မွန်သတင်းအေဂျင်စီ (၂၀၂၁ စက်တင်ဘာ ၁၇)
ကျိုက်မရောမြို့နယ်၊ ကော့ဒွန်း၊ ကော့ကလော့ကျေးရွာအဝင်၌ အစိုးရလျှပ်စစ်ဓါတ်အား သွယ်တန်းမှုရပ်တန့်ထားသည်မှာကြာပြီဖြစ်သည့်အတွက် ကျေးရွာအတွင်းသို့လျှပ်စစ်မီးခွဲဝေပေးနိုင်ရန် နေအိမ်တစ်အိမ်ငွေကျပ် ၄ သိန်း ကောက်ခံ၍ ကိုယ်ထူကိုယ်ထလျှပ်စစ်မီးလင်းရေး ဆောင်ရွက်ခဲ့သည်မှာ မကြာမီရက်ပိုင်းအတွင်း ပြီးစီးတော့မည်ဖြစ်ကြောင်း ဆက်သွယ်မေးမြန်းချက်အရ သိရသည်။
ကျေးရွာအတွင်း လမ်းမီးတပ်ဆင်ခြင်းကိုအဓိကထားဆောင်ရွက်ခဲ့ပြီး လိုအပ်သည့် ဓါတ်တိုင်များ၊ ဆားဗစ်ကြိုးများနှင့် မီတာဘောက်များတပ်ဆင်နိုင်ရန် အလှုငွေများကောက်ခံခြင်းဖြစ်၍ ငွေ ၄ သိန်းကျပ်ထည့်ဝင်ပေးသည့် နေအိမ်များကိုသာ မီတာဘောက်တပ်ဆင် သွယ်တန်းပေးခဲ့သည်ဟု မီးလင်းရေးကော်မတီတာဝန်ရှိသူက ဆိုသည်။
ကော့ဒွန်းဆရာတော် ပညာသာမိက “အစိုးရမီးတိုင်က ရွာဦးအဝင်လောက်ပဲရောက်ပါတယ် ဘတ်ဂျက်ကို မစောင့်နိုင်တော့ပါဘူး ကျန်နေတဲ့အပိုင်းကိုတော့ ကိုယ်ထူကိုယ်ထပဲ လုပ်လိုက်တော့မယ်၊ သူများမြို့ရွာတွေမှာ လျှပ်စစ်မီးရတာကြာပါပြီ၊ ရွာသားတွေကလည်း လျှပ်စစ်မီးရဖို့ သိပ်ကိုမျှော်လင့်နေကြတယ်။ လျှပ်စစ်မီးရခဲ့ရင်တော့ သူတို့လုပ်ငန်းတွေဆောင်ရွက်ဖို့ ပိုအဆင်ပြေသွားပါလိမ့်မယ်” ဟု မိန့်ဆိုသည်။
လာမည့်စက်တင်ဘာ ၁၉ ရက်နေ့တွင် ကျေးရွာအတွင်း လမ်းမီးများစတင်ဖွင့်နိုင်တော့မည်ဖြစ်ကြောင်း၊ နေအိမ်များအတွက် ကုန်ကျမည့်လျှပ်စစ်မီတာခကို အစိုးရသတ်မှတ်ထားသည့် ယူနစ်နှန်းထားအတိုင်းသာ ကောက်ခံသွားမည်ဟု ကျေးရွာမီးလင်းရေးကော်မတီက ဆုံးဖြတ်ထားသည်။
ကျေးရွာလျှပ်စစ်မီးလင်းရေးကော်မတီ အတွင်းရေးမှူး နိုင်ကျော်နိုင်က “ကျတော်တို့ရွာ လျှပ်စစ်မီးရခဲ့ရင် မျှော်လင့်တာက ရေတင်တာကအစ ကျန်တဲ့အလုပ်အာလုံး လွယ်ကူချောမွေ့သွားမယ်ပေါ့။ ကိုယ့်ရွာတိုးတက်ဖို့အတွက် လမ်းတွေ၊ လျှပ်စစ်မီးတွေရခဲ့လျှင် ပိုပြီးအဆင်ပြေသွားမှာပေါ့” ဟု ကပြောသည်။
၂၀၁၄ သန်းခေါင်စာရင်းအရ ကော့ဒွန်းကျေးရွာအပါအဝင် ကော့ကလော့ကျေးရွာအုပ်စု၌ အိမ်ခြေ ၈၀၀ ကျော်၊ လူဦးရေ ၄၅၀၀ နီးပါး နေထိုင်ကြောင်း သိရသည်။
ကော့ဒွန်းကော့ကလော့လူငယ်အဖွဲ့ ကျေးရွာအတွင်းအမှိုက်ကောက်လှုပ်ရှားမှု (လူငယ်အဖွဲ့)
