မွန်  ၊ အင်္ဂလိပ် ၊  Font

Breaking News
Home / သတင်း / ခနောက်စိမ်းသတ္တုကြိတ်ခွဲသန့်စင်စက်ရုံတစ်ရုံကို မွန်ပြည်နယ်အစိုးရ စမ်းသပ်လည်ပတ်ခွင့်ပြု

ခနောက်စိမ်းသတ္တုကြိတ်ခွဲသန့်စင်စက်ရုံတစ်ရုံကို မွန်ပြည်နယ်အစိုးရ စမ်းသပ်လည်ပတ်ခွင့်ပြု

ရေးသားသူ:

မွန်ပြည်နယ်၊ ကျိုက်မရောမြို့နယ်၊ ညောင်ပင်ဆိပ်ကျေးရွာအုပ်စုရှိ မော်လမြိုင်စက်မှုဇုန်အတွင်းတွင် ခနောက်စိမ်းသတ္တုကြိတ်ခွဲသန့်စင်စက်ရုံတစ်ရုံကို ပြည်နယ်အစိုးရအဖွဲ့က စမ်းသပ်လည်ပတ်ခွင့် ပြုထားကြောင်း သိရသည်။

စက်ရုံစမ်းသပ်လည်ပတ်ခွင့်ရထားသည့် အရှေ့မြောက်ဆင်ဖြူတော်သတ္တုတူးဖော်ရေးကုမ္ပဏီလီမီတက်မှ စက်ရုံ စမ်းသပ်လည်ပတ်ခွင့်ရရှိရန် သြဂုတ်လခန့်က ပြည်နယ်အစိုးရအဖွဲ့ထံ တင်ပြထားပြီး ပြည်နယ်အစိုးရအဖွဲ့မှ အောက်တိုဘာ ၂ ရက်နေ့မှစကာ စမ်းသပ်လည်ပတ်ခွင့် ပြုပေးလိုက်ခြင်းဖြစ်သည်ဟု မွန်ပြည်နယ်အစိုးရအဖွဲ့ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးက ပြောသည်။

သဘာဝပတ်ဝန်းကျင်ထိန်းသိမ်းရေးဝန်ကြီး ဒေါက်တာမင်းကြည်ဝင်း(MNA)
“စမ်းသပ်လည်ပတ်မယ့်ကာလကိုတော့ မသတ်မှတ်ထားဘူး၊ စမ်းသပ်လည်ပတ်နေစဉ်မှာ ပတ်ဝန်းကျင်ထိခိုက်မှုရှိ မရှိကို စစ်ဆေးသွားမယ်၊ ထိခိုက်မှုရှိရင်တော့ လည်ပတ်ခွင့်ပိတ်သိမ်းမယ်” ဟု မွန်ပြည်နယ်အစိုးရအဖွဲ့ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီး ဒေါက်တာမင်းကြည်ဝင်းက ပြောသည်။

စက်ရုံစတင်စမ်းသပ်လည်ပတ်သည့်နေ့တွင် ပြည်နယ်အစိုးရအဖွဲ့၊ ပြည်နယ်သယံဇာတနှင့် သဘာဝပတ်ဝန်းကျင်ထိန်းသိမ်းရေကော်တီနှင့် စက်မှုဇုန်ကော်မတီတို့ သွားရောက်စစ်ဆေးခဲ့ကြောင်း စက်ရုံလည်ပတ်ပြီး ၂ ပတ်အကြာတွင်လည်း စစ်ဆေးမှု ထပ်မံလုပ်ဆောင်သွားမည်ဖြစ်ကြောင်း ၄င်းက ဆက်ပြောသည်။

ယခင်အစိုးရလက်ထက်ကတည်းက မော်လမြိုင်စက်မှုဇုန်တွင် ခနောက်စိမ်းသတ္တုသန့်စင်စက်ရုံ ၆ ရုံခန့်တို့က စက်ရုံလည်ပတ်ခွင့်ရရှိရန် ကြိုးပမ်းမှုရှိခဲ့သော်လည်း ခနောက်စိမ်းသတ္တုသန့်စင်စက်ရုံသည် ပတ်ဝန်းကျင်ထိခိုက်မှု၊ ညစ်ညမ်းမှုနှင့် ကျန်းမာရေးအန္တရာယ်ဆိုင်ရာ ဆိုးကျိုးများရှိနိုင်ခြင်းနှင့် မြို့ရေပေးဝေရေးစီမံကိန်းကို ထိခိုက်စေနိုင်သည်ဟုဆိုပြီး စက်မှုဇုန်ကော်မတီနှင့် မြို့နယ်ကော်မတီတို့၏ တင်ပြမှုကြောင့် ခနောက်စိမ်းစက်ရုံကို ပြည်နယ်အစိုးရအဖွဲ့မှ ၂၀၁၄ ခုနှစ်က တားမြစ်ပိတ်ပင်ထားခဲ့သည်။

