မြန်မာ-ထိုင်းနယ်စပ် မြဝတီမြို့ မြောက်ဘက်ရှိ ရွှေကုက္ကိုလ်မြို့သစ်အနီးတွင် ဧပြီလ ၅ ရက်နေ့က ဖြစ်ပွားခဲ့သည့် တိုက်ပွဲကြောင့် ဒေသခံပြည်သူ ၃၀၀၀ ကျော် ထိုင်းနိုင်ငံဘက်သို့ ထွက်ပြေး တိမ်းရှောင်နေကြရကြောင်း ဒေသခံများထံမှ သိရသည်။
ထိုင်းနိုငံဘက်သို့ ထွက်ပြေးတိမ်းရှောင်နေကြသူများထဲတွင် ရွှေကုက္ကိုလ်မြို့သစ်အနီးရှိ ထီကော်ထော၊ ထီးချရား၊ ထီးဝါးပလလော အစရှိသည့်ကျေးရွာများမှ ဒေသခံများအပြင် ရွှေကုက္ကိုလ်မြို့သစ်ရှိ လောင်းကစားရုံများတွင် အလုပ်လုပ်ကိုင်နေကြသူများလည်း ပါဝင်ကြောင်း သိရသည်။
“မနေ့က ရွှေကုက္ကိုလ်မြို့သစ်အနီးမှာ စစ်ကောင်စီလက်အောက်ခံ BGF တပ်နဲ့ တော်လှန်ရေးအင်အားစုပူးပေါင်းတပ်ဖွဲ့တွေ တိုက်ပွဲတွေဖြစ်တော့ ဒေသခံတွေအပြင် ကာစီနိုရုံတွေမှာ အလုပ်လုပ်နေကြတဲ့ တရုတ်တွေရော၊ အလုပ်သမားတွေပါ ထိုင်းနိုင်ငံဘက်ကို ပြေးကြရတယ်” ဟု ထွက်ပြေးတိမ်းရှောင်နေရသည့်ဒေသခံတစ်ဦးက ပြောသည်။
ရွှေကုက္ကိုလ်မြို့သစ်အနီးဝန်းကျင်းဒေသမှ စစ်ဘေးတိမ်းရှောင်သူများသည် သောင်ရင်းမြစ်တစ်ဖက်ကမ်း ထိုင်းနိုင်ငံဘက်ခြမ်းရှိ ထာ့စိုင်းဂိတ်၊ နောင်ဘိုးဝါဒဲ (ကြာနီနွားခြံ၊ ထာ့ (၃၄) ဂိတ် နှင့်အခြားနေရာများတွင် ခိုလှုံနေကြရပြီး အစားအစာနှင့် ဆေးဝါးလိုအပ်ချက်များရှိနေကြောင်း ဆိုသည်။
ဧပြီလ ၅ ရက် နံနက်အစောပိုင်းက ရွှေကုက္ကိုလ်မြို့သစ်အနီးရှိ စစ်ကောင်စီလက်အောက်ခံ နယ်ခြားစောင့်တပ် (BGF) ပူးပေါင်းတပ်ဖွဲ့တို့၏ စခန်းများအား တော်လှန်ရေးပူးပေါင်းတပ်ဖွဲ့တို့က ဝင်ရောက်စီးနင်းတိုက်ခိုက်ခဲ့ပြီး နှစ်ဖက်တိုက်ပွဲပြင်းထန်ခဲ့သည်။
အဆိုပါတိုက်ပွဲဖြစ်စဥ်အတွင်း စစ်ကောင်စီဘက်မှ လေကြောင်း ပစ်ခတ်မှုများရှိခဲ့ကြောင်း ဧပြီလ ၆ ရက် နံနက်ပိုင်းအထိ ရွှေကုက္ကိုလ်မြို့သစ်ဘက်တွင် ပစ်ခတ်ကြားနေရသေးကြောင်း ဒေသခံများထံမှ သိရသည်။
ထိုသို့ မြန်မာ-ထိုင်းနယ်စပ်အနီးရှိ ရွှေကုက္ကိုလ်မြို့သစ်အနီးတွင် တိုက်ပွဲများဖြစ်ပွားနေသည့်အတွက် ထိုင်းနိုင်ငံဘက်မှလည်း လုံခြုံရေးတိုးမြှင့်ချထားသည်ကို တွေ့ရကြောင်း စစ်ဘေးရှောင်များထံမှ သိရသည်။
