မွန်ပြည်ဖက်ဒရယ်ကောင်စီ MSFC နှင့် မွန်ပြည်နယ်တောင်ပိုင်းရှိ လက်နက်ကိုင် တော်လှန်ရေးမဟာမိတ်အဖွဲ့အစည်းများနှင့် မြေပြင်တွင် တွေ့ဆုံခဲ့ကြောင်း MSFC က ထုတ်ပြန်သည်။
စစ်အာဏာရှင်စနစ်ကို တွန်းလှန်ပြီး ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးအတွက် တိုက်ပွဲဝင်လှုပ်ရှားနေကြသည့် ဒေါနစစ်ကြောင်းအပါအဝင် မွန်ပြည်နယ်တောင်ပိုင်း တော်လှန်ရေးအဖွဲ့အစည်း ၁၀ ဖွဲ့ခန့်တို့နှင့် ဒီဇင်ဘာလ ၁၁ ရက်နေ့က တော်လှန်ရေးနယ်မြေတခုတွင် တွေ့ဆုံခဲ့သည်ဟု ဆိုသည်။
စစ်ရေး၊ စစ်လက်နက်ပစ္စည်းနှင့် မသက်ဆိုင်သည့် အခြားအရေးကြီးသော ကိစ္စရပ်များ ဆွေးနွေးရန်အတွက်လည်း မြေပြင်အစည်းအဝေးပွဲတရပ် ပြုလုပ်ခဲ့သည်ဟု MSFC က ထုတ်ပြန်ထားသည်။
အစည်းအဝေးတွင် MSFC အုပ်ချုပ်ရေးကော်မတီဥက္ကဌမှ ဦးဆောင်ပြီး ရိက္ခာနှင့် တပ်ဖွဲ့ဝင်တို့၏ မိသားစုကိစ္စများ၊ ရှေးဦးသူနာပြုသင်တန်းနှင့် ကျန်းမာရေးကိစ္စများ၊ စစ်ဘေးသင့်ပြည်သူတွေအတွက် လူသားချင်းစာနာထောက်ထားမှု အကူအညီများပံ့ပိုးပေးသွားနိုင်ရေး အစရှိသည့်ကိစ္စရပ်များကို ဆွေးနွေးခဲ့သည်ဟု သိရသည်။
အဆိုပါ တွေ့ဆုံမှုတွင် MSFC အုပ်ချုပ်ရေးကော်မီတီမှ ကာကွယ်ရေးဌာန၊ ကျန်းမာရေးဌာန၊ လူသားချင်းစာနာမှု/ ကယ်ဆယ်ရေးဌာန၊ အမျိုးသမီး၊ လူငယ်၊ ကလေးသူငယ်နှင့် ဂျန်ဒါတန်းတူရေးဌာန၊ သတင်းပြန်ကြားရေးနှင့် လူထုဆက်ဆံရေးဌာနတို့အပြင် ဥပဒေပြုရေးကော်မီတီမှ တာဝန်ရှိသူများလည်း တက်ရောက်ခဲ့သည်ဟု ထုတ်ပြန်ထားသည်။
