတ်ရေး ရှာပုံတော်

ရေးသားသူ – ရတု

မွန်လူငယ်‌အကြောင်း ပြောပါက မွန်လူငယ်ဆုံရပ် (MYF) ကို ချန်လှပ်ထား၍ မရပါ။ ကနဦးအနေဖြင့် မွန်လူငယ်ထု စုစည်းရေးအတွက် အဓိကကျသော ဆုံရပ်တစ်ခုဖြစ်သည့်အပြင် မွန်လူငယ်နေ့ အခမ်းအနားကို ဦးဆောင်ကျင်းပပေးခဲ့သော MYF ၏ ကြိုးပမ်းမှုကို မွန်လူငယ်ထုတရပ်လုံးက အလေးအနက် အသိအမှတ်ပြုရ‌ပေမည်။ အထူးသဖြင့် မွန်လူငယ်မူဝါဒကို ရေးသားနိုင်သည်အထိ လူငယ်အရေးနှင့် ပတ်သက်၍ တစ်ခုတည်းသော မွန်အမျိုးသားအဆင့် ကြိုးပမ်းခဲ့မှုသည် လေးစားဂုဏ်ယူဖွယ်ရာ ဖြစ်ပါသည်။

သို့သော် ဤသို့သော အမျိုးသားအဆင့် ဆောင်ရွက်ချက်များကြားတွင် မေးခွန်းထုတ်စရာ ဝေဖန်ချက်တစ်ခု ရှိနေပါသည်။ မွန်လူငယ်ဆုံရပ် (MYF) ၏ တရားဝင် လူမှုကွန်ရက်စာမျက်နှာတွင် မွန်ညီညွတ်ရေးပါတီ (MUP) နှင့် မွန်ပြည်သစ်ပါတီ (NMSP) တို့၏ သဝဏ်လွှာများကိုသာ ဖော်ပြပြီး၊ လက်ရှိ စစ်ရေးနှင့် နိုင်ငံရေးအရ အရေးပါသော အခန်းကဏ္ဍမှ တော်လှန်နေသည့် အခြားမွန်အဖွဲ့အစည်းများ၏ သဝဏ်လွှာများကို ထိန်ချန်ထားခြင်းသည် ထိုအဖွဲ့အစည်းများကို အသိအမှတ်မပြုခြင်းလော၊ ခွဲခြားခြင်းလော သို့မဟုတ် အလေးမထားခြင်းလော။

ယနေ့ ၂၀၂၅ ခုနှစ်၊ ဒီဇင်ဘာလ ၂၈ ရက်နေ့တွင် ကျရောက်သော (၁၄) ကြိမ်မြောက် မွန်လူငယ်နေ့သည် ၂၀၂၅ ရွေးကောက်ပွဲကျင်းပသည့် နေ့နှင့်လည်း တိုက်ဆိုင်နေသည်။ ယခုနှစ်တွင် မွန်လူငယ်ဆုံရပ် (MYF) အပါအဝင် မွန်ပြည်နယ်အတွင်းရှိ ဩဇာတိက္ကမကြီးမားသော နိုင်ငံရေး၊ စစ်ရေးနှင့် ကျောင်းသားအဖွဲ့အစည်းအသီးသီးမှ သဝဏ်လွှာများနှင့် ထုတ်ပြန်ချက်များ ပေးပို့ခဲ့ကြသည်။ ဤဆောင်းပါးသည် ထိုစာလွှာများပါ အချက်အလက်များကို အခြေခံ၍ မွန်လူငယ်ထု၏ ကဏ္ဍနှင့် ရှေ့ရေးအမြော်အမြင်များကို အနှစ်ချုပ် သုံးသပ်တင်ပြထားခြင်း ဖြစ်သည်။

အဖွဲ့အစည်းအသီးသီး၏ ထုတ်ပြန်ချက် အနှစ်ချုပ်

(၁) မွန်လူငယ်ဆုံရပ် (MYF)

MYF ၏ ထုတ်ပြန်ချက်တွင် ယခုနှစ်၏ဆောင်ပုဒ်ဖြစ်သော “ယနေ့လူငယ်၊ ယနေ့တာဝန်” ကို အခြေခံ၍ မွန်လူငယ်တိုင်းသည် မိမိတို့လူမျိုး၏ အကျိုးစီးပွားကို ရှေးရှုကာ တာဝန်ယူမှု၊ တာဝန်ခံမှုရှိသော ခေါင်းဆောင်မှုပုံစံကို ဖော်ဆောင်ရန် တိုက်တွန်းထားသည်။ လွတ်မြောက်ရေးပန်းတိုင်သို့ ရောက်ရှိရန် လူငယ်ထုတစ်ရပ်လုံး “ထင်းစည်း” ကဲ့သို့ စုစည်းကြရန် အလေးပေး ဖော်ပြထားသည်။

