ထိုင်း- မြန်မာနယ်စပ် ဘုရားသုံးဆူဂိတ်ကို ဘုရားသုံးဆူမြို့ပေါ်ရှိ လက်နက်ကိုင် တပ်ဖွဲ့တို့က ခရီးသွားလာခြင်းနှင့် ကုန်တင်ကားများ ဖြတ်သန်းသွားလာခွင့်ကို ယာယီပိတ်ထားသည့်အပြင် ထိုင်းနိုင်ငံဘက်မှလည်းပိတ်ထားခြင်းေကြာင့် ကုန်ပစ္စည်းတင်ပို့မှု အခက်ကြုံနေရသည်ဟု ကုန်သည်တို့က ဆိုသည်။
ဇွန်လ ၁၇ ရက်နေ့နံနက်ပိုင်းမှစတင်ပြီး သွားလာခွင့်ကန့်သတ်ထားသဖြင့် ထိုင်းနိုင်ငံသို့ ကုန်ပစ္စည်း တင်ပို့/တင်သွင်းနေသည့်ကုန်သည်များ အခက်ကြုံနေသည့်အပြင် ကုန်ပစ္စည်းများပြတ်လတ်မှုနှင့် ဈေးနှုန်း ထပ်မံမြင့်တက်မှုဖြစ်ပေါ်နိုင်ကြောင်း ကုန်သည်နှင့် ဒေသခံတို့ကပြောသည်။
နယ်စပ်ဂိတ်ပိတ်ဖြတ်သန်းခွင့်ကို မည်သည့်အချိန်ပြန်လည်ခွင့်ပြုမည်ဟု ပြောဆိုထားခြင်းမရှိခြင်းကြောင့် ကုန်တင်ယာဉ်မောင်းတို့ လုပ်ငန်းရပ်နားထားသည်ဟု ဆိုသည်။
“ထိုင်းကနေဝင်တာရော ဒီဘက်ကနေထွက်တာရောအကုန်ပိတ်ထားတယ်။ အခြားလမ်းခြံစည်းရိုး ဘက်လူသွား လာဝင်လို့ရတယ် ပစ္စည်းတွေ ကတော့ ၁ထုပ်၂ထုပ်ပဲသယ်သွားလို့ရတယ်။မြဝတီဘက်ကလဲသွားလို့ မရတော့ ကျတော်တို့ ရပ်နားထားရတယ်၊အဓိကကသူတို့မပေးသွင်းဒီဘက်ကတရားမဝင်စီးဆင်းတာလို့ယူဆပြီး ပိတ်ထားတယ် ” ဟု ကုန်တင်ကားသမားတစ်ဦးက ဆိုသည်။
မြဝတီမြို့ဘက်တွင် ယခု မိုးရာသီကာလအတွင်း ကုန်တင်ကားများသွားလာရန် အခက်အခဲရှိနေသည့်အတွက် ယခုရက်ပိုင်းအတွင်း ဘုရားသုံးနယ်စပ်ဘက်တွင်သာ ဝင်ထွက်သွားမှုများနေသည်ဟု သိရသည်။
ဒေသတွင်းလက်နက်ကိုင်တပ်ဖွဲ့တို့က ဘုရားသုံးဆူလမ်းကြောင်းမှတစ်ဆင့် ကုန်စည်တစ်နိုင်တစ်ပိုင် တင်သွင်းခွင့်ကို တရားမဝင်ဟုယူဆကာ ကန့်သတ်နေခြင်းကြောင့်တရားမဝင်လမ်းကြောင်းမှတစ်ဆင့် ကူးသန်းရောင်းဝယ်ကာဝင်ထွက်သွားလာမှု ရှိနေသည်ဟု ဘုရားသုံးဆူမြို့အတွင်း ကုန်တင်ကားမောင်းနှင်နေသူတစ်ဦးက ဆိုသည်။
“မြဝတီလမ်းကြောင်းကလုံးဝသွားလာလို့မရတော့ဒီဘက်ပြောင်းသွင်းကြတာများတော့အခုလိုလုပ်လိုက်တာ တာအခုကတော့ကုန်စည်ကူးသန်းမှုကရပ်နေတယ်ပေါ့၊ ဒီဘုရားသုံးဆူဘက်ကနေလာတဲ့ တစ်လျှောက်လုံးက စစ်ဆေးနေတဲ့အခါဘယ်ဘက်မှသူတို့မသွင်းခိုင်းဘူး။ တစ်နိုင်တစ်ပိုင်ပဲသွင်းနေကြတယ် ” ဟု ဆိုသည်။
ဘုရားသုံးဆူနယ်စပ်ဂိတ်မှ တစ်ဆင့် ကုန်ပစ္စည်းတင်သွင်း တင်ပို့မှုလုပ်ဆောင်နေခြင်းသည် တရားဝင်သဘောအရမဟုတ်ဘဲ ထိုင်းအာဏာပိုင်တို့နှင့် ညှိနှိုင်းနားလည်မှုယူကာ တင်သွင်းနေသည့် ဂိတ်တစ်ခုသာဖြစ်သည်။
မြန်မာနိုင်ငံဘက်မှ ဆန်၊ ကြက်သွန်နီ၊ ငါးများ စသည့်ကုန်ပစ္စည်းတို့တင်ပို့ပြီး ထိုင်းနိုင်ငံဘက်မှ အလှကုန်ပစ္စည်းများ၊ အိမ်ဆောက်ပစ္စည်းနှင့်
စားသောက်ကုန်ပစ္စည်းများ တင်သွင်းနေကြောင်းလည်း ကုန်သည်တို့ထံမှ သိရသည်။
လက်ရှိတွင် ထိုင်း- မြန်မာနယ်စပ်ကုန်သွယ်ရေးဖြစ်သည့် မြဝတီနယ်စပ်ဂိတ်အပါအဝင် တာချီလိတ် ၊ မယ်ဆိုင်၊ မြဝတီ- မဲဆောက်၊ ထီးခီး -နမ့်ဖုရော်နှင့် ကော့သောင်း-ရနောင်းစသည့် နယ်စပ်ဂိတ်တို့တွင် တိုက်ပွဲ အခြေအနေနှင့် လမ်းပန်းဆက်သွယ်ရေးအခက်ခဲကြောင့် ကုန်စည်စီးဆင်းမှုနှောင့်နှေးလျက်ရှိသည်။
