မွန်  ၊ အင်္ဂလိပ် ၊  Font

Breaking News
Home / သတင်း / ဇင်းကျိုက်ရေတံခွန်တွင် အသက် ၁၂ နှစ်အရွယ် လူငယ်တစ်ဦး ရေနစ်သေဆုံးမှုဖြစ်ပွားခဲ့

ဇင်းကျိုက်ရေတံခွန်တွင် အသက် ၁၂ နှစ်အရွယ် လူငယ်တစ်ဦး ရေနစ်သေဆုံးမှုဖြစ်ပွားခဲ့

ရေးသားသူ:

မွန်ပြည်နယ်၊ ပေါင်မြို့နယ်၊ ဇင်းကျိုက်(ကျောက်သင်္ဘော) ရေတံခွန်တွင် ဝါဆိုလပြည့်နေ့ မွန်းလွဲ ၁း၃၀ နာရီဝန်းကျင်ခန့်က လူငယ်တစ်ဦး ရေကူးနေစဉ် ရေနစ်သေဆုံးသွားသည်ဟု ရေတံခွန် ကြီးကြပ်ရေးကော်မတီမှ သိရသည်။

ဇင်းကျိုက်ရေတံခွန်သည် ယခုမိုးရာသီကာလ၌ အနယ်နယ်အရပ်ရပ်မှ လာရောက်အပန်းဖြေသူများပြားလျက်ရှိပြီး အရက်သေစာရောင်းဝယ်ခြင်းကို တားမြစ်ထားသည်ဟု သိရသည်။

 ဝါဆိုလပြည့်ကျော် ၁ ရက်နေ့က စည်းကားနေသော ဇင်းကျိုက်ရေတံခွန် (မွန်ထော်)
ဝါဆိုလပြည့်ကျော် ၁ ရက်နေ့က စည်းကားနေသော ဇင်းကျိုက်ရေတံခွန် (မွန်ထော်)
ရေတံခွန်ကြီးကြပ်ရေးကော်မတီဝင် နိုင်ချစ်သိန်း က “ရေတံခွန်အောက်မှာ ရေကစားတဲ့လူတွေ ကျနော်တို့ကို သတင်းလာပေးတာ။ ကျနော်တို့အဖွဲ့ အောက်ရောက်တော့ လူငယ်က အသက်မရှိတော့ဘူး။ သူ့အဖော်တွေပြောတာတော့ ရေငုတ်ရင်း နစ်သွားတာပါ။ အောက်မှာက ရေတော်တော်နက်တယ်” ဟု ဆိုသည်။

ရေနစ်သေဆုံးသွားသည့် လူငယ်သည် ၆ တန်းကျောင်းသားဖြစ်ကြောင်း၊ အရက်သေစာ သောက်စားထား ခြင်းမရှိသလို ရေတံခွန်အနီးနာရှိ ဈေးဆိုင်များမှာလည်း အရက်သေစာ ရောင်းခွင့် မပြုထားကြောင်း နိုင်ချစ်သိန်း က ဆက်ပြောသည်။

အဆိုပါလူငယ်သည် မောင်လင်းပြည့်ဖြိုး အမည်ရှိသူဖြစ်ပြီး မော်လမြိုင်မြို့၊ ရွှေမြိုင်သီရိရပ်ကွက်၊ ဇေယျာချမ်းမြေ့ရပ်ကွက်တွင် နေထိုင်သည်ဟု ရေတံခွန်ကြီးကြပ်ရေးကော်မတီမှ သိရသည်။

ရေတံခွန် ကြီးကြပ်ရေး ကော်မတီဝင် ဦးထွန်းထွန်းနိုင် က “ရေတံခွန်ရေအောက် ကြမ်းပြင်ကို ကျနော်တို့မြှင့်ထားပါတယ်။ ဒါပေမဲ့ မိုးကရွာလိုက်တော့ ကျနော်တို့လိုချင်တဲ့ အတိုင်းတာကို မရတာပါ။ လုံခြုံရေးအပိုင်းတော့ ဇင်းကျိုက်မြို့မှာရှိတဲ့ ပြည်သူ့စစ်၊ ရဲ၊ မီးသတ်နဲ့ ရပ်မိရပ်ဖ ၅၀ ကျော်လောက်က တာဝန်ယူဆောင်ရွက်ပေးနေပါတယ်”ဟု ဆိုသည်။

ရေနစ်သေဆုံးမှုဖြစ်ပွားခဲ့သော်လည် လာရောက်ရေကစားသူ လျော့ကျမသွားကြောင်း၊ ရေတံခွန် ကြီးကြပ်ရေး ကော်မတီက အန္တရာယ်ကင်းရှင်းအောင် ကူညီဆောင်ရွက်လျှက်ရှိကြောင်း ဦးထွန်းထွန်းနိုင် က ဆက်ပြောသည်။

အလားတူ အဆိုပါဇင်းကျိုက်ရေတံခွန်၌ ယမန်နှစ် ပထမဝါဆိုလဆန်း ၃ ရက်နေ့ (ဇူလိုင် ၁၉ အာဇာနည်နေ့) တွင် အမျိုးသား ၁ ဦးနှင့် ဒုတိယဝါဆိုလပြည့်နေ့တွင်လည်း အမျိုးသား ၄ ဦး ရေနစ်သေဆုံးသည့် ဖြစ်ရပ်များ ရှိခဲ့သည်။

About မွန်သတင်းအေဂျင်စီ

Check Also

ရေးမြို့နယ်တွင် ရာဘာအစေးခြစ်လုပ်သားရှားပါး

ယခုနှစ်မိုးနှောင်းကာလ ရာဘာအစေးခြစ်ရာသီစတင်ချိန်၌ မွန်ပြည်နယ် ရေးမြို့နယ်ဒေသတဝိုက်တွင် လုပ်သားရှားပါးမှုပြဿနာနှင့်ကြုံတွေ့နေရကြောင်း ခြံပိုင်ရှင်များထံမှ သိရသည်။ Related

Leave a Reply

%d bloggers like this: