မွန်  ၊ အင်္ဂလိပ် ၊  Font

Breaking News
Home / သတင်း / ရေးမြို့နယ် ဒေသခံပြည်သူအစုအဖွဲ့ပိုင်သစ်တောတည်ထောင်ရာတွင် ခက်ခဲမှုများရှိ

ရေးမြို့နယ် ဒေသခံပြည်သူအစုအဖွဲ့ပိုင်သစ်တောတည်ထောင်ရာတွင် ခက်ခဲမှုများရှိ

ရေးသားသူ:

ရေးမြို့နယ်တွင် ဒေသခံပြည်သူအစုအဖွဲ့ပိုင်သစ်တော ( Community Forestry -CF ) တည်ထောင်ရာတွင် မြေယာအခက်အခဲနှင့် ဒေသခံများ စိတ်ပါဝင်စားမှုနည်းပါးခြင်းတို့ကြောင့် အခက်အခဲများရှိနေကြောင်း ရေးမြို့နယ်သစ်တောဦးစီးဌာနမှ သိရသည်။

အစိုးရစီမံခန့်ခွဲခွင့်ရှိသော ကြိုးဝိုင်းတောနှင့် ကြိုးပြင်ကာကွယ်တောများတွင် CF တည်ထောင်ရာ၌ သက်ဆိုင်ရာမြေယာအသုံးချမှုကော်မတီ၏ ခွင့်ပြုချက်မရသဖြင့် လုပ်ငန်းကြံ့ကြာမှု၊ တောင်သူများ နေ့တဒူဝလုပ်ကိုင်စားသောက်နေရခြင်း၊ သဘာဝဘေးအခက်အခဲများနည်းပါးခြင်းနှင့် လိုအပ်နေသော ထင်း၊ တိုင်၊ မျှော၊ ဝါးများ အလွယ်တကူရရှိနိုင်ခြင်းတို့ကြောင့် စိတ်ဝင်စားမှုနည်းပါးခြင်းဖြစ်ကြောင်း ရေးမြို့နယ်သစ်တောဦးစီးဌာန ဦးစီးအရာရှိ ဦးစိုးဝင်းက ပြောသည်။

အံဒင်ကျေးရွာရှိ ဒေသခံပြည်သူအစုအဖွဲ့ပိုင်ဒီရေတောစိုက်ခင်း(MNA)

”ကြိုးဝိုင်းတော၊ ကြိုးပြင်ကာကွယ်တော၊ အစိုးရကစီမံခန့်ခွဲခွင့်ရှိတဲ့မြေများ၊ ပုဂ္ဂလိကနဲ့ အစိုးရမဟုတ်တဲ့ အဖွဲ့စည်းများပိုင်ဆိုင်တဲ့မြေများမှာ တည်ထောင်နိုင်ပါတယ်၊ သို့သော်လည်းပဲ အစိုးရရဲ့စီမံခန့်ခွဲရှိတဲ့မြေများမှာ တည်ထောင်တဲ့နေရာမှာ သက်ဆိုင်ရာမြေယာအသုံးချမှုကော်မတီရဲ့ ခွင့်ပြုချက်ရရှိမှသာ တည်ထောင်နိုင်ပါတယ်၊ ဒေသခံပြည်သူများအနေနဲ့ CF တည်ထောင်ချင်သော်လည်းပဲ သက်ဆိုင်ရာ မြို့နယ်၊ ခရိုင်အဆင့်ဆင့်ရဲ့ မြေယာအသုံးချမှုကော်မတီရဲ့ ခွင့်ပြုချက်မရလို့ လုပ်ငန်းတွေ ကြံ့ကြာခဲ့တယ် ” ဟု ၄င်းက ပြောသည်။

ရေးမြို့နယ်အတွင်း မာန်အောင်ကြိုးဝိုင်း ၁၆,၅၄၂ ဧကနှင့် ရေးချောင်းကြိုးဝိုင်း ၂၂၇,၄၄၄ ဧကရှိပြီး မာန်အောင်ကြိုးဝိုင်း ဧရိယာဧက(၄၃၀)တွင် နိုင်ထောစွန်းပါ (၂၆)ဦး၊ အံဒင်ကျေးရွာ ကြိုးပြင်တောရှိ ဧရိယာဧက (၁၉၀.ဝ၄)တွင် ဦးသိန်းနိုင်ပါ (၆၀)ဦး၊ အဘော်ကျေးရွာ၊ စုန်းမကျွန်းရှိ ဧရိယာ (၁၇၃) ဧကတွင် ဦးထွန်းဝင်းပါ (၃၉)ဦး တို့က ဒေသခံပြည်သူ့အစုအဖွဲ့ပိုင်သစ်တောနှင့် ဒီရေတောများကို CF တည်ထောင်ထားသည်ဟု ရေးမြို့နယ်သစ်တောဦးစီးဌာနမှ သိရသည်။

