တနင်္သာရီတိုင်းဒေသကြီး၊ ရေဖြူမြို့နယ် ကော့လှိုင်ကျေးရွာအနီးတွင် စစ်ကောင်စီစစ်ကြောင်းကို ရာမညမွန်တပ်တော်(RMA)၏ ရေဖြူဒေသတပ်ဖွဲ့နှင့်အတူ မဟာမိတ်ပူးပေါင်းတပ်ဖွဲ့များမှ ပူးပေါင်းတိုက်ခိုက်ခဲ့ရာ ထိတွေ့တိုက်ပွဲ နှစ်ကြိမ်ဖြစ်ပွားခဲ့ကြောင်း တော်လှန်ရေးပူးပေါင်းတပ်ဖွဲ့များမှ ထုတ်ပြန်ပြောဆိုချက်အရ သိရသည်။
အကြမ်းဖက်စစ်ကောင်စီ၏ တပ်ရင်း(၄၀၉)၊(၄၁၀)နှင့် (၂၈၂) မှ အင်အား ၁၅၀ ခန့်ပါသည့် စစ်ကြောင်းသည် ယမန်နေ့သြဂုတ် ၁၃ ရက်နေ့ နံနက် ၁၁ နာရီဝန်းကျင်တွင်တစ်ကြိမ်၊ ညနေ ၃ နာရီတွင် တစ်ကြိမ်ဝင်ရောက်လာသဖြင့် ထိတွေ့တိုက်ပွဲများဖြစ်ပွားခဲ့ကြောင်း တိုက်ပွဲတွင်ပါဝင်ခဲ့သည့် မွန်ပြည်တော်လှန်ရေးတပ် MSRF မှ ပြောသည်။
“မနေ့က အင်အား ၁၅၀ ခန့်ပါတဲ့ စစ်ကြောင်း ၂ ကြောင်းနဲ့ တော်လှန်ရေးပူးပေါင်တပ်ဖွဲ့တွေ မိနစ် ၅၀ ခန့်ထိတွေ့တိုက်ပွဲဖြစ်သွားတယ်။ သူတို့ဘက်က အရာရှိ ၁၄ယောက် သေသွားတယ်။ တော်လှန်ရေးပူပေါင်းတပ်ဖွဲ့ဘက်က ၈ဦး ဒဏ်ရာရတယ် ပြည်သူတစ်ဦးထိသွားတယ်” MSRF မှ ပြောရေးဆိုခွင့်ရှိသူ မိတလညဏ်က ပြောသည်။
တိုက်ပွဲဖြစ်ပွားမှုအတွင်း တော်လှန်ရေးပူပေါင်းတပ်ဖွဲ့ဘက်မှ ရဲဘော် ၈ ဦး မစိုးရိမ်ဒဏ်ရာရရှိခဲ့ပြီး ဒေသခံပြည်သူ ၁ ဦး ထိခိုက်ဒဏ်ရာရရှိခဲ့ကြောင်း သူမက ဆက်ပြောသည်။
အဆိုပါတိုက်ပွဲကို မွန်ပြည်တော်လှန်ရေးတပ်(MSRF)၊ နည်းဗျူဟာ ၃၃ စစ်ဆင်ရေးတပ်ဖွဲ့၊ ဒေါနတပ်ရင်း (၂ )(YGF)၊ ဒေါနတပ်ရင်း ၃ (KBDF)၊ ကြယ်လင်းရောင်တပ်ရင်း (KTLA)၊ ကရင်အမျိုးသားလွတ်မြောက်ရေး တပ်မတော် (KNLA) တပ်ရင်း (၂၇)နှင့် ရာမညမွန်တပ်တော်(NMSP/AD၊RMA) တို့ ပူးပေါင်းပါဝင်တိုက်ခိုက်ခဲ့သည်ဟု ထုတ်ပြန်ချက်တွင် ဖော်ပြထားသည်။
စစ်ကောင်စီနှင့် တော်လှန်ရေးမဟာမိတ်ပူးပေါင်းတပ်တို့သည် ရေဖြူမြို့နယ် ကော့လှိုင်ကျေးရွာနှင့်အနီးတစ်ဝိုက်တွင် မကြာခဏထိတွေ့တိုက်ပွဲဖြစ်ပွားနေသဖြင့် ဒေသခံများ ၂ လကြာသည်အထိ စစ်ဘေးရှောင်နေရပြီး စားဝတ်နေရေးအခက်အခဲကြောင့် နေရပ်ပြန်လာသူများလည်းရှိကြောင်း ဒေသခံတွင်းသတင်းအရင်းမြစ်များက ဆိုသည်။
