မွန်သတင်းအေဂျင်စီ(ဇူလိုင် ၂၆)
လာမည့် နိုဝင်ဘာ ၈ ရက်နေ့ ၂၀၂၀ ရွေးကောက်ပွဲတွင် ကိုယ်စားလှယ်လောင်း ၆၂ ဦး ဝင်ရောက်ယှဉ်ပြိုင်သွားမည်ဖြစ်ကြောင်း မွန်ညီညွတ်ရေးပါတီ MUP ဗဟိုအလုပ်အမှုဆောင်အဖွဲ့၏ ယနေ့ကျင်းပသောအစည်းအဝေးအပြီးတွင် မွန်သတင်းအေဂျင်စီက အတည်ပြုချက်ရရှိခဲ့သည်။
မွန်ညီညွတ်ရေးပါတီ၏ လက်ရှိအမျိုးသားလွှတ်တော်ကိုယ်စားလှယ် နိုင်သီဟနှင့် ပြည်နယ်လွှတ်တော်ကိုယ်စားလှယ် ဒေါက်တာအောင်နိုင်ဦးတို့ ယခင်မဲဆန္ဒနယ်မြေတို့တွင် ပြန်လည်အရွေးခံကြမည်ဖြစ်ပြီး ပြည်နယ်လွှတ်တော်ကိုယ်စားလှယ် ဒေါက်တာမင်းစိုးလင်းနှင့် ဒေါက်တာမင်းကြည်ဝင်းတို့မှာ ပြန်လည်ပါဝင်ခြင်း မရှိတော့ပေ။
မွန်ညီညတ်ရေးပါတီအနေဖြင့် မွန်ပြည်နယ် သထုံနှင့် ဘီးလင်း ၂ မြို့နယ်မှလွဲ၍ ကျန် ၈ မြို့နယ်၌ အမျိုးသားလွှတ်တော် ၁၀ နေရာ၊ ပြည်သူ့လွှတ်တော် ၈ နေရာနှင့် ဗမာတိုင်းရင်းသားရေးရာအပါအဝင် ပြည်နယ်လွှတ်တော် ၁၇ နေရာတို့တွင် စုစုပေါင်းကိုယ်စားလှယ်လောင်း ၃၅ ဦးတို့ဖြင့် ပါဝင်ယှဉ်ပြိုင်သွားမည်။
ကရင်ပြည်နယ် ကော့ကရိတ်၊ ဘားအံနှင့် ကြာအင်းဆိပ်ကြီးမြို့နယ်တို့တွင် အမျိုးသားလွှတ်တော် ၄ နေရာ၊ ပြည်သူ့လွှတ်တော် ၂ နေရာနှင့် မွန်တိုင်းရင်းသားရေးရာအပါအဝင် ပြည်နယ်လွှတ်တော် ၆ နေရာအတွက် စုစုပေါင်းကိုယ်စားလှယ်လောင်း ၁၂ ဦးယှဉ်ပြိုင်သွားမည်။
တနင်္သာရီတိုင်းဒေသကြီး မြိတ်နှင့် ရေဖြူမြို့နယ်တို့တွင် အမျိုးသားလွှတ်တော် ၂ နေရာ၊ ပြည်သူ့လွှတ်တော် ၁ နေရာနှင့် တိုင်းဒေသကြီးလွှတ်တော် ၃ နေရာအတွက် စုစုပေါင်းကိုယ်စားလှယ်လောင်း ၈ ဦး ပါဝင်သည်။
ရန်ကုန်တိုင်းဒေသကြီး ဒေါပုံ၊ စမ်းချောင်း၊ တောင်ဥက္ကလာ၊ ရွှေပြည်သာနှင့် ထန်းတစ်ပင်မြို့နယ်တို့တွင် အမျိုးသားလွှတ်တော် ၁ နေရာနှင့် တိုင်းဒေသကြီးလွှတ်တော် ၆ နေရာတို့တွင် စုစုပေါင်းကိုယ်စားလှယ်လောင်း ၇ ဦး ပါဝင်ယှဉ်ပြိုင်သွားမည်ဖြစ်သည်။
မွန်ညီညွတ်ရေးပါတီအဖြစ် ၂ ပါတီပူးပေါင်းနိုင်ခြင်းမရှိသေးသည့် ၂၀၁၅ အထွေထွေရွေးကောက်ပွဲတွင် မွန်အမျိုးသားပါတီ MNP အနေဖြင့် ကိုယ်စားလှယ်လောင်း ၅၃ ဦးဖြင့်လည်းကောင်း၊ မွန်ဒေသလုံးဆိုင်ရာ ဒီမိုကရေစီပါတီ AMDP အနေဖြင့် ကိုယ်စားလှယ်လောင်း ၃၅ ဦးဖြင့်လည်းကောင်း လွှတ်တော် အသီးသီးမှာ ဝင်ရောက် အရွေးချယ်ခံခဲ့ ကြသည်။
