မွန်သတင်းအေဂျင်စီ (၂၄ မတ် ၂၀၂၁)
နွေရာသီမွန်စာပေသင်တန်းများကို မတ်လ ၂၈ ရက်မှစ၍ တိုက်နယ်အလိုက်ဖွင့်လှစ်သင်ကြားသွားမည်ဖြစ်ကြောင်း မုဒုံမြို့နယ် မွန်စာပေနှင့် ဗုဒ္ဓဘာသာယဉ်ကျေးမှုအဖွဲ့ တွဲဖက်အတွင်းရေးမှူး (၁) ဆရာတော်အရှင်သီဟက မွန်သတင်းအေဂျင်စီသို့ မိန့်ကြားသည်။
“ဒီလာမယ့် မတ်လ ၂၈ ရက်မှာ သင်တန်းစပြီးဖွင့်သွားမယ်၊ ပြီးတော့ မေလ ၁၀ ရက်နေ့လောက်မှာ တိုက်နယ်အဆင့် စာမေးပွဲဖြေပြီး မေ ၁၅ မှာ မြို့နယ်အဆင့် စာမေးပွဲဖြေသွားမယ် အဲလိုတော့စီစဉ်ထားတယ်” ဟု ဆရာတော်အရှင်သီဟက မိန့်သည်။
မုဒုံမြို့နယ် နွေရာသီမွန်စာပေသင်တန်းဖြစ်မြောက်ရေးအတွက် သာယာကုန်း- တာပသွန် တိုက်နယ်၊ ကွေ့ဝမ်း- နိုင်းပြိုင် တိုက်နယ်၊ ကော့ခပုံ- ကွမ်တာ တိုက်နယ်၊ မုဒုံ တိုက်နယ်၊ ညောင်ကုန်း တိုက်နယ်၊ တော်ကူး တိုက်နယ်၊ နိုင်လှုံ တိုက်နယ်၊ ကမာဝက် တိုက်နယ်၊ ကလော့သော့ တိုက်နယ်၊ ဒိုးမား- ဆက်သွယ် တိုက်နယ်၊ နှီးဗဒေါ တိုက်နယ်တို့ဖြင့် ဖွဲ့စည်းထားခြင်းဖြစ်သည်။
ဆရာတော်အရှင်သီဟက “ကျောင်းမဖွင့်ရသေးတော့ သင်ကြားမယ့် နေရာအခက်အခဲ ဘယ်လိုရှိလဲဆိုတာ မသိရသေးဘူး။ တကယ်လို့ အစိုးရစာသင်ကျောင်းတွေ မဖွင့်သေးရင်တော့ အဲ့ကျောင်းမှာ အရင်လိုပဲ သင်သွားမယ်။ တချို့ကတော့ ဘုန်းကြီးကျောင်းမှာ သင်ကြားနေတာတွေလဲရှိတယ် ဒါပေမယ့် နွေရာသီမွန်စာပေသင်တန်းကျောင်းကို အဆင်ပြေအောင်တော့ ဆက်သင်ကြားသွားမယ်” ဟု ဆက်မိန့်ကြားသည်။
နွေရာသီမွန်စာပေနှင့် ယဉ်ကျေးမှု သင်တန်းကျောင်း ဖွင့်လှစ်သင်ကြားနေသည့် နေရာများတွင် မွန်ပြည်နယ်၊ ကရင်ပြည်နယ်၊ ပဲခူးတိုင်း၊ ရန်ကုန်တိုင်း၊ မန္တလေးတိုင်း၊ တနသာၤရီတိုင်းနှင့် မွန်လူမျိုးများ နေထိုင်သည့် နေရာဒေသများမှာ နွေရာသီမွန်စာပေသင်တန်းများ ဖွင့်လှစ်သင်ကြားနေကြောင်း သိရသည်။
သို့ရာတွင် ပြီးခဲ့သည့် ၂၀၂၀ ခု နွေရာသီမွန်စာပေသင်တန်းကျောင်းသည် ကမ္ဘာ့ကပ်ရောဂါ COVID – 19 ကူးစက်ပြန့်ပွားမှုကြောင့် လူစုလူဝေးပြုလုပ်ခွင့်မရှိသဖြင့် မြို့နယ်အဆင့်ရှိ နွေရာသီမွန်စာပေသင်ကြားရေးကို တစ်နှစ်ရပ်နားခဲ့ရသည်။
