အမျိုးသားဒီမိုကရေစီအဖွဲ့ချုပ် ဒေါ်အောင်ဆန်းစုကြည်၏ ဇွန်လ ၁၇ ရက်နေ့စွဲပါပေးပို့သော သဝဏ်လွှာတွင် “မွန်ပြည်သစ်ပါတီ ဒုဥက္ကဌ၊ ငြိမ်းချမ်းရေးဆွေးနွေးရေးအဖွဲ့ခေါင်းဆောင် ကွယ်လွန်သွားကြောင်း ကြားသိရသည့်အတွက် မိသားစုနှင့်အတူ ထပ်တူထပ်မျှ ဝမ်းနည်းကြေကွဲရပါကြောင်း” ဖေါ်ပြပါရှိသည်။
ထို့အတူ ညီညွှတ်သောတိုင်းရင်းသားလူမျိုးများဖက်ဒရယ်ကောင်စီ UNFC ပေးပို့သောသဝဏ်လွှာတွင် “နိုင်ရော့စသည် ဥက္ကဌကြီးနိုင်ရွှေကျင် ရှိစဉ်ကပင် အတူတကွ မွန်တော်လှန်ရေးကို ဦးဆောင်သူတစ်ဦး ဖြစ်ပေသည်။ UNFC စတင်ဖွဲ့စည်းကတည်းကလည်း ကမကထပြု ဦးဆောင်သူများတွင် တစ်ဦးအပါအဝင် ဖြစ်သည်” ဟု ဖေါ်ပြခဲ့သည်။
မွန်ပြည်နယ်အစိုးရအဖွဲ့သည်လည်း ဝန်ကြီးချုပ်တို့၏ကိုယ်စား ဝမ်းနည်းခြင်း သဝဏ်လွှာများ ပေးပို့ခဲ့သည်။
အလားတူ ကရင်နီအမျိုးသားတိုးတက်ရေးပါတီ KNPP၊ ၊ပအိုဝ်းအမျိုးသားလွတ်မြောက်ရေးအဖွဲ့ချုပ် PNLO၊ ါ်ရခိုင်ပြည် လွတ်မြောက်ရေးပါတီ ALP တို့ကလည်း သဝဏ်လွှာများ ပေးပို့ခဲ့သည်။
မွန်ဒီမိုကရေစီပါတီ MDP ၊မွန်ညီညွှတ်ရေးအဖွဲ့ MUL, မွန်ပြည်နယ်၊Mon Youth Friendship Network တို့၏ သဝဏ်လွှာပေးပို့ချက်များကိုလည်း လက်ခံရရှိခဲ့သည်။
အလားတူ ဘဝတူတိုင်းရင်းသားလက်နက်ကိုင်အဖွဲ့များ၊ လူမှုအသင်းအဖွဲ့များ၊ ပုဂ္ဂိုလ်တစ်ဦးချင်းစီမှလည်း ဝမ်းနည်းကြောင်းသဝဏ် ပေးပို့ခဲ့ကြသည်။
နိုင်ရော့စ အသက် ၆၇ နှစ်သည် ထိုင်းနိုင်ငံ၊ စံခလပူရီဆေးရုံ၌ ဇွန် ၁၅ ရက် ည ၈ နာရီ ၂၀ မိနစ်အချိန်ခန့်တွင် ကင်ဆာရောဂါဖြင့် ကွယ်လွန်အနိစ္စရောက်ခဲ့သည်။
သူ၏ကြွင်းကျန်သောရုပ်ကလာပ်ကို မွန်ပြည်သစ်ပါတီထိန်းချုပ်ဒေသ ဘုရားသုံးဆူအနီး ဂျပန်ရေတွင်းရွာ၌ လာမည့်ဇွန်လ ၂၁ ရက်နေ့၊ မွန်းလွဲပိုင်းတွင် စစ်အခမ်းအနားဖြင့် ဈာပနအခမ်းအနား ကျင်းပမည်ဖြစ်သည်။
