မွန်ပြည်နယ်အတွင်း မဲဆွယ်စည်းရုံးရေးလုပ်ဆောင်နေသော နိုင်ငံရေးပါတီများ မြေပြင်၌ စည်းရုံးဟောပြောနေခြင်းကို စစ်တပ်မှအနီးကပ်စောင့်ကြည့်နေခြင်းကြောင့် ထိထိရောက်ရောက် လုပ်ဆောင်နိုင်ခြင်းမရှိကြောင်း နိုင်ငံရေးပါတီဝင်များနှင့် နီးစပ်သူများက ပြောသည်။
ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ၊ ပြည်သူ့ရှေ့ဆောင်ပါတီ၊ ပြည်သူ့ပါတီ၊ ရှမ်းနှင့်တိုင်းရင်းသားများဒီမိုကရက်တစ်ပါတီ၊ တိုင်းရင်းသားစည်းလုံးညီညွတ်ရေးပါတီ၊မြန်မာနိုင်ငံတောင်သူ လယ်သမားဖွံ့ဖြိုးတိုးတက်ရေးပါတီ၊ မွန်ညီညွတ်ရေးပါတီနှင့်၊ ပအိုဝ့်အမျိုးသား ဖွံ့ဖြိုးတိုးတက်ရေးပါတီတို့မှ လာမည့်စစ်ကော်မရှင်ရွေးကောက်ပွဲတွင် မွန်ပြည်အတွင်း ဝင်ရောက်ယှဉ်ပြိုင်သွားမည် ဖြစ်သည်။
အဆိုပါနိုင်ငံရေးပါတီများအနက် မွန်ညီညွတ်ရေးပါတီ၊ ပြည်သူ့ပါတီ၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ မြေပြင်မဲဆွယ်စည်းရုံးရေးသာ လုပ်ဆောင်နိုင်ပြီး ကျန်နိုင်ငံရေးပါတီများ ပါတီဆိုင်းဘုတ်ဆိုက်ထူခြင်းသာ လုပ်ဆောင်နိုင်သေးကြောင်း သိရသည်။
ပေါင်မြို့နယ်တွင် နိုင်ငံရေးပါတီအချို နေ့စဉ်မဲဆွယ်စည်းရုံးဟောပြောခြင်းများ လုပ်ဆောင်နေပြီး SP များ၊ လုံခြုံရေးရဲတပ်ဖွဲ့များ၊ စရဖအဖွဲများမှ လိုက်လံစောင့်ကြည့်နေသဖြင့် လွတ်လပ်စွာစည်းရုံးနိုင်ခြင်းမရှိဘဲ တည်ဆဲရွေးကောက်ပွဲဥပဒေနှင့်ငြိစွန်းမည်ကိုစိုးရိမ်နေရကြောင်း ပေါင်မြို့ခံတစ်ဦးက ဆိုသည်။
ထို့ကြောင့် ပါတီကိုယ်စားလှယ်လောင်းများအနေဖြင့် နိုင်ငံရေးကိစ္စရပ်များ၊ တည်ဆဲရွေးကောက်ပွဲဥပဒေနှင့် ဆန့်ကျင်သည့်အကြောင်းအရာများမပြောရဲကြကြောင်း၊ လမ်းတံတားကိစ္စရပ်များ၊ လျှပ်စစ်မီးရရှိရေး၊ သိမ်းဆည်းခံလယ်မြေများအား ပြန်လည်ရရှိရန် ဆောင်ရွက်ခြင်း စသည့်ကတိကဝတ်များသာ စည်းရုံးနိုင်ကြောင်း ပြောသည်။
“ပါတီတွေကတော့နေ့တိုင်းဆင်းတယ် သူတို့ပါတီကိုမဲထည့်ဖို့ပြောလို့ရတယ်၊ ဟိုပါတီကိုမကောင်းဘူးတို့ အစိုးရ ကိစ္စမကောင်းတာတို့မပြောရဲဘူး၊ SP တို့လိုက်တယ်။ ရဲကလုံခြုံရေးပေးတယ်၊ စရဖတွေလိုက်ပြီး နားထောင်နေတယ် တည်ဆဲဥပဒေနဲ့ မလွတ်ကင်းဘူးဆိုဖမ်းတယ် ပြောတာကိုအောက်ကကြည့်နေတယ် သူတို့ပြည်သူ့စစ်တွေရှိတော့နယ်မြေရှင်းထားပေးတယ်”ဟု မြို့ခံက ပြောသည်၊
