ထိုင်း-မြန်မာနယ်စပ် မြဝတီ-ကော့ကရိတ် အာရှလမ်းမကြီး ပြန်လည်ဖွင့်လှစ်နိုင်ရေး ကြိုးပမ်းနေသည့် စစ်ကောင်စီတပ်နှင့် တော်လှန်ရေးပူးပေါင်းတပ်တို့ကြား တိုက်ပွဲပြင်းထန်နေကြောင်း သိရသည်။
ယမန်နေ့ ဇန်နဝါရီလ ၂၀ ရက်နေ့ နံနက်ပိုင်းကစပြီး မြဝတီ-ကော့ကရိတ် အာရှလမ်းမပေါ်ရှိ ဆိတ်ဖူးတောင်နှင့် ရင်ကွဲတောင်ဝန်းကျင်တို့တွင် တိုက်ပွဲပြင်းထန်နေသည်ဟု တော်လှန်ရေးသတင်းအရင်းအမြစ်တို့ထံမှ သိရသည်။
“(မနေ့) မနက်ကစပြီး လက်နက်ကြီး၊ လက်နက်ငယ်တွေနဲ့ အပြင်းအထန် ပစ်နေကြတယ်” ဟု တော်လှန်ရေးသတင်းအရင်းအမြစ်တစ်ဦးက ပြောသည်။
ထိုင်းနိုင်ငံ၏ ဖိအားပေးမှုကြောင့် လာမည့်မတ်လအတွင်း မြဝတီ-ကော့ကရိတ် အာရှလမ်းမကြီးကို ပြန်လည်ဖွင့်လှစ်နိုင်ရန် စစ်ကောင်စီက စီစဉ်ထားသည့်အတွက် အဆိုပါလမ်းပိုင်းတစ်လျှောက် တပ်စွဲထားသည့် တော်လှန်ရေးပူးပေါင်းတပ်များကို တိုက်ထုတ်ရန် ကြိုးပမ်းလာခြင်း ဖြစ်နိုင်သည်ဟု ကော့ကရိတ်ဒေသခံတစ်ဦးက ပြောသည်။
“အဲဘက်မှာ လက်နက်သံကတော့ နေ့တိုင်းလိုလို ကြားနေရတယ်။ မြဝတီ-ကော့ကရိတ် အာရှလမ်းပိုင်းမှာတော့ သွားတော့ သွားလို့ရတယ်။ တိုက်ပွဲ ခဏခဏဖြစ်နေတဲ့အတွက် မလုံခြုံလို့ ဘယ်သူမှ မသွားကြဘူး။ တောလမ်းဘက်ကိုပဲ အားကိုးပြီး သွားလာနေတဲ့အတွက် ထိုင်း-မြန်မာ နှစ်နိုင်ငံကြား ကုန်သွယ်ရေးအတွက် နှောင်နှေးတယ်။ အခက်အခဲ ဖြစ်လာတယ်။ အဲကြောင့် ထိုင်းဘက်က ဖိအားပေးမှုကြောင့် စစ်ကောင်စီက အာရှလမ်းမကြီးကို စိုးမိုးပြီး ဒီလာမဲ့ ၃ လပိုင်းမှာ ဖွင့်လှစ်သွားမယ်လို့ ကြားတယ်” ဟု အထက်ပါ ကော့ကရိတ်ဒေသခံက ပြောသည်။
ပြီးခဲ့သည့် ၂၀၂၄ ခုနှစ်၊ ဒီဇင်ဘာလ ၉ ရက်နေ့က ထိုင်းနိုင်ငံ သံအမတ်ကြီး H.E.Mr.Mongkol Visitstump က ကရင်ပြည်နယ်ဝန်ကြီးချူပ် ဦးစောမြင့်ဦးနှင့် လာရောက်တွေ့ဆုံပြီး နှစ်နိုင်ငံ နယ်စပ်ကုန်သွယ်ရေး၊ လမ်းပန်းဆက်သွယ်ရေး၊ စီးပွားရေး၊ လုံခြုံရေး၊ တရားဥပဒေစိုးမိုးရေး၊ နယ်စပ်ဖြတ်ကျော် မှုခင်းများ၊ အကြမ်းဖက်လုပ်ငန်းများနှင့် တရားမဝင် ကုန်သွယ်မှုများ တားဆီး နှိမ်နင်းနိုင်ရေး စသည့် နှစ်နိုင်ငံပူးဆောင်ရွက်ရေးဆိုင်ရာ ကိစ္စရပ်များကို အဓိကဆွေးနွေးခဲ့ကြသည်ဟု စစ်ကောင်စီက ထုတ်ပြန်ထားသည်။
လက်ရှိအခြေအနေအရ ထိုင်း-မြန်မာနှစ်နိုင်ငံ ကုန်သွယ်ရေးအတွက် မြဝတီ-ကော့ကရိတ် အာရှလမ်းမကြီးကို အသုံးပြုနိုင်ခြင်း မရှိသေးဘဲ တောလမ်းဖြစ်သည့် ထော့ကော်ကိုးလမ်း၊ ကြက်ဥတောင်လမ်း၊ ထို့ကော်ကိုးလမ်းနှင့် ဒေါနတောင်တက်လမ်းတို့ကို အသုံးပြုသွားလာနေရသည့်အတွက် လမ်းမကောင်းသလို၊ သယ်ယူပို့ဆောင်စရိတ် မြင့်မားခြင်း၊ ယာဉ်ကြပ်တည်းခြင်း ဖြစ်နေသည့်အတွက် ကုန်သွယ်ရေးကိစ္စ၊ ခရီးသွားလာရေးကိစ္စအတွက် ခက်ခဲလာခဲ့ခြင်းဖြစ်သည်။
မြဝတီ-ကော့ကရိတ် အာရှလမ်းမကြီးကို စစ်ကောင်စီနှင့် ကရင့်အမျိုးသားအစည်းအရုံး ကေအဲန်ယူ ဦးဆောင်သည့် တော်လှန်ရေးပူးပေါင်းတပ်တို့ကြား နေ့စဉ်နီးပါး တိုက်ပွဲဖြစ်ပွားနေသည့်အတွက် ပြီးခဲ့သည့် ၂၀၂၂ ခုနှစ်မှစတင်ပြီး ယနေ့ချိန်ထိ နှစ်နှစ်နီးပါး ပိတ်ထားဆဲဖြစ်ပြီး တရားဝင်ဖွင့်လှစ်နိုင်ခြင်း မရှိသေးပေ။
