မွန်သတင်းအေဂျင်စီ (၂၀၂၂ ဇူလိုင် ၃၁)
မွန်ပြည်နယ်၊ သထုံမြို့နယ် ပိန္နဲတောကျေးရွာတွင် ဇူလိုင်လ ၂၉ ရက် နံနက်ပိုင်းက လက်နက်ကြီးကျည် ကျရောက် ပေါက်ကွဲမှုကြောင့် ဒေသခံနှစ်ဦး ထိခိုက်ဒဏ်ရာ ရရှိခဲ့ကြောင်း သိရသည်။
သာသနာကုန်းကျေးရွာနေ ဦးဇေယျာနှင့် မထွေးထွေးအေးတို့သည် ပိန္နဲကုန်းကျေးရွာသို့ လမ်းလျှောက်လာစဉ် ပိန္နဲတောကျေးရွာနှင့် ဝမ်းဘဲအင်းကျေးရွာကြားရှိ ထီညာသူတံတားအနီးတွင် လက်နက်ကြီးကျည် ကျရောက် ပေါက်ကွဲခဲ့ခြင်း ဖြစ်ကြောင်း ဒေသခံတစ်ဦးက ပြောသည်။
“သူတို့တည့်တည့်ကို မကျတာ သက်သာသွားတာ။ မဟုတ်ရင်တော့ စိုးရိမ်ရတယ်။ အခုတော့ မစိုးရိမ်ရပေါ့။ ဒဏ်ရာတွေတော့ ရကုန်တာပေါ့”ဟု ၎င်းက ပြောသည်။
လက်နက်ကြီးကျည် ပေါက်ကွဲမှုကြောင့် လက်ဖျံ၊ ရင်ဘတ်နှင့် ခြေထောက်တို့တွင် ကျည်စထိမှန်ဒဏ်ရာ ရရှိခဲ့ကြောင်း ၎င်းက ဆက်ပြောသည်။
လက်ရှိတွင် ဦးဇေယျာနှင့် မထွေးထွေးအေးတို့ကို သထုံမြို့နယ် ပြည်သူဆေးရုံသို့ ပို့ဆောင်ထားပြီး ဆေးကုသမှု ခံယူနေကြောင်း သိရသည်။
ပြီးခဲ့သည့် မေလအတွင်းကလည်း သထုံမြို့နယ် ဝီယော်ကျေးရွာအနီး လက်နက်ကြီးကျည်ပစ်ခတ်မှုကြောင့် ရော်ဘာအစေးခြစ် အလုပ်သမား သုံးဦး ကျည်ထိမှန်ခဲ့ပြီး လင်မယားနှစ်ဦး သေဆုံးခဲ့သည့် ဖြစ်စဉ်များလည်း ရှိခဲ့သည်။
