ရေးမြို့နယ်၊ ကုလားဂုတ်ကျွန်း၌ လွန်ခဲ့သောမေလအတွင်း အရပ်သားတစ်ဦးအား တပ်မတော်အရာရှိတစ်ဦးမှ သေနတ်ဖြင့် ပတ်သတ်ခဲ့သည့်အမှုကို ရာဇသတ်ကြီး ပုဒ်မ – ၃၀၂ လူသတ်မှုဖြင့် တရားစွဲဆို၍ မော်လမြိုင်ခရိုင်တရားရုံး၌ ယမန်နေ့က စတင်စစ်ဆေးခဲ့ကြောင်း တွေ့ရှိရသည်။
အဆိုပါ ပထမအကြိမ်ရုံးချိန်း၌ ဖြစ်စဉ်အစမှ အဆုံးအထိ တရားရုံးမှ စစ်ဆေးမေးမြန်းခဲ့ခြင်းဖြစ်ပြီး ဒုတိယအကြိမ်ရုံးချိန်းကို ဒီဇင်ဘာလ ၁၈ ရက်နေ့သို့ ထပ်မံချိန်းဆိုထားကြောင်း သေဆုံးသူ ဦးတင်စိုးမြင့်၏ ဇနီး ဒေါ်ခင်ဆွေတင့်က ဆိုသည်။
“ဒီအမှုနဲ့ ပတ်သက်ပြီးတော့ တရားမျှတမှုဖြစ်စေချင်တယ်”ဟု ဒေါ်ခင်ဆွေတင့်က ပြောသည်။
Photo- လူသတ်မှုတရားစွဲဆိုခံရသူ ဗိုလ်ကြီးအောင်ကိုမင်း(လက်ထိပ်ဖြင့်အလယ်လူ)-(MNA)
သေနတ်ဖြင့် ပစ်ခတ်သတ်ဖြတ်ခဲ့မှုအတွက် တပ်မတော်အက်ဥပဒေ ပုဒ်မ – ၇၂ အရ စစ်တရားရုံးဖြင့် စစ်ဆေးစီရင်နိုင်ခြင်းမရှိသည့်အတွက် အရာရှိအား သက်ဆိုင်ရာ နယ်ဘက်တရားရုံးကို လွှဲပြောင်းပေးခြင်းဖြစ်ကြောင်း ရန်ကုန်မြို့ရှိ မြန်မာနိုင်ငံလူ့အခွင့်အရေးကော်မရှင်ရုံးမှ ဒေါ်ခင်ဆွေတင့်ထံ ပေးပို့သော အကြောင်းကြားစာတွင် ရေးသားဖော်ပြသည်။
ရေးမြို့နယ်အခြေစိုက် ခမရ ၅၈၇ ခြေမြန်တပ်ရင်းမှ ဗိုလ်ကြီးအောင်ကိုမင်းသည် အခင်းဖြစ်ပွားသည့် မေလ ၁၆ ရက် ညနေပိုင်းတွင် ကုလားဂုတ်ကျွန်းအလယ်ဆိပ်နေ သစ်ဝါးလုပ်ငန်းလုပ်ကိုင်သူ ဦးတင်စိုးမြင့်အား မှတ်ပုံတင်စစ်ဆေးရန် ခေါ်ဆောင်သွားပြီးနောက် ယင်းသို့လူသတ်မှုဖြစ်ပေါ်ခဲ့ခြင်းဖြစ်ကြောင်း မိသားစုဝင်များက ပြောသည်။
