မွန်သတင်းအေဂျင်စီ (၂၀၂၂ ဇွန် ၂၅)
မွန်အမျိုးသားကောလိပ် ကျောင်းစတင်ဖွင့်လှစ်ပွဲနှင့် ကျောင်းသားများအား ကြိုဆိုပွဲအခမ်းအနားကို မွန်ပြည်သစ်ပါတီ (NMSP) ဗဟိုဌာနချုပ်ရှိ မွန်အမျိုးသားပညာရေးဌာန ညီစားစခန်းတွင် ဇွန်လ ၂၂ ရက်နေ့က ကျင်းပခဲ့သည်။
အဆိုပါအခမ်းနားသို့ မွန်ပြည်သစ်ပါတီ ဗဟိုအထွေထွေအတွင်းရေးမှူး နိုင်ကျော်ယဲ့ (နာဲဇဲယျ) ဦးဆောင်သော ဗဟိုအလုပ်အမှုဆောင်အဖွဲ့၊ မွန်အမျိုးသားပညာရေးဌာန တာဝန်ခံ မိသာဍာ၊ ကောလိပ်ကျောင်းတွင် သင်ကြားမည့် ဆရာ/ဆရာမများ တက်ရောက်ခဲ့ကြသည်။
မွန်အမျိုးသားပညာရေးဌာန လက်အောက်တွင် အခြေခံပညာအဆင့်မှ အထက်တန်းလွန် (Post Ten) အထိဖွင့်လှစ်ခဲ့ရာမှ ယခုနှစ်တွင် တိုးမြင့်ဖွင့်လှစ်လာသည့် မွန်အမျိုးသားကောလိပ်တွင် ဒုတိယနှစ် Pop Htaw ကျောင်းသား ၁၂၀ ဦးနှင့် ပထမနှစ်ကျောင်းသားသစ် ၁၄၀ ဦးတို့ တက်ရောက်သင်ကြားသွားမည်ဖြစ်သည်။
တက်ရောက်ပညာသင်ကြားနေသည့် ကျောင်းသား/ကျောင်းသူအများစုသည် ရေးတောင်ပိုင်းနှင့် မြောက်ပိုင်းဒေသမှ ဖြစ်ကြပြီး ကိုဗစ်ကာလနှင့် စစ်အာဏာသိမ်းကာလတွင် အကြောင်းအမျိုးမျိုးကြောင့် အစိုးရတက္ကသိုလ်ကျောင်းများမှ ရပ်နားထားကြသည့် ကျောင်းသားများ ပါဝင်ကြောင်း သိရသည်။
ယခုဖွင့်လှစ်သည့် မွန်အမျိုးသားပညာရေးကောလိပ်တွင် ၃ နှစ်တိတိ ပညာသွားကြမည်ဖြစ်ပြီး ကျောင်းပြီးပါက မွန်အမျိုးသားရေးဌာန လုပ်ငန်းခွင်များတွင် ၂ နှစ်ခန့် အလုပ်သင်တာဝန် ထမ်းဆောင်သွားရမည် ဖြစ်ကြောင်း MNEC တာဝန်ရှိသူများထံမှ သိရသည်။
