အေမီအောင် – တနင်္သာရီတိုင်းဒေသကြီးအတွင်း မွန်လူဦးရေစာရင်း အမှန်ရရှိရေးအတွက် စာရင်းကောက်ယူလျက်ရှိရာ ရေဖြူမြို့နယ်တွင် မွန်လူဦးရေစနှစ်သောင်းကျော် ရရှိနေပြီဟု မွန်လူဦးရေ စာရင်းမှန်ရရှိရေး ဦးဆောင်ကော်မတီဝင်မိငွေလေးက လွတ်လပ်သောမွန်သတင်းဌာနသို့ ပြောသည်။
မွန်လူဦးရေစာရင်း ကောက်ယူရသည့် အဓိကရည်ရွယ်ချက်မှာ မွန်လူဦးရေစာရင်း အတိအကျ ရရှိစေရန်နှင့် မွန်လူဦးရေ ၆ သောင်းပြည့်ပါက နောင်ရွေးကောက်ပွဲများတွင် တနင်္သာရီတိုင်းဒေသကြီး၌ မွန်တိုင်းရင်းသားဝန်ကြီး တစ်နေရာ ရွေးကောက် တင်မြှောက်နိုင်မည် ဖြစ်သည်။
မိငွေလေးက “ ရေဖြူတစ်မြို့နယ် မကုန်သေးဘူး ၂ သောင်း ၇ ထောင် ရှိနေပြီ”ဟု ပြောသည်။
တစ်ချို့မှာ ဗမာစကားမပြောတတ်သော်လည်း မှတ်ပုံတင်တွင် မွန်ဗမာ ဖြစ်နေသည်ကို “မွန်လူမျိုး”ဟုသာ သတ်မှတ်ပြီး၊ အိမ်ရှိပြီး အိမ်ထောင်စုစာရင်းမရှိသော်လည်း မွန်စကားကောင်းကောင်းပြောနိုင်သူ မွန်လူမျိုးအဖြစ်သတ်မှတ်သည်ဟု ဆက်ပြောသည်။
မြိတ်၊ ဘုတ်ပြင်း မွန်လူဦးရေ စာရင်းအမှန်ရရှိရေး ဦးဆောင်ကော်မတီဝင် ဦးကိုကိုအောင်က “ အခုကျနော်တို့ မြိတ်၊ ဘုတ်ပြင်း ကို ဒီကနေ့မှ စကောက်တယ်ဆိုတော့ နောက်ထပ် လူဘယ်လောက် တိုးလာမယ်ဆိုတာမသိသေးဘူး”ဟု ပြောသည်။
ဖေဖေါ်ဝါရီ ၁၃ ရက်နေမှစတင်၍ ကော့သောင်းမြို့တွင် လူဦးရေစာရင်းကောက်ယူသွားမည်ဖြစ်ပြီး၊ မျှော်မှန်းသလောက် လူဦးရေ ၆ သောင်းပြည့်သွားပါက လုပ်ငန်းရပ်ဆိုင်းမှုမပြုဘဲ ဆက်လက်ကောက်သွားမည်ဟု ဦးကိုကိုအောင်က ဆက်ပြောသည်။
ရေဖြူ၊ မြိတ်၊ ဘုတ်ပြင်း၊ ကော့သောင်း၊ ကျောက်တောင် ဒေသများတွင် မွန်လူမျိုးအများဆုံးနေထိုင်လျက်ရှိသည့်အတွက် ဖေဖော်ဝါရီလကုန်အထိ
စာရင်းဆက်လက် ကောက်ယူသွားမည်ဟု သိရသည်။
ယင်းသို့ စာရင်းကောက်ရာတွင် တက္ကသိုလ်ရောက် မွန်ကျောင်းသူ ကျောင်းသားများအဖွဲ့၊ လူမှုဖွံ့ဖြိုးရေးအစီအစဉ်အဖွဲ့ (CSDP)၊ မွန်လူငယ်ပညာပေးရေးစင်တာအဖွဲ့ (MYEO)၊ မွန်အမျိုးသမီးအဖွဲ့ (MWO)၊ စေတနာအဖွဲ့၊ ရှင်စောပုအမျိုးသမီးစွမ်းဆောင်ရှင်များအသင်းတို့ဖြင့်
ဦးဆောင်ကော်မတီအဖွဲ့ဝင် ၁၇ တို့ပါဝင် ၂၀၁၃ ခုနှစ်၊ ဒီဇင်ဘာလ (၂၇) ရက်တွင် ဖွဲ့စည်းခဲ့သည်။
အလားတူ မွန်တိုင်းရင်းသား လူဦးရေစာရင်း အမှန်ရရှိရေးအတွက် ရန်ကုန်တိုင်းနှင့် ပဲခူးတိုင်းဒေသကြီးတွင်လည်း ကောက်ယူလျက်ရှိသည်။
