မွန်ပြည်တော်လှန်ရေးတပ် MSRF မှ မွန်ဒေသရှိ တော်လှန်ရေးရဲဘော်များအတွက် “သင်္ကြန်ထမင်းတစ်နပ်” ကမ်ပိန်းကို သင်္ကြန်လဖြစ်သည့် ဧပြီလ ၁ ရက်နေ့မှ ၃၀ ရက်နေ့အထိ ပြုလုပ်လျှက်ရှိကြောင်း သိရသည်။
ယခုကမ်ပိန်းသည် မွန်ပြည်အတွင်း စစ်အာဏာရှင်ဆန့်ကျင်ရေးအတွက် တိုက်ပွဲဝင်နေကြသည့် မိမိတို့တော်လှန်ရေးတပ်- MSRF မှ အိမ်ပြေးရဲဘော်တို့ အိမ်အလွမ်းပြေသင်္ကြန်ထမင်းတစ်နပ် စားနိုင်ရန် ရည်ရွယ်ပြုလုပ်သည့် ကမ်ပိန်းဖြစ်သည်ဟု မွန်ပြည်တော်လှန်ရေးတပ် MSRF မှ ပြောရေးဆိုခွင့်ရှိသူ နိုင်နဂါးက ပြောသည်။
“ ရဲဘော်တွေက တော်လှန်ရေးနယ်မြေထဲကို ၂ နှစ် ၃ နှစ်လောက်ရောက်လာခဲ့ပြီးလေ၊ သင်္ကြန်ရောက်တိုင်းလည်း ရဲဘော်တွေ အိမ်မပြန်ရတာကြာပြီး၊ အိမ်လွမ်းနေတဲ့သူတို့တွေ အိမ်အမြန်ပြန်ရောက်နိုင်ပြီး လူစုံတက်စုံ အိမ်သင်္ကြန်ထမင်းစားနိုင်ဖို့ နောက်တစ်ခုက ဒီကမ်ပိန်းကရတဲ့အလှူငွေတွေကို တော်လှန်ရေးထဲထည့်မယ်၊ တော်လှန်ရေးမြန်မြန်ပြီးမှ အိမ်အမြန်ပြန်နိုင်မှာဖြစ်တာမို့ ဒါကြောင့် ဒီကမ်းပိန်းလေးကိုစီစဉ်လိုက်တာပါ” ဟု ဆိုသည်။
ကမ်ပိန်းကို ထိုင်းငွေ ဘတ် ၁၀၀ ( သို့ ) မြန်မာငွေ ကျပ် ၁ သောင်းကျပ်ဖြင့် ပါဝင်အားဖြည့်နိုင်ပြီး မိမိတို့အားပေး ပြောဆိုလိုသည့် ပေးစာတို့ကိုလည်း MSRF စာမျက်နှာမှတစ်ဆင့် ရေးသားပေးပို့နိုင်ကြောင်း ဖော်ပြထားသည်။
“ဒီငွေပမာဏလောက်က မများဘူးဆိုတော့ မည်သူမဆိုပါဝင်လာနိုင်တယ်။ ဒါနဲ့ပတ်သက်ပြီးတော့လည်း မျှော်မှန်းထားတာထက် ပိုပြီးတော့များတယ်။ ဒါပေမဲ့ တော်လှန်ရေးဆိုတာက အောင်မြင်တဲ့အထိ တိုက်ပွဲဝင်ရမှာဆိုတော့ မျှော်မှန်းထားတာက အကန့်အသတ်မရှိဘူး။ ထောက်ပံ့နိုင်သလောက် ထောက်ပံ့ကြမယ်ဆိုရင် ရဲဘော်တွေလည်းများလာမယ်။ လုပ်စရာတွေလည်းများလာမယ်လေ ” ဟု နိုင်နဂါးက ဆက်ပြောသည်။
MSRF တွင် တပ်သားသစ်တိုးလာသည်နှင့်အမျှ လက်နက်ခဲယမ်းလိုအပ်ချက်ရှိခြင်းလာခြင်းကြောင့် ရရှိလာသည့် အလှူငွေများကိုလည်း တပ်တွင်းလိုအပ်သည့်နေရာတွင် အသုံးပြုသွားမည်ဖြစ်သည်ဟု ဆိုသည်။
သင်္ကြန်ထမင်းသည် မွန်လူမျိုးတို့၏ ရိုးရာအစားအစာတစ်ခုအဖြစ် ဘိုးဘွားစဉ်ဆက်ကပင် တည်ရှိလာခဲ့ပြီး စစ်တပ်အာဏာသိမ်းပြီးနောက်ပိုင်း အိမ်သင်္ကြန်ထမင်းနှင့် ဝေးကွာနေသည့် ရဲဘော်တို့ကို ဝိုင်းဝန်းကူညီထောက်ပံ့ရန်လည်း တိုက်တွန်းထားသည်။
