မွန်သတင်းအေဂျင်စီ (၂၀၂၁ နိုဝင်ဘာ ၁)
မော်လမြိုင်မြို့နယ် အမျိုးသားဒီမိုကရေစီအဖွဲ့ချုပ် NLD ပါတီရုံး ယမန်နေ့ (အောက်တိုဘာလ ၃၁ ရက်နေ့) နံနက် ၃ နာရီအချိန်ခန့်က ဗုံးခွဲ ဖျက်ဆီးခံခဲ့ရကြောင်း သတင်းရရှိသည်။
“မနက် ၃ နာရီလောက်က ဖြစ်သွားတာ၊ ဘေးနားအိမ်တွေ မှန်နည်းနည်းကွဲတယ် ရုံးအတွင်းပိုင်းမှာတော့ ကြီးကြီးမားမားပျက်စီးတာမျိုးမရှိဘူး။ ဗီနိုင်းလောက်ပဲထိသွားတာ” ဟု အဆိုပါရုံးအနီးအနားရှိ မြို့ခံတစ်ဦးက ဆိုသည်။
ဗုံးပေါက်ကွဲမှုကြောင့် NLD ပါတီရုံး ဗီနိုင်းနှင့်အဆောက်အဦး အနည်းငယ်ထိခိုက်ပျက်စီးခဲ့ပြီး ရုံးအနီးတွင်ရပ်ထားသော ကားနှစ်စီးမှ မှန်များနှင့် အနီးနားမှအိမ်ရှိမှန်များ ပျက်စီးခဲ့ကြောင်း သိရသည်။
စစ်အာဏာသိမ်းပြီးကတည်းက အဆိုပါ မော်လမြိုင်မြို့နယ်ရုံးကို ပိတ်ထားခဲ့ကြောင်း သတင်းရရှိသည်။
ထို့ပြင် NLD မော်လမြိုင်မြို့နယ် ဥက္ကဌ ဒေါ်နွယ်နွယ်အောင်ကိုလည်း မကြာမီရက်ပိုင်းအတွင်းက အာဏာပိုင်များ ဖမ်းဆီးထိန်းသိမ်းခဲ့ကြောင်း သတင်းများက ဖော်ပြသည်။
သို့ရာတွင် အဆိုပါ NLD ပါတီရုံးဗုံးပေါက်မှုများနှင့်ပတ်သက်၍ မော်လမြိုင်မြို့နယ် ရဲစခန်းသို့ ဆက်သွယ်မေးမြန်းခဲ့သော်လည်းလက်ခံဖြေကြားခြင်းမရှိခဲ့ပါ။
အလားတူ ကျိုက်ထို၊ ဘီးလင်းနှင့်သထုံမြို့နယ်ရှိ NLD ပါတီ မြို့နယ်ရုံးများသည်လည်း အောက်တိုဘာလအတွင်း ဗုံးခွဲဖျက်ဆီးခံခဲ့လိုက်ရသည်။
