မွန်သတင်းအေဂျင်စီ Mon News Agency
Related Articles
မွန်သတင်းအေဂျင်စီ (၇ အေပြီ ၂၀၂၁)
ရေးမြို့နယ် မာန်အောင်ရွာတွင် အသစ်ခန့်အပ်လိုက်သည့် ကျေးရွာအုပ်ချုပ်ရေးမှူးတစ်ဦး အသတ်ခံရပြီးနောက်တစ်နေ့တွင် စစ်တပ်မှဝင်ရောက်လာသဖြင့် ပြီးခဲ့သည့်ညနေပိုင်း(အေပြီ ၆) က KNU တပ်ဖွဲ့များနှင့် ထိတွေ့ပစ်ခတ်မှုဖြစ်ပွားခဲ့ကြောင်း သတင်းရရှိသည်။
သို့ရာတွင် မာန်အောင်ရွာ(ကရင်ရွာ)၌အိမ်ထောင်ကျနေသည့် တပ်ထွက်တစ်ဦးအား ယခုရက်ပိုင်းအတွင်း ကျေးရွာအုပ်ချုပ်ရေးမှူးနေရာ အစားထိုးခန့်အပ်ခဲ့ပြီးနောက် အသတ်ခံလိုက်ရကြောင်း သတင်းထွက်ပေါ်နေသော်လည်း မွန်သတင်းအေဂျင်စီမှ သီးသန့်အတည်ပြုနိုင်ခြင်းမရှိခဲ့ပေ။
ယမန်နေ့မွန်းလွဲပိုင်းတွင် တပ်မတော်စစ်ကြောင်းတစ်ခု အနီးအနားရှိ ကိုးမိုင်ရွာ(မွန်ရွာ)သို့ ရောက်ရှိလာပြီး တိုက်ပွဲများဖြစ်ပေါ်လာမည်ကို စိုးရိမ်သဖြင့် ရွာသားများထွက်ပြေးတိမ်းရှောင်ခဲ့ရသည်ဟု ထွက်ပြေးသည့်ရွာသားများထံမှ သတင်းရရှိသည်။
ထိုနောက် ညနေ ၆ နာရီခွဲအချိန်ခန့်တွင် မာန်အောင်ကျေးရွာသို့ ဝင်ရောက်လာသော စစ်တပ်နှင့် KNU တပ်ဖွဲ့တို့အကြား ပစ်ခတ်သံများကို အနီးကျေးရွာများမှကြားသိခဲ့ရသော်လည်း မိုးချုပ်လာသည့်အတွက် ထိခိုက်သေဆုံးဖြစ်မှုများကို မသိရသေးပေ။
မာန်အောင်ကျေးရွာသည် ရေးမြို့နယ် တောင်ဘက်အကျဆုံး မလွှဲတောင်ခြေအနီး ရေး-ထားဝယ် မော်တော်ကားလမ်းအရှေ့ဖက် အိမ်ခြေ ၁၀၀ ခန့်ရှိ ကရင်ရွာတစ်ရွာဖြစ်သည်။
အလားတူ တနင်္သာရီတိုင်း ထားဝယ်မြို့နယ်တွင် စစ်တပ်နှင့် KNU တပ်မဟာ(၄) တပ်ဖွဲ့တို့ ပြီးခဲ့သည့်ညနေပိုင်းက ၂ နေရာထက်မနည်း တိုက်ပွဲဖြစ်ပေါ်သည့်သတင်း လူမှုကွန်ရက်ပေါ် ပြန့်နှံ့နေသည်ကို ဖတ်ရှုခဲ့သော်လည်း အတည်ပြုနိုင်ခြင်းမရှိသေးပေ။
