မွန်ပြည်နယ်လွှတ်တော် ဒုတိယပုံမှန်အစည်းအဝေးကို ဇွန်လ ၂၇ ရက်နေ့တွင်ကျင်းပမည်

ဒုတိယအကြိမ် မွန်ပြည်နယ်လွှတ်တော် ဒုတိယ ပုံမှန်အစည်းအဝေးကို လာမည့် ဇွန်လ ၂၇ ရက်နေ့တွင် မွန်ပြည်နယ်လွှတ်တော် အစည်းအဝေးခန်းမ၌ ကျင်းပပြုလုပ်သွားမည်ဖြစ်ကြောင်း မွန်ပြည်နယ်လွှတ်တော် ဒု- ဥက္ကဌ က မွန်သတင်းအေဂျင်စီသို့ ပြောကြားသည်။

မွန်ပြည်နယ်လွှတ်တော် ဒု- ဥက္ကဌ ဒေါက်တာ အောင်နိုင်ဦး က“ ဒုတိယကြိမ် မွန်ပြည်နယ်လွှတ်တော် ဒုတိယ ပုံမှန် အစည်းအဝေးကို ဇွန်လ ၂၇ ရက်နေ့မှာ စမယ်၊ အဆို၊ မေးခွန်းတွေရဲ့ အခြေအနေ ကြည့်ပြီးတော့မှ အဆို၊ မေးခွန်းများရင် ရက်တွေများမယ်ပေါ့” ဟု ပြောသည်။
လွှတ်တော်ကိုယ်စားလှယ် လေးပုံတစ်ပုံက လွှတ်တော်အထူးအစည်းအဝေး ထပ်မံကျင်းပပေးရန် တောင်းဆိုထားသော်လည်း လွှတ်တော် ဒု- ဥက္ကဌ ခရီးလွန်နေသည့်အတွက် ဇွန်လ ၂၁ ရက်နေ့တွင် ကျင်းပမည့် အထူးအစည်းအဝေးကို လွှတ်တော်ကိုယ်စားလှယ်များနှင့် ညှိနှိုင်းပြီး ဇွန်လ ၂၇ ရက်နေ့သို့ ကျင်းပသွားမည်ဖြစ်ကြောင်း၊ ကျန်ရှိနေသေးသည့် အဆို၊ မေးခွန်းများကိုလည်း ယင်းအစည်းအဝေးတွင် ထပ်မံ ဆွေးနွေးသွားမည်ဖြစ်ကြောင်း ၄င်းက ဆက်ပြောသည်။

ကျိုက်မရောမြို့နယ် မဲဆန္ဒနယ် အမှတ် (၂) လွှတ်တော်ကိုယ်စားလှယ် မင်းအောင်မွန် က “လာမယ့် လွှတ်တော်ပုံမှန် အစည်းအဝေးမှာ အဆိုတင်သွင်းဖို့ မရှိပါဘူး၊ လွှတ်တော်ကိုယ်စားလှယ် ၈ ဦး လက်မှတ်ထိုးပြီး လွှတ်တော်အစည်းအဝေး ခေါ်တဲ့ကိစ္စကိုပဲ အဓိကထားပြီးတော့ လွှတ်တော်အစည်းအဝေးကျင်းပတဲ့နေ့မှာ ဆွေးနွေးသွားမယ်၊ ကျနော်တို့က အဆိုကို ကြိုပြီးတင်ရမယ်ဆိုတော့ တင်ဖို့ မမှီဘူးလေ” ဟု ပြောသည်။

ပြီးခဲ့သည့် လွှတ်တော် အထူးအစည်းအဝေးတွင် ဆွေးနွေးရန် အဆို၊ မေးခွန်း များ ကျန်ရှိနေသေးသည့်အတွက် လွှတ်တော် အထူးအစည်းအဝေး ထပ်မံကျင်းပပေးရန် လွှတ်တော်ကိုယ်စားလှယ် ၈ ဦး လက်မှတ်ရေးထိုးပြီး ဇွန်လ ၃ ရက်နေ့က လွှတ်တော်ဥက္ကဌ ဒေါ်တင်အိထံ တောင်းဆိုထားကြောင်းသိရသည်။

ချောင်းဆုံ မဲဆန္ဒနယ် အမှတ် (၂) လွှတ်တော်ကိုယ်စားလှယ် ဒေါ်ကြည်ကြည်မြ က “ ဒီ ၂၇ ရက်နေ့မှာ ကျင်းပမယ့် လွှတ်တော်အစည်းအဝေးမှာ အဆို တင်သွင်းဖို့ မရှိပါဘူး၊ မေးခွန်းနှစ်ခုတော့ ရှိပါတယ်” ဟုပြောသည်။

မွန်ပြည်နယ်လွှတ်တော် အထူးအစည်းအဝေးကို ဇွန်လ ၂-၃ ရက်နေ့တို့တွင် ကျင်းပခဲ့ပြီး အဆိုပါ အထူးအစည်းအဝေးတွင် မေးခွန်း ၁၇ ခု၊ အဆို ၅ ခု နှင့် အရေးကြီးအဆို တစ်ခု တင်သွင်းခဲ့ကြောင်း သိရသည်။