မွန်ပြည်နယ်၊ ကျိုက်ထိုမြို့ မြိုရှောင်လမ်း မီးပွိုင့်အနီးတွင် မေ ၁၆ ရက်နေ့ နေ့လည် ၁ နာရီခန့်က ကားတစ်စီး အရှိန်လွန်တိမ်းမှောက်ပြီး ဆရာတော် ၁ ပါး ပျံလွန်တော်မှုကြောင်း လူမူကယ်ဆယ်ရေးအဖွဲ့ထံမှ သိရသည်။ သာသနာရေးအမှတ်တံဆိပ်ပါ CRV အမျိုးအစား အမည်းရောင်ကားသည် ရန်ကုန်မှ မော်လမြိုင်သို့ ယာဥ်မောင်း အရှိန်လွန်ပြီး တိမ်မှောက်မှုသွားခြင်းဖြစ်သည်ဟု ဆိုသည်။
“ရန်ကုန်ကနေ မော်လမြိုင်သွားဖို့ အဲအကွေ့မှာ အရှိန်လွန်ပြီး မှောက်သွားတယ်။ ကားမှာ ဆရာတော် ၁ ပါးနဲ့ ဒါရိုက်ဘာပါတယ်။ ဆရာတော်ကတော့ ဆေးရုံးအရောက်မှာ ပျံလွန်တော်မူသွားတယ်” ဟု ကျိုက်ထိုမြို့ လူမူကူညီရေးအသင်းအဖွဲ့ဝင်တစ်ဦးက ပြောသည်။
ယာဉ်မောင်းကတော့ ထိခိုက်ဒဏ်ရာအနည်းငယ်သာ ရရှိကြောင်း လူမှုကယ်ဆယ်ရေးအဖွဲ့တို့ထံမှ သိရသည်။
ပျံလွန်တော်မှုသွားသော ဆရာတော်သည် မော်လမြိုင်မြို့၊ တောင်ဝိုင်းကလေး မဟာစည်သာသနာ့ရိပ်သာတွင် သီတင်သုံးနေထိုင်ပြီး ရန်ကုန်မြို့ လှည်းကူးမှ ကျောင်းထိုင်ဆရာတော် ဘဒ္ဒန္တသာသနာ့ ဖြစ်သည်ဟု သိရသည်။
