မွန်နှင့် ကရင်ပြည်နယ်တို့ကို ဆက်သွယ်ထားသည့် မုဒုံ-ချောင်းနှစ်ခွ-ကြာအင်းဆိပ်ကြီး ကားလမ်းမပေါ် စစ်ကြောင်းထိုးနေသည့် စစ်ကော်မရှင်စစ်ကြောင်းနှင့် လမ်းပိုင်းရှိ တော်လှန်ရေးပူးပေါင်းတပ်များအကြား ယမန်နေ့အထိတိုက်ပွဲများ ဆက်လက်ဖြစ်ပွားနေကြောင်း ဒေသခံများထံမှ သိရသည်။
စက်တင်ဘာ ၁၇ ရက်နေ့မှစ၍ လမ်းပိုင်းပေါ်၌ အတက်အဆင်းနှစ်ဖက် စစ်ကြောင်းထိုးလာသည့် စစ်ကော်မရှင်စစ်ကြောင်းသည် ဗျူဟာမှူးဗိုလ်အယ်စေးဝါးဦးဆောင်သော (Lion Battalion Commando) ဗျူဟာစစ်ကြောင်း-တပ်ခွဲ(၃)နှင့် တော်လှန်ရေးပူးပေါင်းတပ်များကြား လမ်းပိုင်းတစ်လျှောက် တိုက်ပွဲဖြစ်ပွားနေခြင်းဖြစ်သည်။
ယမန်နေ့ စက်တင်ဘာ ၂၂ ရက်နေ့ နေ့လည်ပိုင်းက ချောင်းနှစ်ခွရွာအတွင်း တိုက်ပွဲထပ်မံဖြစ်ပွားခဲ့ပြီး ချောင်းနှစ်ခွအနီးအနားရှိ ကျုံကွယ်၊ လွှစင်ကုန်းစသည့် ကျေးရွာများဘက်သို့ လက်နက်ကြီးဖြင့် ပစ်ခတ်မှုများ ပြုလုပ်ခဲ့သည်။
“မနေ့က ၂၂ နေ့ နေ့လည်ပိုင်းမှာ တိုက်ပွဲဖြစ်တယ်။ ၂၁ ရက်နေ့မနက်ပိုင်းကလည်း ခဏဖြစ်သွားတယ်လို့ ကြားတယ်။ ညနေပိုင်းမှာ လက်နက်ကြီးတွေ ပစ်ခတ်တယ်။ အဲဒီတိုက်ပွဲမှာ စစ်တပ်ဘက်ကရော တော်လှန်ရေးဘက်ကရော သေဆုံးတာများတယ်။ စစ်တပ်ဘက်က ပိုများတယ်လို့ ပြောတယ်။ အတိအကျတော့မရှိဘူး”ဟု ချောင်းနှစ်ခွ ဒေသခံတစ်ဦးက ဆိုသည်။
ချောင်းနှစ်ခွ-ကြာအင်းဆိပ်ကြီးလမ်းပိုင်းတစ်လျှောက်ကို စစ်ကော်မရှင်တပ်သားနှင့်အတူ ဒီမိုကရေစီအကျိုးပြုကရင့်တပ်မတော်(DKBA) မှ ပူးပေါင်းထိုးစစ်ဆင်နေခြင်းဖြစ်ပြီး လက်ရှိတွင် သံပုရာကျေးရွာနှင့် ဒါလီကျေးရွာဘက်ကို အင်အားအလုံးအရင်းဖြင့် ဝင်ရောက်ထိန်းချုပ်ထားသည်။
အဆိုပါလမ်းပိုင်းတွင် ချောင်းနှစ်ခွအခြေစိုက် စစ်ကော်မရှင်တပ်မှ လက်နက်ကြီးပစ်ခတ်မှုများ မကြာခဏဆက်ရှိနေသဖြင့် သံပုရာ၊ ထခနိမ်း၊ ဘုရားကုန်း ၊ မရစ်၊ အောင်ချမ်းသာစသည့် ကျေးရွာများမှ စစ်ဘေးရှောင်အချို့က စစ်ဘေးရှောင်ဒေသခံအချို့က နေရပ်မပြန်နိုင်သေးကြောင်း သိရသည်။