(၂) မွန်ညီညွတ်ရေးပါတီ (MUP)

MUP ၏ သဝဏ်လွှာတွင် မွန်လူငယ်များကို အနာဂတ်၏ “ပဲ့ကိုင်ရှင်” များအဖြစ် ရှုမြင်ထားပြီး၊ နိုင်ငံရေးနှင့် လူမှုရေး ကဏ္ဍစုံတွင် လူငယ်များ တက်ကြွစွာ ပါဝင်လာရန် နှိုးဆော်ထားသည်။ မွန်တစ်မျိုးသားလုံး၏ ကိုယ်ပိုင်ပြဋ္ဌာန်းခွင့်နှင့် အခွင့်အရေးများအတွက် စည်းလုံးမှုကို အရင်းခံကာ ကြိုးပမ်းကြရန် တိုက်တွန်းထားသည်။

(၃) မွန်ပြည်ဖက်ဒရယ်ကောင်စီ (MSFC)

MSFC ၏ သဝဏ်လွှာတွင် မွန်လူငယ်များ၏ စွမ်းရည်၊ သတ္တိနှင့် ဇွဲလုံ့လတို့သည် အမျိုးသားလွတ်မြောက်ရေးအတွက် အစားထိုးမရသော အင်အားစုဖြစ်ကြောင်း အသိအမှတ်ပြုထားသည်။ ဖက်ဒရယ်ဒီမိုကရေစီစနစ် တည်ဆောက်ရေးနှင့် ကိုယ်ပိုင်ပြဋ္ဌာန်းခွင့်ရရှိရေးအတွက် လူငယ်များ၏ အခန်းကဏ္ဍကို မြှင့်တင်ပေးသွားမည်ဖြစ်ကြောင်း နှိုးဆော်ထားသည်။

(၄) မွန်ပြည်သစ်ပါတီ (NMSP)

မွန်ပြည်သစ်ပါတီက ၁၉၄၆ ခုနှစ်မှ စတင်ခဲ့သော တော်လှန်ရေးအစဉ်အလာကို ဂုဏ်ပြုဖော်ပြထားပြီး၊ လက်ရှိနိုင်ငံရေးအကျပ်အတည်းအတွင်း လူငယ်များအနေဖြင့် အမျိုးသားရေးတာဝန်ကို ဦးထိပ်ထားရန် တိုက်တွန်းထားသည်။ အနာဂတ်မွန်ပြည်သစ်အတွက် အရည်အချင်းရှိသော ခေါင်းဆောင်ကောင်းများဖြစ်လာစေရန် အဖွဲ့အစည်းအသီးသီးနှင့် လက်တွဲဆောင်ရွက်ရန် လမ်းညွှန်ထားသည်။

(၅) မွန်ပြည်သစ်ပါတီ (NMSP-AD/RMA)

ဤအဖွဲ့၏ သဝဏ်လွှာသည် စစ်အာဏာရှင်စနစ် တိုက်ဖျက်ရေးကို ပြတ်သားစွာ ဦးတည်ထားပြီး၊ လက်နက်ကိုင်တော်လှန်ရေးကဏ္ဍတွင် လူငယ်များ အင်တိုက်အားတိုက် ပါဝင်ကြရန် တိုက်တွန်းထားသည်။ စစ်အာဏာရှင်ကို အမြစ်ပြတ်ချေမှုန်းရေးတွင် လူငယ်များ၏ အစွမ်းသတ္တိသည် အဓိကဖြစ်ကြောင်း အလေးပေးထားသည်။

(၆) မော်လမြိုင်တက္ကသိုလ် ကျောင်းသားများသမဂ္ဂ

ကျောင်းသားသမဂ္ဂ၏ ထုတ်ပြန်ချက်တွင် ခေတ်ပညာတတ် လူငယ်များ၏ ဦးဆောင်မှုအခန်းကဏ္ဍကို မီးမောင်းထိုးပြထားပြီး၊ ကိုယ်ပိုင်ပြဋ္ဌာန်းခွင့်နှင့် တရားမျှတမှုအတွက် အာဏာရှင်စနစ်ကို အပေးအယူမရှိ တိုက်ဖျက်သွားမည်ဟု ရပ်တည်ထားသည်။

