မွန်ပြည်နယ်၊ သထုံမြို့နယ်နှင့် ဘီးလင်းမြို့နယ်အစပ် ရန်ကုန်-မော်လမြိုင်ကားလမ်ပေါ်ရှိ ကျုံအိတ်တံတား ယနေ့ မေလ ၁၁ ရက်နေ့ နံနက်အစောပိုင်းက ထပ်မံမိုင်းခွဲဖျက်ဆီးခံခဲ့ရပြီး လမ်းပန်းဆက်သွယ်ရေး ပြတ်တောက်သွားကြောင်း ဒေသခံတို့ထံမှ သိရသည်။
ကျုံအိတ်တံတားဘက်တွင် ယနေ့ နံနက် ၂ နာရီဝန်းကျင်အချိန်ခန့် ပစ်ခတ်သံများကြားရပြီး နံနက် ၃ နာရီအချိန်ခန့်တွင် ပေါက်ကွဲသံအကျယ်ကြီးကြားလိုက်ရကြောင်း ဒေသခံတစ်ဦးက ပြောသည်။
“အရင်တစ်ခါ မိုင်းခွဲခံရလို့ ကျန်ခဲ့တဲ့ တံတားတခြမ်းရော၊ ဘေလီတံတားထိုးထားတဲ့အခြမ်းရော ပျက်ဆီးသွားတယ်။ လောလောဆယ် ရန်ကုန်-မော်လမြိုင်ကားလမ်း အဆက်အသွယ်ပြတ်သွားပြီး” ဟု ၎င်းဒေသခံက ဆက်ပြောသည်။
မိုင်းခွဲခံရမှုကြောင့် တံတားသည် လုံးဝပြိုကျပျက်စီးသွားသည့်အတွက် ကားများ ဖြတ်သန်းသွားလာလို့မရတော့ကြောင်း၊ မော်လမြိုင်မြို့ဘက်မှ အိမ်စီးကားများနှင့် ခရီးသည်တင်ယာဉ်များ မော်လမြိုင်မြို့ဘက်သို့ ပြန်လှည့်လာကြကြောင်း ခရီးသွားပြည်သူတစ်ဦးက ပြောသည်။
“အခြေအနေကတော့ ကားလမ်းသွားမရတော့ဘူး။ အရေးကြီးရင်တော့ လေကြောင်းလမ်းကနေဘဲ သွားလာလို့ရတော့မယ်” ဟု ၎င်းက ပြောသည်။
သထုံမြို့နယ်နှင့် ဘီးလင်းမြို့နယ်ကြား ရန်ကုန် – မော်လမြိုင်ကားလမ်း မိုင်တိုင်အမှတ် (၁၃၁/၆) နှင့် (၁၃၁/၇) ကြားရှိ တံတားအမှတ် (၁၃၂/၃) ကျုံအိတ်တံတားကို KNU တပ်မဟာ (၁) ၊ တပ်ရင်း (၂) မှ KNLA/PDF ပူးပေါင်းတပ်ဖွဲ့တို့က ပြီးခဲ့သည့်နှစ် ဇွန်လ ၂၉ ရက်နေ့က မိုင်းခွဲဖျက်ဆီးခဲ့သေးသည်။
ပထမအကြိမ် တံတားမိုင်းခွဲခံရစဉ်က တံတားတခြမ်းပြိုကျသွားခဲ့ပြီး အိမ်စီးကား ၃ စီးပါသွားကာ အမျိုးသားတစ်ဦးသေဆုံးခဲ့ပြီး တစ်ဦးထိခိုက်ဒဏ်ရာရရှိခဲ့သည်။
