spot_img
Friday, March 29, 2024
More
    spot_img
    Homeသတင်းရန်ကုန်-မော်လမြိုင် ရထားလမ်းပိုင်းအဆင့်မြှင့်ပြီးပါက ၆ နာရီခရီးသာကြာမည်

    ရန်ကုန်-မော်လမြိုင် ရထားလမ်းပိုင်းအဆင့်မြှင့်ပြီးပါက ၆ နာရီခရီးသာကြာမည်

    -

    ရန်ကုန်- မော်လမြိုင် ရထားလမ်းပိုင်း အဆင့်မြှင့်တင်ခြင်းကို ဘတ်ဂျက် ၉ ဘီလီလျံ အကုန်ကျခံကာ ဆောင်ရွက်နေပြီး လာမည့် ၂၀၁၉ ဘဏ္ဍာရေးနှစ်တွင် အပြီးသတ်လုပ်ဆောင်ပြီးပါက ၆ နာရီခရီးသာကြာမြင့်တော့မည်ဖြစ်ကြောင်း မွန်ပြည်နယ် စိုက်ပျိုးမွေးမြူရေးနှင့် ပို့ဆောင်ဆက်သွယ်ရေးဝန်ကြီးဌာနမှ သတင်းရရှိသည်။

    စိုက်ပျိုးမွေးမြူရေးနှင့် ပို့ဆောင်ဆက်သွယ်ရေးဝန်ကြီး ဦးထွန်းဌေးက“ ရထာလမ်းတွေ အဆင့်မြှင့်တင်တာ ပြီးကုန်မှ အဆင့်မြင့်ရထားတွဲတွေ အစားထိုးမယ်။ အဲဒီအခါကျရင် တုန်တာ ခါတာတွေ မရှိတော့ဘူး။ ပြီးတော့မှ ရန်ကုန်နဲ့ မော်လမြိုင်ကို ၆နာရီနဲ့အရောက်သွားနိုင်ဖို့ ရည်ရွယ်ချက်တွေနဲ့ ပြည်ထောင်စုဝန်ကြီးက လုပ်ဆောင်နေတယ် ” ဟု ပြောသည်။

    မီးရထားဘူတာရုံ (မင်းချမ်းညီ)
    မွန်ပြည်နယ်ဘက်တွင် ရထားလမ်းပိုင်းမိုင်ပေါင်း (၉၀)ကျော်ခန့်ရှိပြီး ကိုးချောင်းဆက် သံလမ်းအဖြစ် အဆင့်မြှင့်တင်ထားခြင်းဖြစ်ကြောင်း ဝန်ကြီးက ဆက်ပြောသည်။

    “ လုပ်တာကတော့ ရန်ကုန်ကနေ ပဲခူးထိရောက်တယ်။ ပဲခူးကနေ စစ်တောင်းအထိ ၊ စစ်တောင်းကနေ တောင်စွန်းအထိ မိုင် (၃၀) စီ ရှိပြီးတော့ နှစ်အလိုက်ရတဲ့ ဘတ်ဂျက်ကို သုံးပြီးတော့မှ ကိုးချောင်းဆက် သံလမ်းတွေ လုပ်နေကြတာပေါ့။ ကိုးချောင်းဆက်သံလမ်းဆိုတာ ကျောက်တွေ အပြည့်အဝထည့်ရတယ်။ နောက်ပြီး လမ်းတွေရဲ့အနေအထား အနိမ့်အမြင့်တွေကို လိုက်ပြီး ထိန်းညှိရတယ်။ နောက်ထပ် ဒီဘက်မှာ မိုင် (၃၀)ကျော်လောက် ထပ်လိုဦးမယ်။ ၂၀၁၉ ဘဏ္ဍာရေးနှစ်ကျမှ ပြီးပြတ်မယ်လို့ ထင်တယ် ” ဟု ၄င်းက ဆိုသည်။

    အဆိုပါ ရထားလမ်းပိုင်း အဆင့်မြှင့်တင်ခြင်းလုပ်ငန်းများအားလုံး ပြီးစီးသွားပါက အဆင့်မြင့် ရထားတွဲများ အစားထိုးပေးသွားမှာဖြစ်ပြီး ရထားဘူတာများကိုလည်း တဆက်တည်း အဆင့်မြှင့်တင်ပေးသွားဖြစ်ကြောင်း သိရသည်။

    ရန်ကုန် – မော်လမြိုင် ရထားလမ်းပိုင်းကို ဇင်းကျိုက် ၊ မုပ္ပလင် ၊ ရင်းငြိမ် စသည့် မွန်ပြည်နယ်ရှိ ကျောက်မိုင်းများမှ ထွက်ရှိသော ကျောက်များ ၊ မုတ္တမကွန်ကရစ် ဇလီဖားတုံးစက်ရုံမှ ထုတ်လုပ်သော ဇလီဖားတုံးများနှင့် ပေါင်ဘူတာရှိ ကိုးချောင်းဆက် သံလမ်းအလုပ်ရုံမှ သံလမ်းများဖြင့် အဆင့်မြှင့်တင်မှုများ ဆက်လက်လုပ်ဆောင်နေကြောင်း သိရသည်။

    မြန်မာ့မီးရထား တိုင်းအမှတ် – ၈ အင်ဂျင်နီယာ ဦးမျိုးဇော်တူးက “ရထားလမ်းပိုင်းကတော့ တောင်စွန်းကနေ မော်လမြိုင်ထိ ကျန်ရှိနေသေးတယ်။ အဆင့်မြှင့်တင်ဖို့ အတွက် အခက်အခဲ မရှိပါဘူး။ မိုင်နှုန်းမြှင့်တင်ဖို့အတွက်တော့ အခက်အခဲတွေ ရှိနေသေးတယ်။ တရားမဝင် ကားလမ်းကူးတွေ လှည်းလမ်းကူးတွေ များနေတယ်။ အဲဒါတွေကို အာဏာပိုင် အဖွဲ့အစည်းတွေ ဒေသခံတွေနဲ့ ညှိနှိုင်းပြီးတော့ ဆောင်ရွက်မှပဲ အဆင်ပြေနိုင်မယ်” ဟု ပြောသည်။

    လက်ရှိတွင် ရန်ကုန် – မော်လမြိုင် ရထားခုတ်မောင်းချိန် ပျမ်းမျှ ၉နာရီဝန်းကျင် ကြာမြင့်နေပြီး အဆင့်မြှင့်တင်ပြီးပါက ၆ နာရီသာ ကြာမြင့်တော့မှာဖြစ်ကြောင်း ရန်ကုန်ဘူတာမှ ပဲခူးဘူတာအထိ ၄၆ ဒဿမ ၅ မိုင် ၊ ပဲခူးဘူတာမှ စစ်တောင်းတံတားအထိ ၃၁ မိုင် ၊ စစ်တောင်းတံတားမှ တောင်စွန်းဘူတာအထိ ၃၂ ဒဿမ ၅ မိုင် အဆင့်မြှင့်တင်ခြင်းလုပ်ငန်းများ ပြီးစီးနေပြီဖြစ်ကြောင်း သိရသည်။

    ဆက်စပ်သတင်း

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.

    Stay Connected

    0FansLike
    0FollowersFollow
    409FollowersFollow
    20,600SubscribersSubscribe
    spot_img

    Latest posts