သို့သော်လည်း ၂၀၁၅ ခုနှစ် သြဂုတ်လခန့်တွင် စက်ရုံနှင့် စက်မှုဇုန်ကော်မတီ၊ မြို့နယ်ကော်မတီတို့ ညှိနှိုင်းမှုကြောင့် စက်ရုံတစ်ခုကို စမ်းသပ်လည်ပတ်ခွင့် ပြုပေးခဲ့ရာ အဆိုပါစက်ရုံစမ်းသပ်လည်ပတ်စဉ် စက်ရုံပတ်ဝန်းကျင်ရှိ လူထုအချို့ မူးမေ့မှုဖြစ်ပွားခဲ့သည့်အတွက် ထိုအချိန်မှစပြီး ခနောက်စိမ်းစက်ရုံအားလုံးကို ပြည်နယ်အစိုးရက ရပ်နားခိုင်းထားခဲ့သည်။

လက်ရှိအစိုးရလက်ထက်မှာတော့ ယခင်အစိုးရက ရပ်နားခိုင်းထားသည့် ခနောက်စိမ်းကြိတ်ခွဲသန့်စင်စက်ရုံတစ်ခုကို ပထမဆုံး စမ်းသပ်လည်ပတ်ခွင့် ပြုပေးခြင်းဖြစ်သည်။

ခနောက်စိမ်းစက်ရုံသည် သဘာဝပတ်ဝန်းကျင်ထိခိုက်မှု ရှိလာနိုင်ခြင်း အထူးသဖြင့် စက်မှုဇုန်၏ အောက်ဘက် (၂) မိုင်အကွာခန့်ရှိ မော်လမြိုင်မြို့ရေပေးရေးစက်ရုံ အတ္တရံ (၁)၊ အတ္ထရံ (၂) ကို ထိခိုက်မှုရှိလာနိုင်သည့်အတွက် စက်မှုဇုန်ကော်မတီ၊ မြို့နယ်ကော်မတီနှင့် စက်မှုဇုန်ဝန်းကျင်နေလူထုတို့က ကန့်ကွက်ခဲ့ကြသည်။

စမ်းသပ်လည်ပတ်ခွင့်ရထားသည့် အရှေ့မြောက်ဆင်ဖြူတော်သတ္တုတူးဖော်ရေးကုမ္ပဏီလီမီတက်သည် တစ်နေ့လျှင် ခနောက်စိမ်းသတ္တုချော ၁ တန်ခွဲ ထုတ်လုပ်မည်ဟု စီမံကိန်းအစီရင်ခံစာတွင် ဖော်ပြထားသည်။

About မွန်သတင်းအေဂျင်စီ

Check Also

ခွန်တန်၏အပေါင်းအပါ ၅ ဦးဖမ်းဆီးထိန်းသိမ်း၊ အုပ်ချုပ်ရေးမှူးကိုအရေးယူရန် တိုင်ကြားထား

မွန်ပြည်နယ်၊ သထုံမြို့နယ်ရှိ အလံတရာသာသနာ့နယ်မြေတွင် မိန်းကလေးငယ်များထံမှ ကာမလိမ်လည်ရယူခဲ့သော ခွန်တန်(ခေါ်) ဇာတ်လိုက်၏ အပေါင်းအပါ (၅) ဦးကို သထုံမြို့အချုပ်၌ ဖမ်းဆီးထိန်းသိမ်းထားပြီး အလံတရာအုပ်ချုပ်ရေးမှူးကိုလည်း အရေးယူပေးရန် သက်ဆိုင်ရာအထွေထွေအုပ်ချုပ်ရေးမှူးဦးစီးဌာနနှင့် …

Leave a Reply

%d bloggers like this: