မွန်ပြည်နယ်၊ ဘီးလင်းမြို့နယ်အတွင်း စစ်ကြောင်းထိုးဝင်ရောက်လာသည့် စစ်ကောင်စီတပ်နှင့် ကရင်အမျိုးသားလွတ်မြောက်ရေးတပ်မတော် (KNLA) ပူးပေါင်းတပ်ဖွဲ့တို့အကြား ထိတွေ့တိုက်ပွဲ ဖြစ်ပွားခဲ့ကြောင်း သိရသည်။
ဘီးလင်းမြို့နယ်အတွင်း စစ်ကြောင်းထိုးရန် မေ ၁၈ ရက်နေ့က မဲလံဘက်မှ ဆင်းလာသော အင်အား ၁၀၀ ခန့်ရှိ စစ်ကောင်စီစစ်ကြောင်းကို KNLA ပူးပေါင်းတပ်ဖွဲ့တို့က နယ်ခြားရွာအနီးတွင် ထိတွေ့တိုက်ပွဲဖြစ်ပွားခဲ့သည်ဟု ကျိုက်ထိုတော်လှန်ရေးအင်အားစု KRF က ထုတ်ပြန်ထားသည်။
နှစ်ဖက်ထိတွေ့ ပစ်ခတ်မှု ၁၂ မိနစ်ကြား ဖြစ်ပွားခဲ့ပြီး စစ်ကောင်စီဘက်မှ ၃ ဦး သေဆုံးကြောင်းလည်း KRF က ထုတ်ပြန်ထားသည်။
“ဒီဘက်မှာ သေနတ်တွေသံကတော့ နေ့တိုင်းလိုလိုကြားနေရတယ်။ စစ်တပ်ကလည်း စစ်ကြောင်းထိုးလာတာရှိနေတော့ ရွာထဲမှာလဲ မနေရဲကြတော့ဘူး။ တိုက်ပွဲကလည်း အချိန်မရွေးဖြစ်နိုင်တယ်လေ” ဟု ဘီးလင်းဒေသခံတစ်ဦးက ပြောသည်။
မေလ ၁၅ ရက်နေ့ကလည်း အင်အား ၁၀၀ ခန့်ရှိသည့် စစ်ကောင်စီစစ်ကြောင်းသည် မဲဝိုင်းဘက်မှ ဘီးလင်းမြို့နယ်ထဲ စစ်ကြောင်းထိုးလာသည့်အတွက် KNLA ပူးပေါင်းတပ်ဖွဲ့တို့နှင့် အစူးချောင်းကျေးရွာဘက်တွင်
ထိတွေ့တိုက်ပွဲ ၂ ကြိမ်ဖြစ်ပွားခဲ့သည်။
မေလ ၁၆ ရက်နေ့တွင် အဆိုပါစစ်ကြောင်းထိုးလာသည့် စစ်ကောင်စီတပ်စစ်ကြောင်းနှင့် KNLA ပူးပေါင်းတပ်ဖွဲ့တို့ ၄ ကြိမ် ထိတွေ့တိုက်ပွဲ ထပ်မံဖြစ်ပွားခဲ့သေးကြောင်းလည်း သိရသည်။
လက်ရှိတွင် တိုက်ပွဲဖြစ်ပွားနေခြင်းကြောင်း ဘီးလင်းမြို့နယ်အတွင်းက အစူးချောင်းကျေးရွာနှင့် အနီးနားဝန်းကျင်က ကျေးရွာ ၃ ရွာထက်မနည်းက ထောင်နှင့်ချီသည့် ဒေသခံပြည်သူများ ဘေးလွတ်ရာသို့ ထွက်ပြေးတိမ်းရှောင်နေကြရသည်ဟု သိရသည်။
