မွန်ပြည်နယ်အတွင်းမှ တိုင်းနှင့် ပြည်နယ်အသီးသီးသို့ ပြေးဆွဲနေသည့် အဝေးပြေးယာဉ်လိုင်းများ ခရီးသည်မရှိသောကြောင့် ယာဥ်လိုင်းအချို့ ရပ်နားပြီး အချို့ ကားအစီးရေလျော့ချ ပြေးဆွဲနေရကြောင်း အဝေးပြေးယာဉ်လိုင်းလုပ်ငန်းရှင်များထံမှ သိရသည်။
မော်လမြိုင်-ရန်ကုန်အဝေးပြေးလမ်းမပေါ် ညောင်ခါးရှည်ရွာအနီးက စစ်ဆေးရေးဂိတ်ကြောင့် လမ်းခရီး ကြန့်ကြာမှုများရှိနေသည့်အတွက် မော်တော်ယာဥ်ဖြင့် ခရီးသွားလာသူ လျော့ကျလာခဲ့ကြောင်း အဝေးပြေးယာဉ်လိုင်းတို့ထံမှ သိရသည်။
ခရီးသည်များ မရှိသည့်အတွက် အဝေးပြေးယာဥ်လိုင်းများ အရှုံးပေါ်ပြီး အချို့က ရပ်နားသွားကာ အချို့က ယာဥ်အစီးရေလျှော့ချ ပြေးဆွဲနေသည်ဟုလည်း အဝေးပြေးယာဉ်လိုင်းတာဝန်ရှိသူတို့က ပြောသည်။
“အရင်လို မဟုတ်ဘူး။ စစ်ဆေးရေးဂိတ်တွေမှာ တန်းစီရတာ တော်တော်အချိန်ကြာတာကြောင့်လည်းပါတယ်။ ခရီးသည်က မရှိတော့ဘူး။ ဆီဖိုးနဲ့က ဘယ်လိုမှ မကိုက်ဘူး အဲဒါကြောင့် အခုဆို ပုံမှန် နှစ်စီးသွားနေတာကို တစ်စီးပဲ ပြေးတော့တယ်”ဟု မော်လမြိုင်-ရန်ကုန်သို့ ပြေးဆွဲနေသည့် အဝေးပြေးယာဉ်လိုင်းတစ်ခုမှ တာဝန်ခံတစ်ဦးက ပြောသည်။
ယခင်က မော်လမြိုင်-ရန်ကုန်သို့ မော်တော်ယာဥ်သုံးစီးဖြင့် မနက်၊ နေ့လည်ဆိုပြီး နှစ်ချိန်ပြေးဆွဲခဲ့သော်လည်း ယခုအခါ ခရီးသည်မရှိသည့်အတွက် မနက်ပိုင်း တစ်စီးသာ ပြေးဆွဲနေရသည်ဟုလည်း ၎င်းက ထပ်ပြောသည်။
ခရီးသည်များ မရှိသည့်အတွက် မွန်ပြည်နယ်က အဝေးပြေး ယာဉ်လိုင်း ၂၀ ကျော် ရပ်နားသွားပြီးလို့လည်း အဝေးပြေးယာဉ်လိုင်းတာဝန်ရှိသူတို့က ပြောသည်။
မော်လမြိုင်-ရန်ကုန်-ထားဝယ်သို့ ပြေးဆွဲနေသည့် ယာဉ်လိုင်းတစ်ခုမှ တာဝန်ရှိသူ တစ်ဦးကလည်း “အရင်လို ခရီးသည်တွေ မရတော့ဘူး။ ခရီးသည်မရလို့ ကုန်ပစ္စည်း အားကိုးရမလားဆိုတော့လည်း ကန့်သတ်ကုန်တွေရယ် ဖောက်စစ်တာတွေရယ်ကြောင့် ထင်သလောက်တော့ ပစ္စည်းမတင်ရဘူး”ဟု ပြောသည်။
ယခင်က မွန်ပြည်နယ်အတွင်းမှ အခြား တိုင်းနှင့်ပြည်နယ်အသီးသီးသို့ ပြေးဆွဲနေသည့် ယာဉ်လိုင်း ၇၃ လိုင်း ရှိခဲ့သော်လည်း ယခုအခါ ယာဉ်လိုင်းသုံးပုံတစ်ပုံခန့်က ရပ်နားသွားခဲ့သည်။
