မွန်ပြည်နယ် မော်လမြိုင်မြို့တွင် ဒီဇင်ဘာလအတွင်းက ဖမ်းဆီးရမိသည့် ထိုင်းနိုင်ငံသား တရာခံပြေး ဒေါက်တာဆိုဖာ့ဆိုသူကို မော်လမြိုင်မြို့နယ် တရားရုံးက ဇန်နဝါရီလ ၂၀ ရက်နေ့ ၉ ကြိမ်မြောက်ရုံးချိန်းတွင် မြို့နယ်တရားရုံးက ထောင်ဒဏ် ၂ နှစ် အမိန့်ချမှတ်လိုက်သည်ဟု မော်လမြိုင်မြို့၊ မုပွန်နယ်မြေရဲစခန်းမှူးက ပြောသည်။
“သူ့ဆီမှာ ပတ်စပို့၊ ဗီဇာမရှိဘဲနဲ့ မြန်မာနိုင်ငံမှာ လာနေတဲ့ စစ်ဆေးတွေ့ရှိချက်အရ ထောင်ဒဏ် ၂ နှစ် ချမှတ်လိုက်တယ်။၊ ဒီထောင်ဒဏ် ၂ နှစ်က မြန်မာနိုင်ငံမှာပဲ ကျခံရမယ်၊ အခု သူ့ကို မော်လမြိုင်ထောင်မှာ ထိန်းသိမ်းထားတယ်၊ နောက်ပိုင်, ဘာဆက်လုပ်မလဲဆိုတာ ကျနော်တို့အပိုင်းမဟုတ်တော့ မပြောတတ်ဘူး” ဟု မုပွန်နယ်မြေရဲစခန်းမှူး ရဲအုပ်ဝင်းဦးက ပြောသည်။
ထိုင်းနိုင်ငံသား တရားခံပြေး ဒေါက်တာ ဆိုဖာ့(ခေါ်) နိုင်အောင်မင်း ဆိုသူသည် ၂၀၁၂ ခုနှစ် သြဂုတ်လအတွင်းက မြန်မာနိုင်ငံသား ခြံအလုပ်သမား ၅ ဦးကို လုပ်အားခမပေးဘဲ တုတ်ဖြင့်ရိုက်၊ ဓါးဖြင့်ခုတ်ထစ် သတ်ဖြတ် မီးရှိ့ခဲ့သည့်အမှုဖြင့် ထိုင်းနိုင်ငံ၊ ဖက်ဘူရီခရိုင် ဖက်ဘူရီရဲစခန်းတွင် (ပ) ၄၃၇၇/၂၅၅၆ ဖြင့် ဖမ်းဆီးထားရှိပြီး အာမခံဖြင့် ခံဝန်ပေးထားရှိရာမှ ထွက်ပြေးတိမ်းရှောင်နေသည့် တရားခံပြေးဖြစ်သည်ဟု သိရသည်။
ထိုနောက် ၂၀၁၅ ခုနှစ်တွင် ဒေါက်တာ ဆိုဖာ့ကို ထိုင်းတရားရုံးမှ တစ်သက်တစ်ကျွန်း အမိန့်ချမှတ်ထားသည့်တရားခံပြေးဖြစ်ကြောင်းလည်း သတင်းမှတ်တမ်းများတွင် ဖော်ပြပါရှိသည်။