မွန်ပြည်နယ်သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီး ဒေါက်တာမင်းကြည်ဝင်းက ” ကြိုးဝိုင်းမှာပဲဖြစ်ဖြစ် ကြိုးပြင်ကာကွယ်တောမှာပဲဖြစ်ဖြစ် မြေလွတ်နေတဲ့နေရာမှာ နည်းလမ်းတကျ လုပ်ထုံးလုပ်နည်းနဲ့အညီ လျှောက်ထားလို့ရတယ်၊ အစိုးရစီမံခန့်ခွဲနိုင်တဲ့မြေဆိုလဲရတယ်၊ ဒါပေမယ့် ဌာနနဲ့ပြန်ညှိရတယ်၊ ပေးတယ်မပေးဘူးဆိုတာက သူ့ဌာနရဲ့လုပ်ထုံးလုပ်နည်းအတိုင်းပေါ့၊ စွန့်လွှတ်လား၊ မစွန့်လွှတ်ဘူးလားဆိုတာပေါ့၊ သစ်တောမြေကျတော့တစ်မျိုးပေါ့၊ အမှန်ကတော့ CF နဲ့ပတ်သက်လာရင် သိပ်ကိုလိုအပ်နေတယ်၊ ဘာလို့လဲဆိုတော့ နိုင်ငံတော်အစိုးရတစ်ခုတည်းနဲ့ သစ်တောကို ထိန်းသိမ်းဖို့ရာ တော်တော်လေးအခက်အခဲရှိနေတယ်၊ ပြည်သူတွေကလည်း တစ်ဖက်တစ်လမ်းကနေ အလုပ်အကိုင်အခွင့်အလမ်းတွေရတယ်၊ သဘာဝပတ်ဝန်းကျင်ကိုလည်း ထိန်းသိမ်းရာရောက်တယ်” ဟု ပြောသည်။

CF တည်ထောင်လုပ်ကိုင်လိုသူများအနေဖြင့် အဖွဲ့ ဖွဲ့စည်းကာ သစ်တောဌာနသို့ လျှောက်ထားရမည်ဖြစ်ပြီး CF တည်ထောင်ခြင်းဖြင့် ဒေသခံပြည်သူများ သစ်နှင့်သစ်တောထွက်ပစ္စည်းများရရှိခြင်း၊ အလုပ်အကိုင်အခွင့်အလမ်းနှင့် ဆင်းရဲနွမ်းပါးမှုလျှော့ချခြင်း၊ မြေနှင့်ရေအရင်းအမြစ်များကောင်းမွန်လာခြင်းနှင့် ရာသီဥတုမျှတစေခြင်း၊ ကန္တရဖြစ်ထွန်းမှုကာကွယ်ခြင်း၊ ရာသီဥတုကောင်းမွန်သဖြင့် စိုက်ပျိုးရေးအထောက်အကူပြုခြင်း၊ သစ်တောပြုန်းတီးမှုနှင့် သစ်တောအတန်းအစားကျဆင်းမှု ကာကွယ်ထိန်းသိမ်းနိုင်ခြင်း၊ ဇီဝမျိုးစုံမျိုးကွဲများ ပေါကြွယ်ဝလာခြင်းဖြင့် ဂေဟစနစ်ကောင်းမွန်လာခြင်း၊ မျှော၊ တိုင်၊ ထင်းအလွယ်တကူရရှိနိုင်ခြင်း စသည့်အကျိုးရလဒ်များ ရရှိလာမည်ဖြစ်သည်ဟု သစ်တောဦးစီးဌာနမှ သိရသည်။

” ဒီလို CF လုပ်တဲ့နေရာမှာ မြေအမျိုးအစားတွေက အများကြီးရှိတယ်၊ လယ်မြေ၊ ဥယျာဉ်ခြံမြေ၊ စားကျက်မြေတွေဆိုရင်လဲ လုပ်လို့မရဘူး၊ မြေလွတ်မြေလပ်ဆိုပြီးတော့ စိုက်ပျိုးလို့မရရင်တော့ ရတာပေါ့၊ အဲဒီမြေဟုတ်/မဟုတ် အဆင့်အဆင့်စနစ်တကျသေချာစွာ အသေးစိတ်စိစစ်စစ်ဆေးပြီးမှသာ ပေးနိုင်မှာဖြစ်လိုကြန့်ကြာနေတဲ့သဘောမျိုးဖြစ်နိုင်ပါတယ်။ အစုအဖွဲ့ပိုင်သစ်တောတည်ထောင်ခြင်းကိုတော့ အားပေးပါတယ် ” ဟု ကြန့်ကြာမှုအခြေအနေများနှင့်ပတ်သက်၍ ရေးမြို့နယ်အုပ်ချုပ်ရေးမှူး ဦးတင်ညွန့်က ပြောသည်။

About မွန်သတင်းအေဂျင်စီ

Check Also

မုဒုံမြို့နယ် အမှတ် ၁ မဲဆန္ဒနယ် ပြည်နယ်လွှတ်တော်ကိုယ်စားလှယ်အား ဒေသခံ ၁၀ဝ ခန့် ဆန္ဒထုတ်ဖော်

မွန်ပြည်နယ် မုဒုံမြို့နယ် မဲဆန္ဒနယ်အမှတ် (၁) ပြည်နယ်လွှတ်တော်ကိုယ်စားလှယ် ဒေါ်မြသိင်္ဂီမော်အား ကျေးရွာအုပ်ချုပ်ရေးမှူးထုတ်ပယ်ရခြင်းနှင့်ပတ်သက်၍ မှိန်ဂနိမ်းကျေးရွာ၌ ဒေသခံ ၁၀ဝ ခန့်တို့က စက်တင်ဘာလ ၂၁ ရက်နေ့ နံနက် …

Leave a Reply

%d bloggers like this: