ထိုင်းနှင့်ကမ္ဘောဒီးယားတို့ နိုင်ငံသားနေထိုင်ခွင့်ကာလကို အပြန်အလှန်ကန့်သတ်နေ

ထိုင်းနှင့် ကမ္ဘောဒီးယားတို့ နိုင်ငံသားများ ပြည်တွင်းနေထိုင်ခွင့်ကာလကို အပြန်အလှန်ကန့်သတ်နေကြောင်း နှစ်ဖက်နိုင်ငံမှ ထုတ်ပြန်ပြောဆိုချက်များအရ သိရသည်။

 ထိုင်းနိုင်ငံသားများအတွက် ဗီဇာကင်းလွတ် နေထိုင်ခွင့်ကာလကို ရက်ပေါင်း ၆၀ မှ ၇ ရက်သို့ လျှော့ချလိုက်ကြောင်း ကမ္ဘောဒီးယား လူဝင်မှုကြီးကြပ်ရေးဝန်ကြီးဌာန(Cambodian Immigration Department) မှ ဦးစီးအရာရှိကြီး ဗီယက်ဆနာဆို့ (Veasna Sok) က ဇွန်လ ၉ ရက်နေ့ နံနက်ပိုင်းတွင် ကြေငြာခဲ့သည်။

 ဗီယက်ဆနာဆို့၏ ပြောဆိုချက်အရ ထိုင်းအစိုးရမှ ဇွန် ၈ ရက်နေ့မှ စတင်၍ ကမ္ဘောဒီးယားပြည်သူများအတွက် ဗီဇာကင်းလွတ်နေထိုင်ခွင့်ကို ရက်သတ္တပတ်သာ ချမှတ်လိုက်ပြီး၊ ထိုကာလပြီးဆုံးပါက ထိုင်းနိုင်ငံမှ ပြန်လည်ထွက်ခွာရမည်ဖြစ်ပြီး နယ်စပ်ဖြတ်သန်းခွင့်ကဒ် သို့မဟုတ် ဗီဇာအသစ်ပြုလုပ်မှသာ ဝင်ရောက်နိုင်မည်ဟု သတ်မှတ်ထားကြောင်း ဆိုသည်။

ထို့ကြောင့် ထိုင်းဘက်မှ လုပ်ရပ်ကိုတုန့်ပြန်သည့်အနေဖြင့် ကမ္ဘောဒီးယားအစိုးရမှ ထိုင်းနိုင်ငံသားများအတွက် ဗီဇာကင်းလွတ်နေထိုင်ခွင့်ကို ၇ ရက်သို့ ပြန်လည်ကန့်သတ်လိုက်ခြင်းဖြစ်ကြောင်း သိရသည်။

ထို့အပြင် ကမ္ဘောဒီးယားနိုင်ငံခြားရေးဝန်ကြီးဌာနမှ  နယ်နမိတ်အငြင်းပွားမှုများကို (International Court of Justice – ICJ) သို့ ဆွေးနွေးရန် ပေးပို့ခဲ့သည့် အကြောင်းကြားစာအပေါ် ထိုင်းနိုင်ငံ နိုင်ငံခြားရေးဝန်ကြီးဌာနအနေဖြင့် ထောက်ခံပေးရန်လည်း တောင်းဆိုထားသေးသည်။

 ငြိမ်းချမ်းရေးနည်းဖြင့် ပြဿနာများဖြေရှင်းရန် ဆန္ဒရှိသော်လည်း၊ နိုင်ငံပိုင်နက်အပေါ်  ကျူးလွန်လာပါက တပ်ဖွဲ့အားဖြင့် တုန့်ပြန်ရန် အသင့်ရှိကြောင်း ယနေ့ ဇွန်လ ၉ ရက်နေ့တွင် ကမ္ဘောဒီးယားအစိုးရက ထုတ်ပြန်ကြေငြာထားသည်။

ထိုင်းတပ်ဖွဲ့များအနေဖြင့် မေလ ၂၈ ရက်နေ့၌ ဖြစ်ပွားခဲ့သောပစ်ခတ်မှုအတွင်း ကမ္ဘောဒီးယားတပ်များက ထိုင်းနယ်မြေအတွင်း ဝင်ရောက်ထားကြောင်း ဓာတ်ပုံအထောက်အထားများနှင့်တကွ ထုတ်ပြခဲ့သည်။

ထိုင်းအကြီးအကဲများအနေဖြင့် ၎င်းတို့အသုံးပြုသည့် မြေပုံသည် 1:50,000 L7018 စီးရီးမြေပုံဖြစ်ပြီး၊ မြေပြင်နယ်နမိတ်များကို ပိုမိုမှန်ကန်စွာ ရှင်းလင်းနိုင်သည်ဟု ဆိုသည်။

ကမ္ဘောဒီးယားဘက်မှာမူ 1907 ခုနှစ်က ဖရန်စီ-သီအံသဘောတူစာချုပ်အတွဲပါ 1:200,000 စကေးမြေပုံကို ကိုးကားအသုံးပြုနေသည်ဟု ထိုင်းဘက်က ရှင်းလင်းထားသည်။

ပြီးခဲ့သည် ဇွန်လ ၇ ရက်နေ့တွင်လည်း ထိုင်းဘက်မှ နယ်စပ်ဂိတ်ဖွင့်ချိန်ကို မနက် ၆ နာရီမှ ည ၁၀ နာရီအစား မနက် ၈ နာရီမှ ည ၄ နာရီအထိ ကန့်သတ်လိုက်ပြီး၊ ထိုအခြေအနေအပေါ် တုံ့ပြန်၍ ကမ္ဘောဒီးယားဘက်ကလည်း မနက် ၉ နာရီမှ ည ၄ နာရီအထိသာ ဖွင့်လှစ်ခဲ့သည်။

အဆိုပါနယ်စပ်သွားလာမှုကန့်သတ်မှုများကြောင့် ဇွန် ၈ ရက်နေ့မနက်ပိုင်းတွင် ထိုင်း–ကမ္ဘောဒီးယား မိတ်ဖက်တံတား နယ်စပ်ဂိတ်၌ လူပေါင်း ၂,၀၀၀ ကျော် Sa Kaeo ခရိုင်ရှိ Aranyaprathet ဧရိယာတွင် စောင့်ဆိုင်းနေခဲ့ရသည်ဟု သိရသည်။