လာမည့် ၂၀၁၈ ခုနှစ် အေပြီလကုန်ပိုင်းတွင် မွန်အမျိုးသားပါတီ MNP ဒုတိယအကြိမ်ပါတီညီလာခံ ကျင်းပရေးကော်မတီတစ်ရပ်ကို နိုဝင်ဘာ ၁၂ ရက်နေ့က ဖွဲ့စည်းခဲ့ကြောင်း ၄င်းပါတီ၏အထွေထွေအတွင်းရေးမှူး နိုင်လယီတမက မွန်သတင်းအေဂျင်စီသို့ ပြောသည်။
မော်လမြိုင်မြို့၊ မြိုင်သာယာရပ်ကွက်ရှိ မွန်အမျိုးသားပါတီဗဟိုဌာနချုပ်၌ ကျင်းပသည့် ဗဟိုကော်မတီအစည်းအဝေး ၃/၂၀၁၇ တွင် အဖွဲ့ဝင် ၁၇ ဦးပါ ဒုတိယအကြိမ်ပါတီညီလာခံ ကျင်းပရေးကော်မတီဖွဲ့စည်းခဲ့ရာ၌ ဥက္ကဌအဖြစ် နိုင်ငွေသိန်း(ဂျနူမွန်) နှင့် အတွင်းရေးမှူး နိုင်လယီတမတို့ ဦးဆောင်သည်ဟု ဆိုသည်။
ထိုသို့အဆင့် ၃ ဆင့်ကျင်းပရာ၌ ရပ်ကွက်/ကျေးရွာအဆင့်ကို လာမည့် ၂၀၁၈ ခုနှစ် ဇန်နဝါရီနှင့် ဖေဖော်ဝါရီ ၂ လအတွင်း၊ မြို့နယ်အဆင့်ကို မတ်လအတွင်း၊ ဗဟိုအဆင့်ကို အေပြီလကုန်ပိုင်းတွင် ကျင်းပရန် လျာထားကြောင်း သူကဆက်ပြောသည်။
မွန်အမျိုးသားပါတီ ပထမအကြိမ်ညီလာခံကို ၂၀၁၅ ခုနှစ် ဇန်နဝါရီ ၂၈ ရက်နေ့က ၃ ရက်ကြာကျင်းပခဲ့ရာတွင် ဗဟိုကော်မတီ ၉၃ ဦးရွေးချယ်ခဲ့ပြီးနောက် လက်ရှိတွင် ၇၆ ဦးသာကျန်ရှိသည်ဟု သိရသည်။
သို့ရာတွင် မွန်ဒေသလုံးဆိုင်ရာဒီမိုကရေစီ AMDP ပါတီ၏ ပထမအကြိမ်ညီလာခံကို ၂၀၁၄ ခုနှစ် မေလ ၂၄-၂၅ ရက်များတွင်ကျင်းပခဲ့ပြီးနောက် ဒုတိယအကြိမ်ပါတီညီလာခံကျင်းပရန် ထုတ်ဖော်ပြောကြားခြင်းမရှိသေးပေ။
မွန် ၂ ပါတီပေါင်းစည်းရေးမပြုလုပ်နိုင်သေးသည့်ကြားကာလများတွင် အထက်ပါမွန် ၂ ပါတီမှ ဗဟိုကော်မတီအချို့အား နုတ်ထွက်ခွင့်ပြုခြင်း၊ ပါတီမှ ထုတ်ပယ်ခြင်းနှင့် ကွယ်လွန်သူအချို့ရှိသဖြင့် ဗဟိုကော်မတီဝင်အရေအတွက် လျော့ကျသွားကြောင်း တွေ့ရှိရသည်။
