မွန်သတင်းအေဂျင်စီ (၂၀၂၁ ဒီဇင်ဘာ ၃)
သထုံမြို့ ရွှေစာရံဘုရားရှေ့ ရုပ်သေးကုန်းတွင် ဒီဇင်ဘာလ ၂ ရက်နေ့ ညပိုင်း၌ ဗုံးပေါက်ကွဲခဲ့ပြီးနောက် Sunday KTV ဆိုင်ပိုင်ရှင်နှင့် သားဖြစ်သူအပါအဝင် ၁၉ ဦး ဖမ်းဆီးခံခဲ့ရကြောင်း သိရသည်။
Sunday စားသောက်ဆိုင်ပိုင်ရှင် ဒေါ် အိမွန်က ” ကျွန်မ ခင်ပွန်းနဲ့ သား၊ မောင်နဲ့ ဇနီး၊ မွေးနေ့အတွက် လာလည်တဲ့ ဧည့်သည် တွေနဲ့ ဆိုင်ဝန်ထမ်း ပေါင်း 19 ယောက်ပါ။ ကျွန်မတစ်ယောက်ထဲ အပြင်မှာကျန်နေခဲ့တာပါ။ ကျန်တဲ့သူတွေကတော့အကုန်အချုပ်ထဲမှာ”လို့ ဆိုသည်။
အဆိုပါ Sunday KTV သို့ ဒီဇင်ဘာလ ၂ ရက်နေ့ညတွင် စစ်တပ်မှ အရာရှိတစ်ဦးနှင့် အခြားတစ်ဦးတို့ လာရောက်ခဲ့ပြီး အပြန်ဘက်တွင် ရွှေစာရံဘုရားအနီး၊ ပိဋကတ်သုံးပုံ အဝိုင်းအနီး၌ ည ၁၁ နာရီ ၃၀ ခန့်တွင် ဗုံးဖြင်တိုက်ခိုက်ခံရသည့်ဖြစ်စဥ်အပေါ် ဆိုင်ပိုင်ရှင်နှင့် သားဖြစ်သူအပါအဝင် ဆိုင်ဝန်ထမ်းအားလုံးကို ဖမ်းဆီးခေါ်ဆောင်ခဲ့ခြင်းဖြစ်သည်။
အထက်ပါဖြစ်စဥ်နှင့်ပတ်သက်၍ သထုံမြို့နယ်ရဲစခန်းသို့ဆက်သွယ်မေးမြန်းခဲ့သော်လည်း လက်ခံဖြေကြားခြင်း မရှိခဲ့ပေ။
Sunday KTV ဆိုင်သည် ၂၀၂၀ ဒီဇင်ဘာလတွင် ကိုဗစ်ကာလ အစိုးရညွှန်ကြားချက်ကိုမလိုက်နာဘဲ ဆိုင်ဖွင့်လှစ်ခဲ့မှုကြောင့် မန်နေဂျာအပါအဝင် ၁၉ ဦးခန့်ဖမ်းဆီးထိန်းသိမ်းခံခဲ့ရသည့် ဖြစ်စဥ် ရှိခဲ့သည်။
