မွန်ပြည်နယ်၊ ပေါင်မြို့နယ် မုတ္တမမြို့က စိတ်ကျန်းမာရေးမကောင်းသူ အမျိုးသားတစ်ဦး ယနေ့ မတ်လ ၂၀ ရက်နေ့ နံနက်ပိုင်းက ဆွဲကြိုးချ သေဆုံးမှုဖြစ်ပွားခဲ့ကြောင်း သိရသည်။
ဆွဲကြိုးချသေဆုံးခဲ့သူမှာ မုတ္တမမြို့၊ မြင်းတပ်ရပ်ကွက်နေ အသက် ၅၀ နှစ်အရွယ်ရှိ အမျိုးသားတစ်ဦးဖြစ်ကြောင်း မြို့ခံတို့ထံမှ သိရသည်။
“သေဆုံးသူက အိမ်မှာ တစ်ယောက်တည်းနေနေတဲ့သူပါ။ သူ့ရဲ့အဖေက မရှိတော့ဘူး။ ကွယ်လွန်သွားပြီး။ သူ့အမေကတော့ သီလရှင်ဝတ်ထားတယ်လို့ သိရတယ်။ ဒီနေ့မနက် (၈) နာရီလောက်မှာ သူ့အိမ်ပေါ်မှာ ဆွဲကြိုးချသေဆုံးနေတာတွေ့ကြလို့ သက်ဆိုင်ရာကို အကြောင်းကြားပေးခဲ့ကြတာပါ။ သူက စိတ်ကျန်းမာရေးသိပ်မကောင်းဘူး” ဟု မြို့ခံတစ်ဦးက ပြောသည်။
ဆွဲကြိုးချသေဆုံးခဲ့သူ၏ ရုပ်အလောင်းအား ရာမညအရေးပေါ်လူမှုကူညီကယ်ဆယ်ရေးအဖွဲ့ လူနာတင်ယာဉ်ဖြင့် မုတ္တမဆေးရုံသို့ ပို့ဆောင်ပေးခဲ့ကြောင်း သိရသည်။
ပြီးခဲ့သည့် မတ်လ ၁၇ ရက်နေ့က မော်လမြိုင်မြို့၊ ဖက်တန်းရပ်ကွက် ဒေါင်းမင်းရပ်နေ အသက် ၄၀ နှစ်အရွယ်ခန့်ရှိ အမျိုးသမီးတစ်ဦး ဆွဲကြိုးချသေဆုံးမှုဖြစ်ပွားခဲ့သေးသည်။
မတ်လ ၁၆ ရက်နေ့ကလည်း ရေးမြို့နယ် ရန်ကြီးအောင်ရပ်ကွက်မှ အမျိုးသားတစ်ဦးလည်း ဆွဲကြိုးချ သေဆုံးမှုဖြစ်ပွားခဲ့သည်။
