မွန်ပြည်သစ်ပါတီ စစ်အာဏာရှင်တိုက်ဖျက်ရေး NMSP-AD (RMA) တပ်ဖွဲ့မှ ဗိုလ်မှူးတစ်ဦး တာဝန်ထမ်းဆောင်နေစဉ် ယနေ့ ဒီဇင်ဘာလ ၁၆ ရက်နေ့တွင် မတော်တဆမှုကြောင့် ကျဆုံးသွားခဲ့ရကြောင်း တော်လှန်ရေးသတင်းအရင်းမြစ်များမှ သိရသည်။
ယနေ့ ဒီဇင်ဘာ ၁၆ ရက်နေ့ နံနက်ပိုင်းတွင် ရေဖြူမြို့နယ် လမ်းပိုင်းတစ်ခုတွင် စစ်ဆေးရေးလုပ်နေစဉ် အသားငါးရောင်းသည့်ဈေးသည်ယာဉ်တစ်စီးမှ ဝင်တိုက်မိခြင်းကြောင့် NMSP-AD (RMA) မှ ဗိုလ်မှုးမိုးကြိုး ဒဏ်ရာပြင်းထန်ရရှိခဲ့သည်။
ဒဏ်ရာအပြင်းထန်းရရှိခဲ့သည့် ဗိုလ်မှုးမိုးကြိုးကို အနီးနားရှိ ဆေးခန်း၌ အရေးပေါ် ဝင်ရောက်ကုသမှုလုပ်ဆောင်ခဲ့သော်လည်း ဒဏ်ရာပြင်းထန်နေခြင်းကြောင့် အခြားနေရာသို့ သွားရောက်ကုသရန် လုပ်ဆောင်နေစဉ် ယနေ့မနက်ပိုင်း ၉နာရီဝန်းကျင်၌ အလယ်စခန်းကျေးရွာအရောက်တွင် ကျဆုံးသွားခဲ့သည်ဟု နီးစပ်သူ ရဲဘော်တစ်ဦးက ပြောသည်။
“ဒီမနက် သူတို့အလယ်စခန်းအနားမှာ လမ်းစစ်ဆေးရေးထွက်လုပ်တယ် ပြီးတော့ အသားငါးရောင်းတဲ့ကားတစ်စီးက သူ့ကိုဝင်တိုက်မိတာလို့ကြားတယ် ” ဟု ဗိုလ်မှူးမိုးကြိုးနှင့်နီးစပ်သူ ရဲဘော်တစ်ဦးက ပြောသည်။
ဗိုလ်မှုးမိုးကြိုးသည် စစ်အာရှင်တိုက်ဖျက်ရေးနှင့် လူမျိုးရေးအတွက် မွန်ပြည်သစ်ပါတီ စစ်အာဏာရှင်တိုက်ဖျက်ရေး NMSP-AD (RMA) တပ်ဖွဲ့အတွင်း တော်လှန်တိုက်ပွဲဝင်နေသူတစ်ဦး ဖြစ်သည်။
ဗိုလ်မှုးမိုးကြိုးကျဆုံးသွားသည့်အပေါ် မိသားစုနှင့်ထပ်တူဝမ်းနည်းကြောင်း၊ တော်လှန်ရေးအတွက် တာဝန်ကျေကြောင်း အတူတကွတိုက်ပွဲဝင်ခဲ့ဖူးသည့် ပြည်သူ့ကာကွယ်ရေးတပ်မတော် နည်းဗျူဟာ(၃၃)၊ အထူးတိုင်းစစ်ဌာနနှင့် မွန်ပြည်တော်လှန်ရေးတပ် (MSRF) မှ ဝမ်းနည်းကြောင်း ဝမ်းနည်းကြောင်း သဝဏ်လွှာများ ထုတ်ပြန်ထားသည်။
