မွန်ပြည်နယ်၊ မော်လမြိုင်လေဆိပ်တွင် ပြေးဆွဲနေသည့် ရန်ကုန်- မော်လမြိုင် လေကြောင်းလိုင်းခရီးစဉ်တွင် ခရီးသည်လိုက်ပါစီးနင်းမှု နည်းလာသဖြင့် လေယာဉ်ပြေးဆွဲမည့်ရက်ကို လျှော့ချထားသည်ဟု ခရီးသွားလာရေးလုပ်ငန်း တာဝန်ရှိသူများမှ သိရသည်။
ပုံမှန်အားဖြင့် တစ်ပတ်လျှင် ၄ ရက်အထိ ပြေးဆွဲပေးနေသည့် မော်လမြိုင်- ရန်ကုန် Air Thanlwin လေကြောင်းလိုင်းမှ ပြီးခဲ့သည့် နိုဝင်ဘာ ၁၅ ရက်နေ့မှစ၍ တနင်္လာနှင့် သောကြာနေ့ နှစ်ရက်သာ ပြောင်းလဲပြေးဆွဲနေကြောင်း သိရသည်။
“အရင်က တစ်ပတ်မှာ ၄ ရက်ပြေးဆွဲတယ်၊ အခုက တစ်ပတ်မှာ နှစ်ရက်ပဲပြေးဆွဲမယ်။ အကြောင်းကတော့ စီးတဲ့သူတွေနည်းလာလို့ပေါ့နော်၊ အခုက ကားလမ်းတွေ ရထားလမ်းတွေ သွားလာတာ အဆင်ပြေတော့ လေကြောင်းလိုင်းစီးတဲ့သူတွေနည်းတော့ ရက်လျှော့ထားတယ်” ဟု မော်လမြိုင် လေကြောင်း ခရီးသွားရေးလုပ်ငန်းတွင် တာဝန်ရှိသူတစ်ဦးက ပြောသည်။
နှစ်ရက်သာ ပြောင်းလဲပြေးဆွဲထားခြင်းကြောင့် အသက်ကယ်ရမည့် အရေးပေါ်လူနာများနှင့် အရေးပေါ်ခရီးသွားရလာသူများအတွက် အခက်ခဲမကြုံစေရန် MNA မြန်မာအမျိုးသား လေကြောင်းလိုင်းမှ ရန်ကုန်- မော်လမြိုင်ခရီးစဉ်ကို နိုဝင်ဘာ ၁၉ ရက်နေ့မှစ၍ အပတ်စဉ် ဗုဒ္ဓဟူးနေ့တစ်ရက်ပြေးဆွဲပေးမည်ဟုလည်း မော်လမြိုင်လေဆိပ်မှ အသိပေးထုတ်ပြန်ထားသည်။
ရန်ကုန်- မော်လမြိုင် လေကြောင်းလိုင်း၏ အသွားအပြန် လေယာဉ်လက်မှတ်နှုန်းထားကို ကျပ် ၇ သိန်းနီးပါးအထိ ဈေးမြှင့်တင် သတ်မှတ်ထားခြင်းကြောင့်လည်းကောင်း၊ ညောင်ခါးရှည်ဂိတ် စစ်ဆေးမှုလျော့ကျလာခြင်းကြောင့်လည်းကောင်း လေယာဉ်ဖြင့်ခရီးသွားလာမှု နည်းလာပြီး စရိတ်သက်သား ကားနှင့်ရထားဖြင့်သာ ပိုမိုအသုံးပြုကြသည်။
“လေယာဉ်ခက အသွားအပြန်က ၇ သိန်းလောက်ကုန်တယ်။ ကားနဲ့ရန်ကုန်ကို အသွားအပြန်က ၂ သိန်းလောက်ပဲကုန်တယ်၊ ရထားဆိုပိုတောင် ကုန်ကျသက်သာတယ်။ ဘယ်သူကတတ်နိုင်မှာ ၇သိန်းထက် အဆတစ်ရာတန်တဲ့ ကုန်ကျနည်းတာကိုပဲ ရွေးမှာပေါ့။ သူဌေးတွေက တတ်နိုင်တယ်ပေါ့၊ ဒါမဲ့ အရေးပေါ်မဟုတ်ရင် ဘယ်သူမှ မသွားဘူး၊ စီးတဲ့သူအမြဲရှိတဲ့ ကားလို၊ ရထားလို မဟုတ်ဘူးပေါ့” ဟု မော်လမြိုင်ဒေသခံတစ်ဦးက ပြောသည်။
၂၀၂၄ ခုနှစ်တွင် ရန်ကုန်- မော်လမြိုင်လေကြောင်းလိုင်း Air Thanlwin သည် တစ်ပတ်တွင် ၆ ရက်အထိ ပြေးဆွဲခဲ့ပြီး ယခု ၂၀၂၅ ခုနှစ်တွင် တစ်ပတ်အတွင်း ၄ ရက်ပြေးဆွဲရာမှ ၂ ရက်သာ ပြေးဆွဲနိုင်ခဲ့ကြောင်း သိရသည်။
ပြီးခဲ့သည့် ကိုဗစ် ၁၉ ကာလတွင်လည်း မော်လမြိုင်-ရန်ကုန် လေကြောင်းခရီးစဉ်ကို တစ်ပတ်လျှင် တနင်္လာ၊ ကြာသပတေး နှစ်ရက်သာ ပြေးဆွဲခဲ့သည်ဟု သိရသည်။
