မွန်သတင်းအေဂျင်စီ (၁ ဧပြီ ၂၀၂၁)
မြန်မာနိုင်ငံတဝန်း တပ်မတော်၏စစ်ရေး လှုပ်ရှားမှုများအားလုံးကို ယနေ့ ဧပြီလ ၁ ရက်နေ့မှ ၃၀ ရက်နေ့အထိ တစ်လတိတိ ရပ်ဆိုင်းကြောင်း ယမန်နေ့ရက်စွဲဖြင့် တပ်မတော်ကာကွယ်ရေးဦးစီးချုပ်ရုံးက ကြေညာခဲ့သည်။
“နိုင်ငံတော်ကာကွယ်ရေးနှင့်အုပ်ချုပ်ရေးဆိုင်ရာ ကိစ္စရပ်တွေအပြင် အစိုးရ၏ လုံခြုံရေးနှင့် အုပ်ချုပ်ရေး ယန္တရားများကို နှောင့်ယှက်ထိပါး တိုက်ခိုက်ချိန်မှအပ ကျန်သည့်အချိန်များတွင် စစ်ရေးရပ်ထားမည်” ဟု ကြေညာချက်တွင် ဖော်ပြသည်။
သို့ရာတွင် ကရင်အမျိုးသားအစည်းအရုံး KNU တပ်မဟာ ၅ က မိမိတို့၏နယ်မြေ၊ ကရင်လူထုနှင့် ကိုယ်ပိုင်ဆုံးဖြတ်ခွင့်ကို ကာကွယ်ရန်အတွက် မြန်မာ့တပ်မတော်၏ရန်ကို ရင်ဆိုင်ခြင်းမှတပါး မိမိတို့အဖို့ အခြားရွေးချယ်စရာလမ်းမရှိတော့ကြောင်း မတ်လ ၃၀ ရက်စွဲဖြင့် ကြေငြာချက်ထုတ်ပြန်ထားသည်။
ထိုင်းနယ်စပ်အနီးရှိ တောင်ပိုင်းတိုင်းစစ်ဌာနချုပ်လက်အောက်ခံ ခမရ ၃၄၉ ၏ သီးမူထာတပ်စခန်းကို မတ်လ (၂၇) ရက် နံနက်ပိုင်းက KNLA တပ်မဟာ ၅ ဝင်ရောက်တိုက်ခိုက်သိမ်းပိုက်ခဲ့သည့်ဖြစ်တွင် မြန်မာစစ်တပ် ဒုတပ်ရင်းမှူးတစ်ဦး အပါအဝင် တပ်သား ၁၀ ဦး ကျဆုံးပြီး ၈ ဦးကို စစ်သုံ့ပန်းအဖြစ် ဖမ်းဆီးထိန်းသိမ်းခဲ့ပြီးနောက် ညပိုင်းတွင် စစ်လေယာဉ်များဖြင့် ဗုံးကြဲတိုက်ခိုက်မှုဖြစ်ပေါ်လာကြောင်း သတင်းများက ဖော်ပြသည်။
ယင်းသို့ တပ်မတော်စစ်လေယာဉ်ဖြင့် မတ်လ ၂၇ ရက်မှ ၃၀ ရက်နေ့အထိ ဗုံးကြဲပစ်ခတ်မှုကြောင့် KNU တပ်မဟာ ၅ နယ်မြေအတွင်းရှိ ကျေးရွာများတွင် အရပ်သား ၃ ဦးသေဆုံး၊ ၈ ဦးဒဏ်ရာပြင်းထန်စွာရရှိခဲ့ပြီး ရွာသားနှစ်သောင်းကျော် ဘေးလွတ်ရာ ထွက်ပြေးနေရကြောင်း၊ ကရင်စစ်ပြေးဒုက္ခသည် အများအပြား တောတောင်များတွင် ခိုလှုံနေကြရပြီး သုံးထောင်ကျော်ခန့် ထိုင်းနိုင်ငံဘက် ထွက်ပြေးတိမ်းရှောင်ခဲ့ရာတွင် ပြန်လည်မောင်းထုတ်ခံရကြောင်း ကရင်အရပ်ဖက်လူမှုကယ်ဆယ်ရေး အဖွဲ့အစည်းများက ဆိုသည်။
ထို့အတူ ပဲခူးတိုင်းအတွင်းရှိ KNU တပ်မဟာ ၃ နယ်မြေတွင် မတ်လ ၃၀ ရက် နေ့လယ်ပိုင်းက တပ်မတော်စစ်လေယာဉ်နှစ်စင်း ဗုံးကြဲတိုက်ခိုက်မှုကြောင့် အရပ်သား ၁၁ ယောက် သေဆုံးပြီး ၅ ယောက် ဒဏ်ရာရခဲ့ကြောင်း၊ ရွှေကျင်မြို့နယ် မဒမချောင်းဖျားက ရွှေသတ္တုတူးဖော်ရေး ကုမ္ပဏီဝန်ထမ်း ၁၁ ယောက် သေဆုံးခဲ့ကြောင်း သတင်းရရှိသည်။
တဖက်တွင်လည်း ဆန္ဒပြပြည်သူတွေအပေါ် စစ်တပ်နှင့့်ရဲတပ်ဖွဲ့ အင်အားသုံးနှိမ်နှင်းမှုကြောင့် ကလေးငယ်နှင့် အမျိုးသမီးများအပါအဝင် ရာနှင့်ချီသောပြည်သူများသေဆုံးနေရသည်ကို အပြင်းအထန် ရှုတ်ချကြောင်း ရခိုင်လက်နက်ကိုင် AA ၊ကိုးကန့်လက်နက်ကိုင် MNDAA နှင့် တအာင်းလက်နက်ကိုင် TNLA တိုင်းရင်းသားလက်နက်ကိုင် ၃ ဖွဲ့က လတ်တလော ကြေညာချက်ထုတ်ပြန်ခဲ့ပြီး မြန်မာစစ်တပ်၏ အကြမ်းဖက် ပစ်ခတ်သတ်ဖြတ်မှုကို မရပ်ပါက နွေဦးတော်လှန်ရေး ဆင်နွှဲနေကြသည့် တိုင်းရင်းသားလူမျိုးပေါင်းစုံများဘက်က မိမိကိုယ်ကို ခုခံကာကွယ်ရေး အတွက် ရပ်တည်သွားမည်ဖြစ်ကြောင်း ၎င်းတို့၏ ကြေညာချက်တွင် ဖော်ပြထားသည်။
နိုင်ငံရေးအကျဉ်းသားများကူညီစောင့်ရှောက်ရေးအသင်း AAPP သတင်းထုတ်ပြန်ချက်အရ စစ်အာဏာသိမ်းမှု ၂ လအတွင်း အရပ်သားပြည်သူ ၅၃၆ ဦးထက်မနည်းသေဆုံးကြောင်း ဖော်ပြထားသည်။
၂၀၂၁ ခုနှစ် ဖေဖော်ဝါရီလ စစ်အာဏာသိမ်းပြီးနောက် ကရင်ပြည်နယ်၊ ကချင်ပြည်နယ်နှင့် ရှမ်းပြည်နယ်ဘက်တွင် တိုက်ပွဲများပြင်းထန်လာချိန်အတွင် တပ်မတော်၏ တပ်မတော်၏စစ်ရေးလှုပ်ရှားမှုအားလုံး ဧပြီတစ်လတိတိရပ်ဆိုင်းကြောင်း ကြေညာချက် ထွက်ပေါ်လာခြင်းဖြစ်သည်။
