မွန်ပြည်နယ်၊ သထုံမြို့နယ်၊ သိမ်ဆိပ်ဘူတာနှင့် ဒုံဝန်းဘူတာကြား ရန်ကုန်-မော်လမြိုင် ရထားလမ်းပိုင်းတွင် ယနေ့ နိုဝင်ဘာလ ၇ ရက်နေ့က နံနက်ပိုင်းက ကျောက်တင်ရထား မိုင်းခွဲခံရသည်။
ယနေ့ နံနက် ၈ နာရီခန့်က သိမ်ဆိပ်ဘူတာနှင့် ဒုံဝန်းဘူတာကြား ရန်ကုန်-မော်လမြိုင် ရထားလမ်းပိုင်း မိုင်တိုင် ၁၂၅/ ၁၈- ၁၉ ကြားတွင် အမှတ် (၆၈၆) အစုန်ကျောက်ရထား ဖြတ်သန်းစဉ် မိုင်းပေါက်မှု ဖြစ်ပွားခဲ့ခြင်းဖြစ်သည်။
မိုင်းဖောက်ခွဲခံရမှုကြောင့် ရထားလမ်းပိုင်း ပျက်စီးသွားသလို ရထားတွဲ လမ်းချော်မှုလည်း ဖြစ်ပွားခဲ့သည်ဟု မော်လမြိုင်ဘူတာကြီးထံမှ သိရသည်။
“ရထားသံလမ်း နှစ်ဆက်ခန့် ပျက်ဆီးသွားပြီး အမှတ် ၆၈၆ အစုန်ကျောက်ရထား စက်ခေါင်းအပါအဝင် အတွဲ ၄ တွဲ လမ်းချော်မှု ဖြစ်ပွားခဲ့ပါတယ်” ဟု မော်လမြိုင်ဘူတာကြီးက ဆိုသည်။
ရထားလမ်းပိုင်း မိုင်းဖောက်ခွဲခံရမှုကြောင့် မော်လမြိုင်ဘူတာကြီးမှ ထွက်ခွာမည့် အမှတ် ၈၂ အစုန် မော်လမြိုင်-ရန်ကုန် ရထားနှင့် ရန်ကုန်ဘူတာကြီးမှ ထွက်ခွာမည့် အမှတ် ၈၁ အဆန် ရန်ကုန်-မော်လမြိုင် ရထားခရီးစဉ်များကို နိုဝင်ဘာလ ၇ ရက်နေ့ကစပြီး ယာယီဖျက်သိမ်းကြောင်းလည်း မော်လမြိုင်ဘူတာကြီးထံမှ သိရသည်။
ရထားခရီးစဉ်များ ယာယီဖျက်သိမ်းလိုက်သည့်အတွက် ဝယ်ယူထားပြီးသော ရထားလက်မှတ်ခများကို မော်လမြိုင်ဘူတာကြီး နေ့ချင်း လက်မှတ်ရုံတွင် လာရောက် ထုတ်ယူနိုင်သည်ဟု မော်လမြိုင်ဘူတာကြီးက ကြေညာထားသည်။
ရန်ကုန်-မော်လမြိုင်ရထားလမ်းပိုင်း သိမ်ဆိပ်နှင့် ဒုံးဝန်းဘူတာကြားတွင် ကုန်တင်ရထား မိုင်းဆွဲတိုက်ခိုက်ခံရတာ၊ ရထားလမ်းပိုင်း မိုင်းခွဲခံရတာတွေ မကြာခဏဖြစ်ပွားနေသည်ဟု ဒေသခံတို့ထံမှ သိရသည်။