(၇) တိုးတက်သောမွန်လူငယ်များအစည်းအရုံး

(MYPO) MYPO ၏ ထုတ်ပြန်ချက်တွင် မွန်လူငယ်များ၏ နိုင်ငံရေးမျှော်မှန်းချက်များ တစ်ထပ်တည်းဖြစ်စေရန်နှင့် “မွန်လူငယ်အားလုံးသည် တစ်ခုတည်းသော အင်အားစု” အဖြစ် စုစည်းမိရန် အလေးပေးထားသည်။ စစ်အာဏာရှင်စနစ်နှင့် ၂၀၀၈ ဖွဲ့စည်းပုံအခြေခံဥပဒေအောက်ရှိ အတုအယောင် လုပ်ငန်းစဉ်များကို ပြတ်သားစွာ ဆန့်ကျင်လျက်၊ ကိုယ်ပိုင်ပြဋ္ဌာန်းခွင့်ရှိသည့် ဖက်ဒရယ်ပြည်ထောင်စု တည်ဆောက်ရေးတွင် လူငယ်များက အဓိကအုတ်မြစ်အဖြစ် တာဝန်ယူကြရန် တိုက်တွန်းထားသည်။

တူညီချက်နှင့် မတူညီချက်များကို နှိုင်းယှဉ်သုံးသပ်ခြင်း

ဤထုတ်ပြန်ချက်အားလုံးကို ခြုံငုံသုံးသပ်ကြည့်လျှင် တူညီသော ဘုံရပ်တည်ချက်အဖြစ် “မွန်အမျိုးသားလွတ်မြောက်ရေး”၊ “ကိုယ်ပိုင်ပြဋ္ဌာန်းခွင့်” နှင့် “မွန်လူငယ်ထု စည်းလုံးညီညွတ်ရေး” တို့ကို တွေ့ရှိရသည်။ အဖွဲ့အစည်းအားလုံးက လူငယ်များကို အနာဂတ်၏ မောင်းနှင်အားအဖြစ် တညီတညွတ်တည်း အသိအမှတ်ပြုကြသည်။

သို့သော် ချဉ်းကပ်ပုံ (Approaches) တွင် မတူညီသော အလေးပေးမှုများ ရှိနေသည်။ MYF က လူငယ်ထုအတွင်း ကွန်ရက်ချိတ်ဆက်ခြင်းကို အားပြုသော်လည်း၊ NMSP-AD/RMA က လက်နက်ကိုင်တော်လှန်ရေးတွင် ပါဝင်ရန် ပိုမိုပြတ်သားစွာ တိုက်တွန်းသည်။

MSFC က စနစ်ဟောင်းကို တိုက်ဖျက်ပြီး စနစ်သစ်တည်ဆောက်ရေးကို ဆိုသော်လည်း NMSP က အမျိုးသားရေးအတွက် ကဏ္ဍစုံတွင် ဦးဆောင်ပါဝင်ရန် ဆိုသည်။ MUP ကတော့ နိုင်ငံရေးနည်းလမ်းမှတစ်ဆင့် ကိုယ်ပိုင်ပြဋ္ဌာန်းခွင့်ကို ဦးတည်သည်။

နိဂုံး – စည်းလုံးခြင်းဖြင့် အနာဂတ်ကို သိမ်းပိုက်စို့

ယနေ့ဖတ်ရှုရသော သဝဏ်လွှာအားလုံး၏ နောက်ဆုံးပန်းတိုင်မှာ “မွန်လူငယ်ထု စည်းလုံးညီညွတ်ရေး” ပင် ဖြစ်သည်။ အဖွဲ့အစည်းအသီးသီး၏ လမ်းကြောင်းများ ကွဲပြားနေပါစေ၊ “မွန်” ဟူသော သွေးသည် တစ်ခုတည်းဖြစ်ပြီး၊ ခံစားချက်မှာ တစ်ထပ်တည်း ဖြစ်သည်။

မွန်လူငယ်အပေါင်းတို့ – သင်တို့၏ လက်ထဲတွင် မွန်ပြည်သစ်၏ သော့ချက်ရှိနေသည်။ မတူ/စုံလင်ကွဲပြားမှုများကို ခွန်အားအဖြစ် ပြောင်းလဲပြီး၊ တစ်ဦးနှင့်တစ်ဦး လက်တွဲမဖြုတ်ဘဲ ရှေ့ဆက်ကြပါစို့။ “ငါတို့အသိသည် ငါတို့တာဝန်” ဖြစ်သလို၊ “ငါတို့စည်းလုံးခြင်းသည် ငါတို့၏ အောင်ပွဲ” ပင် ဖြစ်သည်။ (၁၄) ကြိမ်မြောက် မွန်လူငယ်နေ့မှစ၍ ပိုမိုခိုင်မာသော စည်းလုံးမှုဖြင့် မွန်အရေးလုပ်ဆောင်‌နေကြသည့် အဖွဲ့အစည်းအားလုံးကို အသိအမှတ်ပြုလေးစားပြီး မွန်ပြည်သစ်ဆီသို့ အားမာန်အပြည့်ဖြင့် ချီတက်ကြပါစို့။