ရခိုင်ပြည်နယ်၊ တောင်ကုတ်မြို့ရှိ အမှတ် ၅ စစ်ဆင်ရေးကွပ်ကဲမှုဌာနချုပ် (စကခ ၅) ကို သိမ်းပိုင်ပြီးနောက် ပြည်နယ်အတွင်း၌ အာရက္ခတပ်တော် AA ထိန်းချုပ်နယ်မြေ ၁၃ မြို့အထိ ရှိလာပြီ ဖြစ်သည်။
မြို့ပေါင်း ၁၇ မြို့ရှိသည့်အနက် တောင်ကုတ်အပါအဝင် ၁၂ မြို့သည် AA လက်အောက်သို့ အလုံးစုံကျရောက်နေပြီး အမ်းမြို့ကိုလည်း AA က ထိန်းချုပ်ထားသည်။
AA က မောင်တောမြို့ကို သိမ်းပိုက်ပြီး တစ်ပတ်ခန့်အကြာ ဒီဇင်ဘာလ ၁၄ ရက်နေ့တွင် တောင်ကုတ်မြို့ကိုပါ ထပ်မံသိမ်းပိုက်လိုက်ခြင်းဖြစ်သည်။
“တောင်ကုတ်ကိုလည်း မြို့က ရထားတာကြာပြီပေါ့နော်။ အခုဒီ စကခ ၅ နဲ့ အဲဒီနားက တပ်တွေကိုပါ သိမ်းလိုက်တာ။ ရခိုင်ပြည်နယ်မှာတော့ နောက်ထပ် အမ်းတို့ ဘာတို့မှာလည်း တိုက်ပွဲတွေက ဆက်ရှိနေပါတယ်” ဟု ရခိုင်စစ်ရေးသတင်းအရင်းအမြစ်က ပြောသည်။
တောင်ကုတ်မြို့နယ်တွင် အောက်တိုဘာလမှစတင်၍ တိုက်ပွဲများ ပြင်းထန်လာခြင်းဖြစ်ပြီး မြို့သိမ်း တိုက်ပွဲအတွက် နိုဝင်ဘာ ၄ ရက်နေ့မှစတင်ကာ AA က ထိုးစစ် ဆင်ခဲ့သည်။
၎င်းပြင် အမ်းမြို့အခြေစိုက် အနောက်ပိုင်းတိုင်းစစ်ဌာနချုပ် (နပခ) ကိုလည်း AA က ဝင်ရောက်တိုက်ခိုက်နေကြောင်း စစ်ရေးသတင်းအရင်းအမြစ်များက ပြောသည်။
“နပခကို ဝင်တိုက်နေပါပြီ။ မနေ့ကအထိဆိုရင် တဝက်လောက်ကို ရထားတယ်လို့ပြောလို့ရပြီ။ သိပ်မကြာတော့ဘူး” ဟု AA သတင်းအရင်းအမြစ်က ပြောသည်။
ရခိုင်ပြည်နယ်ရှိ မြေပုံ၊ မင်းပြား၊ မြောက်ဦး ၊ ကျောက်တော်၊ ပေါက်တော၊ ပုဏ္ဏားကျွန်း၊ ရသေ့ တောင်၊ ဘူးသီးတောင်၊ ရမ်းဗြဲ၊ သံတွဲ၊ မောင်တောမြို့၊ တောင်ကုတ်မြို့တို့နှင့် ပလက်ဝဒေသကို AA က သိမ်းပိုက်ထားသည်။
ရခိုင်ပြည်နယ် မြို့တော်ဖြစ်သည့် စစ်တွေ၊ ကျောက်ဖြူ၊ မာန်အောင်နှင့်ဂွ မြို့နယ်တို့ကို AA သိမ်းပိုက်ရန် ကျန်နေသည်။ တရုတ်စီမံကိန်းများရှိရာ စစ်တွေ၊ ကျောက်ဖြူနဲ့ မာန်အောင်တို့တွင် တိုက်ပွဲများ မရှိသေးသော်လည်း ဂွမြို့နယ်တွင် တိုက်ပွဲများရှိနေသည်။