“ရွာထဲမှာတော့ စစ်သားတွေက ဝင်ရောက်နေတယ်။ တချို့က ပြန်ကြတယ်။ အမတိုကတော့သံပုရာရွာကို မပြန်ရဲသေးဘူး။ တော်လှန်ရေးဘက်က စစ်ကြောင်းတွေ ပြန်စုလာရင် ဘယ်လိုဖြစ်မလဲမသိဘူး။ ရွာလူကြီးတွေလဲ အကြောင်းမကြားသေးဘူးပြန်နေဖို့။ ၂၁ရက်နေ့ မနက်ပိုင်းက ချောင်းနှစ်ခွကနေ အနီးအနားကျေးရွာတွေဆီကို လက်နက်ကြီးပစ်နေသေးတယ်”ဟု သံပုရာရွာမှ ကြာအင်းဆိပ်ကြီးမြို့တွင် စစ်ဘေးရှောင်နေသည့် အမျိုးသမီးတစ်ဦးက ဆိုသည်။
လက်ရှိတွင် မုဒုံ-ချောင်းနှစ်ခွ-သံပုရာ-ကြာအင်းဆိပ်ကြီး လမ်းပိုင်း၊ ကျိုက်မရော-ခရုံဂူ-လွှစင်ကုန်း-သံပုရာ-ကြာအင်းဆိပ်ကြီး လမ်းပိုင်းနှင့် မုဒုံ-ကမာဝက်-ခလယ်တံခွန်တိုင်-ကြာအင်းဆိပ်ကြီး လမ်းကြောင်းကိုလည်း အင်အားအဆမတန်သုံး၍ စစ်ကြောင်းများ ဖြန့်ကျက်ထားသည်ဟု သိရသည်။
ထို့အပြင် စစ်ကော်မရှင်အနေဖြင့် ရွေးကောက်ပွဲကျင်းပနိုင်ရန် ကြာအင်းဆိပ်ကြီးမြို့နှင့် ဆက်သွယ်ထားသည့် လမ်းပိုင်းအားလုံးကို နယ်မြေရှင်းလင်းမှုလုပ်ဆောင်သွားမည်ဖြစ်သည့်အပြင်၊ ကြာအင်းဆိပ်ကြီးမှ ကျိုက်ဒုံနှင့် ဘုရားသုံးဆူမြို့အထိ စစ်ကြောင်းထိုးရန်ရှိကြောင်းလည်း စစ်တပ်နှင့် နီးစပ်သူများက ပြောဆိုလျှက်ရှိသည်။
ပြီးခဲ့သည့် စက်တင်ဘာလ ၁၅ ရက်နေ့က ကြာအင်းဆိပ်ကြီး ဗျူဟာသို့ရောက်ရှိလာသည့် အရှေ့တောင်တိုင်း စစ်ဌာနချုပ်မှ စစ်တပ်အရာရှိများသည် ကြာအင်းဆိပ်ကြီးသို့ ဆက်သွယ်ထားသည့်လမ်းပိုင်းပေါ်ရှိ ပျက်စီးနေသည့် တံတားများ၊လမ်းများပြင်ဆင်မည့်ကိစ္စနှင့် စစ်ကြောင်းလုံခြုံရေးအား ကူညီပေးရန်ကိစ္စများကို ကြာအင်းဆိပ်ကြီး DKBA တပ်ဖွဲ့နှင့် ကရင်လက်နက်ကိုင်အဖွဲ့များထံ ဆွေးနွေးညွှန်ကြားမှုရှိခဲ့ကြောင်း DKBA နှင့်နီးစပ်သည့် သတင်းအရင်းမြစ်က KIC သတင်းဌာနထံ ပြောဆိုထားသည်။