၎င်းပြင် နေအိမ်အထိစည်းရုံးရေးလုပ်ဆောင်ရာတွင်လည်း စစ်တပ်မှ လုံခြုံရေးအဖွဲ့များလိုက်ပါလာနေခြင်းကြောင့် ရပ်ရွာဒေသခံများ အထိန့်တလန့်ဖြစ်နေရကြောင်းလည်း ဆိုသည်။
အဆိုပါအခြေအနေများကြောင့် မွန်ပြည်နယ်တစ်ဝန်းတစ်ဝှမ်း ရွေးကောက်ပွဲဝင်ရောက်ယှဉ်ပြိုင်မည့် မွန်ညီညွှတ်ရေးပါတီ (MUP) ကိုယ်စားလှယ်လောင်းများက လူအသုံးပြုမှုများသည့် Facebook၊ TikTok၊ YouTube၊ Telegram စသည့် လူမှုကွန်ရက်စာမျက်နှာမှတစ်ဆင့်သာ မဲဆွယ်စည်းရုံးမှုလုပ်ငန်းစဉ်များကို လုပ်ဆောင်နေပြီး မြေပြင်စည်းရုံးခြင်းများ နည်းသေးကြောင်း မွန်ညီညွှတ်ရေးပါတီနှင့် နီးစပ်သူတစ်ဦးက ပြောသည်။
“ခေတ်ရေစီးကြောင်းအရ မွန်ညီညွှတ်ရေးပါတီအနေနဲ့ မဲဆွယ်စည်းရုံးမှုတွေကို ပါတီအနေနဲ့ စည်းရုံးတာမဟုတ်ဘဲ လူပုဂ္ဂိုလ်အရ စည်းရုံးတဲ့ပုံစံမျိုးပဲ သွားမှာဖြစ်တယ်။ အများကြီးလည်း မလှုပ်ရှားရဲဘူးပေါ့နော်။ ဆိုရှယ်မီဒီယာပေါ်မှာပဲ မဲဆွယ်နေတယ်။ မဲဆွယ်စည်းရုံးမှုကတော့ ဒီလိုပုံစံနဲ့ပဲ ပြီးသွားမှာပါ။ ရွေးကောက်ပွဲကလည်း ဒီအတိုင်းပဲ ပြီးဆုံးသွားမယ်။ မွန်စားလှယ်လောင်းတွေက ကျေးရွာတွေဘက်မှာ လူစုပြီး ဟောပြောတဲ့ပုံစံကတော့ သူတို့မလုပ်တော့ဘူးလို့ ပြောတယ်” အထက်ပါ မွန်ပါတီနှင့်နီးစပ်သူက ပြောသည်။
အလားတူ ကရင်ပြည်နယ်၊ ဘားအံမြို့နယ်နှင့် ကော့ကရိတ်မြို့နယ်တွင် ရွေးကောက်ပွဲ ဝင်ရောက်ယှဉ်ပြိုင်မည့် မွန်တိုးတက်ရေးပါတီမှလည်း ကျေးရွာများအတွင်း ပါတီဆိုင်းဘုတ် စိုက်ထူးခြင်းသာ လုပ်ဆောင်နိုင်သေးကြောင်းနှင့် မြေပြင်မဲဆွယ်စည်းရုံးမှုလုပ်ငန်းစဉ်များကို လာရောက်လုပ်ဆောင်နိုင်ခြင်း မရှိသေးဟု ဘားအံဒေသခံများက ပြောသည်။
ပြီးခဲ့သည့်ရက်ပိုင်းက Tik Tok လူမှုကွန်ရက်မှတစ်ဆင့် မဲဆွယ်စည်းရုံးရေးလုပ်ဆောင်ရာတွင် ＂အရေးတော်ပုံ＂၊ ＂တော်လှန်ရေး＂ဆိုသည့် စကားလုံးများ ပြောဆိုသုံးနှုန်းခဲ့သည့် ပြည်သူ့ပါတီမှ လွှတ်တော်ကိုယ်စားလှယ်လောင်း ဦးလွင်မြင့်ကို ကိုယ်စားလှယ်လောင်းအရည်အချင်း ပျက်ယွင်းခြင်းရှိ၊ မရှိစစ်ဆေးပြီး အရေးယူရန်ရှိသည်ဟု ပြည်ထောင်စုရွေးကောက်ပွဲကော်မရှင် UEC မှ အသိပေးထုတ်ပြန်ထားသေးသည်။
စစ်ကော်မရှင် ပြည်ထောင်စုရွေးကောက်ပွဲကော်မရှင်က (UEC) မှ လူစုလူဝေးဖြင့် စီတန်းလှည် မဲဆွယ်စည်းရုံးခြင်းကို ကန့်သတ်ထားသည့်အတွက် နိုင်ငံရေးပါတီများ ဆိုရှယ်မီဒီယာများမှတစ်ဆင့် မဲဆွယ်စည်းရုံးမှုများကို အဓိက လုပ်ဆောင်နေရကြောင်း သိရသည်။
